Mungdan kunghpan hpaji buhkom rung, Miwa mung manam nbungli rung, Yinnan mungdo gaba mungchying sha asuya rung re ni woi ninghtan hpo ai 2022 ning Miwa mung mungkan buhkom hpaga matut mahkai hpong hpe shata 7 nhtoi 22 shani ko nna nhtoi 24 ya shani du hkra Hkunmyin ko hpo ma ai. Sakhkung na “Tsomhtap sanit” 2022 ning Miwa mung mungkan buhkom hpaga matut mahkai hpong laman hta pya madun dan yang, shara shagu na buhkom hpaga dap hte buhkom masha ni grai yu sharong ma ai.

　　Sakhkung pya madun dum ko tsomhtap ai dum nta mungdan hpe tsora ai myit, tsomhtap ai tuhkrung htingwan, tsomhtap ai hkamja tsi mawan, tsomhtap ai amyu kunghpan hpaji, tsomhtap ai mung htingrep, tsomhtap ai amyu malu masha, tsomhtap ai rung rai mari ladat re ni hpe buhkom masha ni grai sa yu len ma ai.

　　Sakhkung ni a gat rai pya madun ai shara ko shang wa yang, manam pyo la ai ga-hpri wai nga ai hte, lungseng dam shajong ton ai mu mada sai, buhkom manam ni datwan hte lungseng nan ai n rau she n rau nga ma ai, lungseng dam ton ai ko nna lai rai jang, Jinghpo amyu nu num ni da ai bu hpun palong pya madun ton ai bai mu mada sai, De-ang amyu shadang sha ni hpalap jahkri chyim yu ga nga gahkrang ai mung ahtang she rai, Sam amyu ni a tauba si pyiman, maisau zen sama sumla re htunghking nhtong sut hte buhkom gat rai mung pya shajong ton nga ai. Yu yang tsom, lu yang mu, madat yang na pyo re htunghking nhtong sut hpe du sa ai manam ni yu mau ai hta lai nna, Sakhkung ga na malu masha, gat ro gat rai re ni hpe mung yu len nga ma ai. Sam amyu ni a shan jahkro, Jinghpo amyu ni a shat makai re ni mari la nna chyim yu ai masha grai lo ai. Ga-hpri, Lagat ntsin, kyenko, Nding kaling si, jap di re Sakhkung ga na gat rai hpe du sa ai manam ni grai mari mat wa sai.

　　Hkunmyin na Hu nga ai myit su salang wa go, Sakhkung pya madun dum hpo ai jahpot njang grai jau nna du sa wa sai.

　　Myitsu salang Hu tsun ai: “Sakhkung pya madun dum ko go shong du ra ai shara re, nta masha ni Sakhkung ga na malu masha grai sha kam ai, daihpot da-sang jau jau sa wa nna Sam shan jahkro sa mari nngai. Ya rau jang nta masha ni hpe woi nna Sakhkung ga na lali tsom ai htingwan numchying sa yu hkom, malu masha hkan chyim hkom rai na ngu nga ai.” Nga ai.

　　Pya madun dum gata na ginsup pinra ko ginsup ka, mahkon hkon re ko mung manam ni grai sa ma ai. Mungpanasi yu-ngui ginsup hpung ni hkon ai mahkon 《Shata jan gata na kawa maling》 , Jinghpo shadang sha yu-ngui ginsup hpung ni mahkon ai 《Shagong bum ga na machyi nambat》 re ni hpe manam ni sharong shara rai sa yu sa madat ma ai.

　　Mungdo kunghpan hpaji buhkom dap na seng ang lit gun ningbo langai tsun yang, ndai lang na pya madun hpong hta, shanhte soi ai buhkom lamu ga sumla mung la lung wa ai, ginwang myu shagu soi lung wa sai, lamu ga sumla ko sa du chyai na shara, shat sha na shara, yup na shara re ni azin ayang soi ton ai nga ai.