Madu dap shiga Shata 7 nhtoi 20 ya shani ko nna shata 8 pro 6 ya shani du hkra, Shadan krung ko Jinghpo laika sharin hpong hpo lai wa sai.

　　Ndai lang na Jinghpo laika sharin hpong go Shadan krung gat mare Jinghpo Wunpong amyu sharot hpaji sumru hpung ni woi ninghtan hpo ai re, Jing- hpo laika sharin sara 24 so shaga la nna gahtong 19 na jongma 762 hpe Jinghpo laika sharin la shangun sai.

　　Sharin hpong hpe shata 7 nhtoi 20 ya shani sharin hpong hpo masat galo nhtom, shata 8 pro 6 ya shani shangut hpong hpo ma ai. Sharin hpong hpo masat hta Jongma ni lang na laika buk, maisau, hkedan re ni htuk ya ai hte rau, laika sharin shara masat, jong sara hprai rai ma ai. Jinghpo laika sharin hpong hpe Muwun, Hpundu, Sharo kong , Maitong, Gumlau, Htingra kong, Wuhpra, Panlong hku, Tinggya, Wura, Wuhpai, Hka-shang, Lasi nhkang, Shalau hkran, Maimai, Dinrin, Hkinru, Shadan krung gat mare re mare gahtong hkan na shawa nta hte hpaji sharin gok hkan hpo nhtom, jongma ni a Jinghpo laika hpaji madang ko hkan nna hpung lahkong garan in sharin ma ai. Jinghpo laika sharin ai hta lai nna, yu-ngui ginsup sara ni hpe so saga la nna mahkon mangui ka manot ginsup mung sharin la shangun sai.

　　Shadan krung gat mare Jinghpo Wunpong amyu sharot hpaji sumru hpung hpung up Marip Maru Brang Tong, dinggrin lit gun hpung up ningtau Maran Labok No, hpung up ningtau Maran Sau No, hpung up ningtau Marip Tuja Ma Nu re hpung ningbo ni sharin hpong hpo masat hta sadi maja ra ai lam, galo du ra ai lam re ni sa matsun, hpaji sharin shakut na n-gun sa jo da rai nhtom, shangut hpong hta gabu gara mungga hte chyeju dum ga sa tsun ma ai. Jong sara Gareng Hka Hku, Lahpai Du Ko, Marip Hka-lam Htu re ni jong sara yong a gong malai hku nna sharin hpong hpo masat hta Jinghpo laika sharin ai mahkrum madup garan gachyan dan ma ai. Mawa amyu ni hte Lisu amyu jongma ni mung sharin hpong hta Jinghpo laika sa sharin hkam la ma ai.

　　Sharin hpong laman hta, Jongma ni laika ganu, nsen ganu, mahku ganu re ni chye hti chye ka sai hta n-ga, sharin hpong galang bai sa lom ai ni go shakram zon re ni chye ka sai.

　　(Ka/dem ai Marip Maru Brang Tong)