Madu dap shiga Shata 8 nhtoi 11 ya shana, Sakhkung mungdo kunghpan hpaji wunhpom rapdo 《Wunpong》gram lajang hpung ni Mangshi Nsam sanit Yinnan·Mungkan shali laika ka shalat shara ko Hpan Ja a sumrai hti ginlen hpong woi hpo ma ai, Mangshi ko shanu nga ai Jinghpo amyu shali laika ka sara ni sa du lom ma ai.

　　Jinghpo amyu shali laika ka ninghkring Hpan Ja go Sakhkung mungdo kunghpan hpaji wunhpom rapdo na magam gun masha re, 2014 ning hta magam mu hkring sa mat sai, ya go Sakhkung mungdo shali laika ka shalat rapdo na tingnyang up lit no gun nga ai, shi a mying Hpan Ja nga ai go shali laika ka ai ko lang ai ningka mying re, shi a Jinghpo mying go Maji Bok ngu ai re, Miwa mying go Sha Hung Yin nga ma ai. Shi 1978 ning hta asuya magam bungli shang nhtom, ningnan do e go《Myithkrum shi laika》dap Jinghpo hpung ko Jinghpo shi laika shong lajang yu ai, hpang e Sakhkung mungdo kunghpan hpaji wunhpom rapdo ko 《Wunpong》 hkumhpa laika lajang lit bai gun nu ai. Shali laika ka ninghkring Hpan Ja go 1978 ning ko nna shali laika ka hpang wa sai, shi ningnan lang ka ai sumrai go 《Nmau hka myiprui》 ngu ai re. Hpan Ja sumrai laika ka shakut ai 40 jan ning rai sai. Shi ka ai sumrai galu《Ganu nbung ai shannau》 hte 《Lohkum Ja Dim》 go mungdan nlo amyu shali laika ka shalat “Gyinma” shagrau kumhpa lu la yu sai.

　　Sumrai ginlen hpong woi go 《Wunpong》 hkum hpa laika lajang lit magam gun Maji La Seng re. 《Wunpong》 hkumhpa laika lajang lit hkam Hpaudo Bok Tong ginlen hpong hta shachyan dan ai ko chye lu ai, Hpan Ja ka ai sumrai laika gadun ganoi 50 dang du sai, lahta de tsun ai “Gyinma” kumhpa lu la ai hta lai nna, 《Nmau hka myiprui》, 《Buga chyenan》, 《Ura sailung》 re shali laika mung mungdo gaba tsang na kumhpa lu la yu sai.

　　Hpan Ja a sumrai laika hti garan gachyai tsun galen hpong hta sa lom ai laika hti masha ni ning nga ai, sara ma Hpan Ja ka ai sumrai hti yu ai hpang, hkam sha ai lam grai nga ai, shi ka ai sumrai ga grai hkum ai, hti yang manu ai, laika hta dumsa jaiwa ga hta lang, ga shagop hte shapyo, ga malai hte shadon rai, hti dat jang masin htuk hkrak wa ai, myi hte nan mu mada ai zon nga ai, tsun hkai ai lam go shinggyim masha ni a nga pra laman hta n rap ra ai lam hpe tsun shaleng ai, grau nna go prat ningnan na num ma ni jamjau hkrum ai majo malan ninghkap ai lam hpe shawa yong hpang de shana shabra dan nga ai. Bai lam mi go sara ma Hpan Ja asak 20 jan ning ko nna sumrai laika ka hpang wa ai rai yang, ya daini du hkra raitim dingyang no shakut nga ai, ramma ni sharin la na kasi kanan gaja re, htom hpang de sara ma Hpan Ja hpaji dingyang no hkan matsun na hpe myit mada ai. Sakhkung mungdo kunghpan hpaji wunhpom rapdo ni ko nna mung daina na zon re ginlen hpong loi nhkring woi hpo nna, shada hpaji jo hkat na hpe myit mada ai nga ai.

　　(Ka / dem ai Lahto Brang Ja, Nhkum Ma Chin)