Nshon ginwang ni mungdan ko nna “Hkarang panglai hpaga lam” go maden, “Sinpro Lai rem magam sinna de htot sit”, ri da jak mu magam shading sharai shangang shakang re ginjang gaja ko manoi manat let, ginwang na Lai rem labri hpun hkai magam mu mabyin masa ko yu nna, asuya rung de akyu jashon lu, hpaga dap ni amyat kap, hkaimu masha ni ja gumhpro lu tam lang re lu su nga mai hkrun lam wo ton ma ai. Ya Nshon ginwang na Lai rem labri hpun hkai magam mu hpe mungdo gaba asuya ni a “Ginwang langai magam mu langai” laksan ginwang hte hpung 2 na “Yinnan mungdo gaba alak nsam hkai n mai gat rai hkai ginra” ko mying jahpan bang ton lu sai.

　　Yi-nam ta hta go, Lai rem labrai hpun hkai rai yang grai mai ai ten hkra lado re, Nshon ginwang na hkaimu masha ni nrau nhtau rai labri lap di kyin nga ma ai.

　　Nshon ginwang Nungpa gat mare Bangwan mare salang rapdo Yeyu pa na hkaimu masha Hon Zhung Jin tsun ai: “Dai ning labri hpun mu 75 hkai ton yang, Lai 9 lang rem sai, gumhpro sen 1.4 lu tam la nna nta galo ton sai, htaning go labri yi bai galo jat hkyem nga nngai” nga ai.

　　Nshon ginwang Nungpa gat mare Loileng mare salang rapdo Loileng gahtong na hkaimu masha Hkyi Fa Gui shi sok masha hpe tsun dan ai, shong de shi kaga mungdo gaba hkan bungli tam galo yu ai, gumhpro chyom go mu tam ai raitim, nta masha ni hpe n lu hkang ai. Gahtong masha ni Lai rem labri hpun hkai nna dum nta nta pyi lu galo rong ai da nga, shi mung chyam yu na kun ngu nta de Lai wa rem sha mat ai re da.

　　Hkyi Fa Gui ning nga ai: “Lai ningnan rem yang ganing di rem na n chye nna, rem sat kau ai lo ai, hpaji sara ni matsun ai hku hkan nna, lahkong masum lang rem chyam yu ai hpang ya go chye rem sai, n lu dut na mung n myit pu ra ai, hpaga dap de sa sa jang rai sai, ngai ya gumhpro mu tam ai hta n-ga, nta masha ni hpe mung lu hkang sangai.”

　　Lai wa sai ten hta, Loileng mare masha ni kumshu hkai, mam hkai re hta lai nna, kaga hpa n chye hkai sha ma ai. Ndai lahkong masum ning laman sinpro maga na Lai rem labri hpun hkai magam hpe sinna de htot sit, ri da magam mu shading sharai re ginjang gaja lu ai majo, labri yi mu hkying lam hkai ton nna Lai rem hpang wa sai. 2021 ning du yang Loileng mare ko Lai rem ai nta htinggo 135 du nhtom, labri yi mu 2295 hkai ton ma ai.

　　Nshon ginwang Nungpa gat mare Loileng mare salang rapdo pati dinghkung la- kying mu madu ningtau Tung Ma Lu tsun ai: “Maning mare masha ni Lai rem nna lu tam ai gumhpro lap wan 3.3 re, htinggo mi rap jahpra lap 24400 lu tam ma ai, daining na maram yu yang lap wan 6 lu tam na masa nga ai. Gat mare na ni hkai nmai hkai hpaji masha hprai nna yi yang hkan loi nhkring hkan yu ai majo, hkaimu masha ni tsang ra ai lam hpa nau n nga ai.”nga ai.

　　2015 ning hta maden sharot ton ai Sakhkung Jensin hpaga dap go Lai ri sum pan gram ai hpaga dap re, Lai ningnan kro ai ten go hpaga dap ko rem gaba la nna, Lai kro ai hpang 10 ya du jang, Lai rem ai hkaimu masha ni hpe pa mi lap 200 hte dut ya ma ai. Ya ten hta, Nshon ginwang ko Lai shakro ai shara 14 galo ton sai, hpaga dap ni Lai gaba wa ai masa ko hkan nna hpaji dingya hkan matsun ma ai. Ya ginwang ting na hkaimu masha htinggo 2280 akyu hkam sha to nga ai, labri yi go mu mun 2.5 hkai ton sai.

　　Jensin hpaga dap lauban ningtau Wang Pyin tsun ai: “Anhte Lai gaji hte Lai gaba hpe garan rem ai ladat lang ai, Lai kro ai hpang si mat ai lo ai do go hpaga dap ni rem nhtom, gaba wa ai do go hkaimu masha ni hpe ap ya rai ga ai, dai zon re ladat hte Lai rem ai majo, hkaimu masha ni hkrit tsang ra ai lam nau n nga ai.” Nga ai

　　Dai zon re gaja ai ladat lang ai majo, hpaga dap ni 2022 ning hta Lai pa mun 2.25 rem nna, Lai tsip tun 1000 ko gumhpro ri 4.5 lu tam na hku yo shada ton ai, hkaimu masha htinggo mi rap jahpra gumhpro mun 2 lu tam na re.

　　Nshon ginwang mungchying sha asuya up ningtau Shang Pyin Kong tsun ai: “Nshon ginwang ni lamu ga masa ko hkan nna, labri hpun hkai, Lai tsip hte ari ri, ri da magam galo, Lai ri sumpan galo garam sa- tsom, labu palong chyui re magam mu galo rai, yi-ngam hpe ginra na ja sutgan htu sa- tsong hkrat wa lu hkra galo nhtom, shatang du madang tso ai Lai ri sumpan hpe mungdo kaga de dut shabra, maigan de dut shalai rai na hku shakut to nga ai.”nga ai.

　　Daining, Nshon ginwang ko labri yi mu mun 2.5 hkai ton sai, mare salang rapdo 56 na hkaimu masha htinggo 2468 Lai rem labri hpun hkai ma ai, maram yu yang gum- hpro gadi 2.05 lu tam na re. Ya daini mare buga shawum shaja nga ai ten hta, Nshon ginwang ni Lai rem labri hpun hkai magam mu galo na hkrun lam ningnan wo ton lu ai majo, shawa masha ni lu su nga mai wa sai.

　　(Gale ai Lahto Brang Ja)