Madu dapshiga Shata 8 nhtoi 21 ya shana de, Sakhkung mungdo Jinghpo Wunpong amyu sharot hpaji sumru hpung ni dakkasu sanpoi ong ai jongma ni hpe garum shingtau la ai masat hpong hpo ma ai.

　　Jinghpo Wunpong myu sha ni a sharin shapan mu htu satsong dat, ja gumhpro n manu nna dakkasu jong n lu lung mat re manghkang sharai kau na matu, Sakhkung mungdo Jinghpo Wunpong amyu sharot hpaji sumru hpung ni shaning shagu kyet gaja ai jongma hte kun dinghku hta no yakhkak nga ai jongma ni hpe shagrau sha-a garum shingtau la ma ai.

　　Mungdo mungchying sha gasa zuphpong gaba dinggrin salang rapdo mu madu Li Jin Hon, mungdo mung masa bongban rapdo tingnyang up ningtau, mungdo Jinghpo Wunpong amyu sharot hpaji sumru hpung hpung up Li Chon, hpung up ningtau Ho Hkyin, Wang Sin Hkyen, chyare Li Hung Wui re woion ni masat hpong hta sa du dung ma ai hte rau, n-gun sa jo ma ai.

　　Masat hpong hta, Shuili Delung hpaga dap, Shuili myu Wandin Changhe hpaga dap, Mangshi nam tsi sinna tsi tsirung, Sakhkung Shongkyin hpaga dap, Shuili myu Chyunghui Zhangchu rungrai shalai hpaga dap re ni ja gumhpro garum jo ma ai. Garum jo hkrum ai jongma go yong hpon 33 re rai yang，garum jo dat ai gumhpro go lap 79000 ang ai. Sanpoi ong ai jongma dai hte na mungdo ting na Shosi yan-gyu sin(硕士研究生) sanpoi ong ai jongma 13 hpe masha hkum mi gumhpro lap 3000 yong hpon lap 39000 garum jo nhtom, mungdo tsang Jinghpo wunhpong amyu sharot hpaji sumru hpung ko lom ai hpung masha ni a gasha rai nga ai, daining dakkasu sanpoi ong ai jongma marai 2 hpe masha hkum mi lap 2000 yong hpon 4000, ginwang myu tsang na dakkasu sanpoi yiben(一本) ong ai jongma marai 10 hpe masha hkum mi lap 2000 yong hpon lap 20000, kun dinghku yakhkak ai jongma marai 8 hpe masha hkum mi gum- hpro lap 2000 yong hpon lap 16000 garum jo dat rai masai.

　　Zuphpong sa lom ai woion salang ni hte tsora myit madun ai rungdap ni, garum hkrum jongma ni hpe laika hpaji atsom sharin shakut let, pati asuya hte hpong shingra ko nna tsang lahku ai ninglum hpe grengja ai n-gun gayin shatai la rai, mungdan grau hkikhkam, Sakhkung grau tsomhtap wa na matu, n-gun atsam sak shapro ra ai nga n-gun jo dat ma ai.

　　Garum hkrum jongma ni mung chyeju dum myit hte hpaji sharin shakut, grau gaja ai akyu yi-ngam hte hpong shingra hpe chyeju htang, buga hpe chyeju htang na ga ai nga myit madun shajang ma ai.

　　(Ka /dem ai Alat Gun Ong)