Madu dap shiga Shata 8 nhtoi 25 ya shani, Yinkyang ginwang Jinghpo Wunpong amyu sharot hpaji sumru hpung ni Hpyin-yang ko dakkasu sanpoi ong ai jongma ni hpe garam shado la ai masat hpong hpo ma ai.

　　Yinkyang ginwang Jinghpo Wunpong amyu sharot hpaji sumru hpung na ningbo ningla ni, ginwang tsang rung dap na Jinghpo Wunpong amyu sharot hpaji sumru hpung ko lom ai hpung masha nkau, ja gumhpro madi shado garum la nga ai hpaga dap na gasa ni, dakkasu sanpoi ong ai jongma ni hte nta masha re ni garum shado masat hpong hta sa du dung ma ai.

　　Garum shado masat hta, shong ningnan ginwang Jinghpo Wunpong amyu sharot hpaji sumru hpung hpung up Lahpai No ko nna jongma ni hpe ja gumhpro madi shado la nga ai Yinnan mungdo gaba Yinkyang Fugyen hpaga hpung, Yinkyang ginwang Yikyin hpaga dap re ni jo ai garum shado gumhpro hkap la hte rau, garum shado masat dazik pa gam ya sai, hpaga dap ni go jongma ni hpe myit mada ai lam tsun ma ai. Yinnan mungdo gaba Yinkyang Fugyen hpaga hpung na chyare Wu Shau Hkyang tsun ai: “Yinnan mungdo gaba Yinkyang Fugyen hpaga hpung maden sharon ton ai hpang ko nna jongma ni hpe lo lo lang garum shado lai wa saga ai, jongma ni hpe ning rai garum shado la ai go, jongma ni myit mada ai lam shabyin shatai ya, n-gun hkan jo rai, jongma ni yong tsora myit hte lanu la- hku nga ai gata hta galu gaba wa mu ga ngu ai re. Bai nna jongma ni laika hpaji sharin shakut la nna, mungdan go maden ai magam mu hta atsam dat na hpe myit mada ai.” nga ai.

　　Yinkyang ginwang Jinghpo Wunpong amyu sharot hpaji sumru hpung chyare Kyin Tung Lin 《Yinkyang ginwang Jinghpo Wunpong amyu sharot hpaji sumru hpung ni 2022 ning hta jongma ni hpe garum shado na hte seng ai dodan》 shana dan ai hpang, jongma marai 37 hpe gumhpro garum jo dat sai.

　　Yinnan jong sara hpaji jong gaba de Shosi yen-gyusin (硕士研究生) sanpoi ong ai jongma Li Hpan tsun ai, “Pati asuya, ginwang Jinghpo Wunpong amyu sharot hpaji sumru hpung re ni hpe grai chyeju dum ai, htomhpang de laika hpaji dingya sharin shakut nna, mungdan maden zinghka ai magam mu hta n-gun atsam dat lom na.” nga ai.

　　Yinhkyang ginwang Jinghpo Wunpong amyu sharot hpaji sumru hpung hpung up Lahpai No tsun ai, “Ya daini jongma ni ning rai sanpoi ong ai hpe grai yu gabu na gabu ai, htomhpang de jong matut lung ai ten laman hta ganing re ru yak jamjau mi hkrum timung hkam sharang let, laika hpaji sharin shakut la nna, magam bungli htep lahti rai gun hpai na hpe myit mada ai, bai nna ning rai shada garum shingtau la ai htunghking lailen gaja hpe mung nanhte ya gaba wa ai ma ni matut shachyo hkrat wa ra ai.” nga nna jongma ni hpe n-gun jo hpungdim dat u ai.

　　(Ka/dem ai Lahpai Zau Ring)