Madu dap shiga Ndai gatsi pyo la ai mangai lado hta, dakkasu sanpoi ong ai jongma ni go, nta masha ni hte mano manang ni hpe kau da nna sumtsan ga de jong matut lung mat wa hkyem sai.

　　Shadan krung htunghking hpung ni hkan sagon yu yang, 2022 ning hta Shadan krung na dakkasu sanpoi ong ai jongma marai 20 du nga ai. Htunghking hpung ni azin ayang akri akro bai sagon yu yang, jongma nkau nta dinghku hta yakhkak ai majo jong bai matut lung na matu nta masha ni grai myit pu to nga ai. Sanpoi ong ai jongma ni a maru mayak manghkang hparan ya na matu, htunghking hpung ningbo ni zuphpong hpo nna jom dup yu ai hpang, jongma ni hpe garum shado la na lam dodan masai. Htunghking hpung ni dat nbung shingwang grup ko jongma ni hpe garum shado la na matu ndau shana dat ai hpang, Shadan krung buga masha ni madi shado lom ai hte rau, Nshon Nanwan lungseng hpaga dap ni mung garum la ma ai.

　　Shata 8 nhtoi 25 ya shani, Shadan krung htunghking hpung ni woi ninghtan ai 2022 ning na jongma garum shado masat hpong hpe Hpuntai ya ko galo lai wa sai, htunghking hpung ningbo ni, dakkasu jong sanpoi ong ai jongma ni hte nta masha re ni yong hpon masha 30 jan garum shado masat hta sa du lom ma ai. Garum shado masat hpong woi ai go Shadan krung htunghking hpung chyare Goje Gam Ba re. Goje Gam Ba garum shado masat hpong hta sa dung ai masha shong shachyan dan nna, daining sanpoi ong ai jongma ni hpe garum shado na dodan laika hte garum shado hkrum ai jongma ni a mying jahpan shana dan u ai.

　　Shadan krung htinghking hpung dinggrin lit gun hpung up ningtau Maran Labok No Ja, hpung up ningtau Marip Tuja Pri Nu, hpung up ningtau, Wuhpra mare salang rapdo pati dinghkung lakying mu madu Marip Hpaudo Lajong Ma Li re hpung ningbo ni garum shado gumhpro lahkon ai masa tsun sanglang dan ai hte rau, gumhpro garum jo dat ai buga masha ni hte hpaga dap ni hpe chyeju dum ga tsun ma ai.

　　Dai hpang hpung ningbo ni dakkasu sanpoi ong ai jongma marai 20 hpe garum shado dat sai. Garum shado hkrum nga ai jongma ni hte nta masha ni garum shado masat hta chyeju dum ga sa tsun ma ai.

　　Jahtum e Shadan krung htunghking hpung hpung up Marip Sumlut Maru Brang Tong ko nna ginhtip ga tsun u ai, shi tsun ai, dakkasu sanpoi ong ai jongma ni laika hpaji atsom shakut nna, hpaji machye machyang hpring ai shani, mungdan go maden ai magam mu hta atsam dat ra ai, mare buga sharot zinghka ai lam hta n-gun atsam sho ra ai, nang galu gaba wa ai ten hta garum shado hkrum yu ai lam hpe matsing sumhting da nna, htung lai gaja ndai dingyang matut shachyo hkrat wa ra ai hte rau, mungdan galu gaba hpong shingra ngui pyo simsa na matu shakut shaja ra ai nga ai. (Ka/Dem ai Marip Sumlut Maru Brang Tong)