Ngon dik e Sakung mau ma, bumbva ma nyi bum e Wun- bvong Zaizo amyvu banshoq bang, kinyi pongshingra byvat ma, ipe shau shuq shau mu, isam zhvoi e byuze shang.Akui dai nau le gi, sakram zowui, laqma waking bvoi ka, ipe gve mu adat shuq, nam bvat lakat ishuq myo zhang, pyizum eq mibyoq dat toq, nam bvat ikat gi yvumsing gung kala lengbat ra awo seng, ipe gi nat zhun, ipe gi byubve re ri gam yam shuizhau su, ipe gi byu bve ri yui no shui ho su, ipe gi lazai byuze mvomyi shui pu su, ipe shuq myo zhang gvang dat dvot le, asu mu, ipe gi byu yuzo e natmo gong ngvut le.Buinyi lanyi 3ma zang azo shi ma, ipe kishuq, ishuq ra hi ma zang hi zoji ra dut le, hauzhang sheq ishuq adat wut, gung ma wumbo, ipe re wumman dat dut le. Haumu lui, ishuq qo ma dat sidiq zhang, gungdu wangzan gvanghing, ishuq su nyva kibvok, Myiwa mying mai gi, nyva eq ipe gi layvum za ga, asu e gi, dvengyvang gam ra dut ra ga. Nyva gi gungdu wangzan qo ma zang kilaq zang lvoq shai, nyva abvok wo gvut le gi zhe ge le.Ipe gi shau shuq zhang chi dut, ipe shuq ra aqing gi, napzang zo tang ma lazvui shuq, myin le yvup dvo zhang shuq re zhe ge.Ipe gi yvumsing wo zhvoq shuq e gi zhe ge le, hauzhang ishuq ana no abo, gungdu wangzan qo ma ajvu gvo dik le. (Pauqi Layong)