Buitoq qam byinshut ma e bumzau Nkum wa dai e gi: “ngamoq e bum Bangwa、Banggo、Shibui、Zhvintong gvong bum bve i abo, byudu ri yvangmoq myvo abo. Asu lui, kazhung mu ma ri zhaq dat sidiq ge le. Tangpyang ri amyvu zo shidaq zhe wo myithui lvum bira. Akui, buiwang qam byin shut bum bve ma dimyaq lanyi ashi, hau u dimyaq le myaq zozo mu agvo, ngamoq gi byu shau, myium ri shau mu, yvangmoq ri abik ung, nungmoq gaifangjin bve mai dimyaq bve ri rau lo be, bik nyvau yvam gveq”.

　　Jefangjin jezau mo Zhvang tonzhang ungut ngut shoq dai e gi: “ge le, ge le! Goq myindang e je jo je tang mai pyeq toq lo e dimyaq bve ri lawan wan lo be bik nyvau yvam bira, Gungchandang ri lumzhing gveq! Ngamoq jefangjin ri lumzhing gveq”

　　Buiwang qam bum zau Zhvintong zaumang dai e gi: “hikun, ngamoq tusi bve eq zhvat dai lvum e gi, bva ma maumyi shai lo e bo zhang, ngamoq bum ma maumyi gi byo lvo bo le ngvu langvu e, akui gi nungmoq gaifangjin eq banban lo gon yvam zhang ngamoq gi hai gon zo mu nyi lara?”

　　Zhvang tonzhang dai e gi: “nganvung Zhunggo sik ri gi, Mau zhuxi、Dang zhvungyvang mai shuion dvo ao ma, anvik zan le e lvomo 10qap 1nyi ri Beqjin ma asuya wo cuq qo gvat be. Nganvung Dang e tungzam gi ge dik le, danggve: Nganvung anyi nap za pong dvom gvat e ginwang upkang dvarva byinpye zuppong gi, amyvu zo shidaq zhe wo myithui lvum ra qo shui ming e zuppong, nungmoq ri lo shui myithui e zuppong, nungmoq ri gungzo lo pyai byi e zuppong, nungmoq ri nyingon buinyi zhe nvang ra zuppong be. Tang ma gi, ngamoq Dang zhvungyvang Mau zhuxi shui dai dvo dong, Dang eq suya e mu wunzui ra e rungwap qom shui coq jo lo shira ngvut le. Haukun zhe zhang nungmoq kayuq ri gungzo myang gvut be ra, nyingon buinyi zhe bum be ra”.

　　Bumzau bve lanvut qom za ga ra dai gvo e gi: “Zhvang tonzhang dai dong yvang lawo dut ri gvum, ngamoq imyit mu be”.

　　Zhvintong gvong bumzau Zhvintong Zauzha jefangjin bve bolung lacham za ri lu e lu lo gvut lu lvum nashi gvo ri wu e mai dai e gi: “Zhvang tonzhang, nang ngamoq e bumbum bvabva ri lvang lashui gon e je bve ri wa, bolung lacham zo za ri lu e lu lo shui lu lvum gvun e gi awu ngon o! Napma nyi ngo ngayvum ma e nolui 2du lo she ung nvang mu, 3-4ce cham lo wui lo nvang ba, nang jezo bve ri layuq ri lacham gam byi mu o ri o ri bat gvun nvang aq”. Zhvang tonzhang ban jo mai “haha”ga wui le gvut dai e gi: “Zhvintong zau mang e, nang myit e ri ladong ge ra, asu e bolung xi ri bat qing lvum gvun zhung sheq langvut le. Xizhung ri nungmoq Zaizo bve e dibang ne qing lvum、 zhvun qing lvum gvun zhung ja be. Nang wu aq ma, nelvum zhvunlvum zhung ri dibang latang ma layuq langvut le ga, layuq bau gi angon mvai, bolung bat qing lvum zhung gi bolung lacham ma byu 10yuq o le, latang qo 5yuq yuq gvut bat qing lvum le, hau bolung zing ma e shamdvoq kong zo ma bolung ka tang bang zhe wo du hang zhang gi ka tang bang ung e ngvut be. Xizhung bat qing lvum ri gi myithui lvum, wum-o chom zhum lvum zhang sheq lawo bat ung le”.

　　Bumzau bve chom jo dvo gvo mai lago sai myit gvat wu gvimu layuq lakun ra dai bum lo bigvo, Zauzha:“aga, Zhvang tonzhang xidong dai koq jvo zhang gvum lazvui dat jo lo nyo be o, tangpyang nganvung bumzau zo bve ri myit lago chom zhum lui, tusi bve gumang wui eq myit lago chom hui lvum e mai, gaifangjin bve dang ri lago jo shi mu mauyam amyvu zo nyi zhowo chom jensheq ge ra zhung ngvut nyo ra”. (16)

　　Gvasu Tung Rungyin

　　Puqsu Doqshi Labau