Xi jiro, Sakung mau ma “Gvisut seng byvam、nginoq bve 4zhung ri sat、qitong shum zhvoi、loq anum chisan、zangseng sanseng、gaizhang gon ge、nobau sat、yuqdu zhup bilom”ga e 8mu mingdan ri zhvitdap, mili sanseng no gam ge mu zui e lo nyi be.Amu xi zuige ra midvu gi ao ma dai dvo qo chang ra dut le.

　　Laqo gi banshoq bang loqdap qidap chom zui lui, yvumwui yvumyam shumseng.Yuqdu zhup qiloq dui lui yvumwui yvumyam、sheqi、muzui zhang、wawui wayam ma zhvoi zhvoi sansan shum zhvoi ra dut le.

　　Iqo gi nopyo wang ra gam ge, age gvut e 9qo.Gisot ginot ze adu, kadu ka izhit qisho agvut, seye duize ri azhvup、a-ung、awui、azo, kadu ka sigvan abye, jvoi gu loq eq myoqzhi ane, kui ri kadu ka qi-i azhit asho nvang, jvoi be e nvutngvop kadu ka adu byvam.

　　Sumqo gi sanseng gvut, no gam ge.Loq anum chizhvoi, shiwa ma ngvutngvop ngvop, kihot kum myo pong san, achu chu zhang nvut eq nvo ma ngvop, moq azing, zang abvong zo, nyva abvok, ishau shuq, gung- byvan byvan ra advo myvi.

　　Myiqo gi nobau sat, sanseng wo gvut zhe.Modo zungzhang, maudang zhi zhang, ze ung zhang, gaizhang, chirung, zangseng bve byu myo zupzing zhang ma nobau sat ge ra le; Shiwa ma e qitong, shiwa modo, dat zumtang ma loqzui zhang, gungbyvan zhang ma chungze bve ma ri sanseng gvut zhe, nobau lago go sat byvam gvut ra le.

　　Ngoqo gi zhowo azhvap alap ma shum zhvoi, nginoq bve 4zhung ri sat byvam.Jvang、yangkung、nginoq、pyo gi byugung ma ana dat dvap byi zhung ngvut le, haumu yvumkau、muzui zhang、seng bve ka azhvap alap shum seng ra le, yvumwui yvumyam ma gisot ginot ze advo, gvisut gvimvut agvut, yamgang augang advo, wuihong shoq ge mu, yangkung、nginoq bve awang nvang gvut ra dut le.

　　Quqqo gi zangseng sanseng, nopyo gam ge ra le. Zanggok ma gvisut、lvulva ze lawan wan shumseng byvam, aqing dvu dvo mu yangkung、nginoq、bau hai ri sat byvam, koq koizve hai anum nobau sat, zoze chungze azang lvoqjvoi nvang. Zangseng ma awui ayam、zangzo zhang、zanggai wap bve lago sanseng, zanggai byu hai zhino age bo, zang le zo bang imyit mu hai zhino azo hang ra dong gvut ra le.

　　Nyvitqo gi zhvoibyvaq myityung dvu- shap, tantan zhepcho. Mingzo danzo banshoq bang mingzhvit sanseng zhepcho byu gvut lui, achaq azhvut mu ri dvangbyvam, yuqdu zhup dvirva ri chang lui byuze qo so, yuq kangmo mingdan ri zhvitdap, mili sanseng nogam mu chom zuige shang! (Puqsu Kongno)