No tang wum gi gungdu kau mai azhung zhung e no wang lo ra qo lvom tang e wum o ri ga le. No tang wum nyvom lo zhang, byu gungdu ma azhung zhung nobau eq zhaq zang jvungkot wang lo le.

　　Miyu igvun kau ma no tang wum ri migum ge ra paqzhvi zo chom wu wu shang:

　　1. Yvup luq ra le

　　Yvup luq zhang gungdu wum-o、unuq dui kaqo ri gewang zhaq gvo le. Gvo bang lanyi nayi 7-8qing yvup ra le, mangzo wui lanyi nayi 6qing age shau yvup.

　　2.Zho ang dong zo ra le

　　▼Miyu igvun kau ma zo e huzhung myo ra le.

　　▼Zangzo ma kang mo sun- nyui zo, nyiwui shicham zo ra le.

　　▼Azhung zhung e nauwing eq nuq eq sairvang e zoze yishi zo, jengo shitan hai gejvo zo gvut ri ge le.

　　▼Ngozo、woq byvet sho、shonvik hai gejvo zo, shocu、sho mvik、yen gu ze shau zo ra le.

　　▼Sansan za e zo, izhum(co)ko gu e zoze、cu eq nvejvuq e zoze shau zo ra le.

　　▼Izhvam luq shoq shuq, gvobang lanyi 7-8gom (1500-1700haushen)shuq ra le, wuinye lapoq wui myo shuq, tanson shuqze ashuq angvut zhang shaushuq gvut ri ge le.

　　▼Gvobang ipe shuq zhang, yuqge wui lanyi 25keq ashuq lvai, myiwe wui lanyi 15keq ashuq lvai.

　　▼Lanyi 3ma aqing dvok ma zo, yin yin le zo, amyin aqut gvut age we zhving zo.

　　3.Gungdu byvan

　　▼Yvum ma ngvut gvilvang nyiwui gungdu byvan ra le, gungdu yishi lajvo za dut dvo zhang ge le.

　　▼Myangmyang azung, nayi laqing gvo ma ladam dvoq dui nvun gvat gvut ri ge le.

　　▼Nyigvun aqing ma yvumsing gvam e dong yvumkau ma gungdu byvan, danggve zocau cau gvat、taiji qon bat gvat、zat go gvat、yija hai gvut gvat ri ge le.

　　4.Myit ngon ra le

　　▼Imyit han、imyit wo lai hai mu zhang no tang wum ri zhaq zang langjvo le.

　　▼Igvun kau ma mikon myo jo gvun、laigva myo wu gvun、bvo ming myo ming gvun gvut lui ka-u ri imyit ngonngon, imyit wo shau lai nvang ra le.

　　(Puqsu Mulat)