Jvishu yoq ri, numnang wui myo pyang gi loqsok sok, huihui kangkang ga nyi wui le ga dai bum ra, akun nganvung myoq mai myang le gi shoguq hui、nvutpu jvuq、qising sing dut ra……xisu dut bum lo le abvun awang gi zvut mai zhvat ngvut le ga.

　　Chi sira mo bve dai ri, jvishu yoq ma gi zvut ma no toq lui le, dum laqo mai dai gvat zhang jvishu yoq ma zvut lago wo migum ge zhang sheq, lazan tung ri gungdu wangzan yuqyo qo ma gewang myo ri ga, haumu nga- nvung su joqmyo yam le no nyeyam ri awo ya ge dut dvo zhang, jvishu yoq ma zvut lago migum ge lui, joqmyo yam ma toq lo ra no xi lago gamge ra le, za angvut zhang joqmyo yam ma no myo lo le ga .

　　Myiwe wui su zvut lago amigum ge zhang gi mang lui le. Zhungyi chi sira bve dai gvo ri, zvut gi shoguq ge age qo eq seng-ang lvum le, zvut ge zhang gi lagung ma shoguq ma sui wo lvoq zham mu gungdu wangzan qo gewang bo le ga.Dum laqo mai dai gvat zhang zvut age su gi shoguq ri wikwik za adut le mu, hai za zang tung gilvang pun dat pun le ga.

　　Yuqge wui zvut lago amigum ge zhang gi ai ana bo lui le ga.Yuqge wui myo pyang gi nyvabvok bum le mu, zvut ma zhaq zang kilaq le ga, haumu zvut lago wo migum ge zhang gi zhinlvum hau bve wangzan qo ma ri gewang bo dik le ga.

　　Jvishu yoq eq joqmyo ri zoshang wui gi cammyvi myvi、qungzvau zvau myo dut le gi, zvut amigum ge mu ngvut le ga.

　　Nganvung chungze mai danggve gve gvat zhang, zvut gi lagung ma soq chi zhvoi zhak ja yvang ngvut le, asu zvut gi zhak ja age zhang ge tai ge chi le zhung angvut, haumu lago yvang migum ge ra dut le ga.

　　Zvutno bo zhang gi, soqshe wui mu qungzvau zvau、soqshe dong no bo、zvut mun no bve bo lo le. Chi sira mo bve dai gvo ri, jvishu yoq gi zvut migum ge ra yamyoq ngvut le ga, haumu zvut wo migum ge ra midvu a o ma dai dvo qo chom wu chom gvut zhe shang.

　　※Anum wui.Byu anum wui zhang gi zvut wo loq dui le, wui e kun gi age soq wo loqtoq byvam mu ge gu soq dum wo zhvupwang yu lui, soqshe ngon le ga.

　　※Gunggvang ma loqzvup eq bat. Myin wui yvupyam ri dvangkuq ma zung dvo lui, qi iqi ding za gvut chin dvo, loq iloq gi qiput toq ma gve dvo e mai, ulvum ding za gvut mu myochup dvo e mai, imyit zum za eq numtang gunggvang ma yvoyvo mai loqzvup zvup mu 10da bat aq, haumai loqwa eq gungdu ishut a o mai atoq shut yvoyvo mai dum bat gvut, myinwui nayi 10fenzhung gvo shun bat zhang zvut ma gewang bo le.

　　※Qungzvau zvau.Xima dai dvo le qungzvau zvau gi qungzvau azvau nau gu dingsang zvau toq byvam zhung, xisu gvut zhang nga- nvung zang she hang dvo age soq bve ri wo zvau toq byvam lui, ge gu soq dum wo she hang yu mu zvut ma gewang bo le ga.Nyiwui napsun eq myintang mausoq zhe san dvo u dingsang qungzvau zvau aq, hauzhang age soq ri wo zvautoq byvam le.

　　※Izhvam anum shuq.Lanyi izhvam shaushau 500hausheng gvo shuq zhang gi zvut ma wo loq bvam lui zvut ge le ga.

　　Izhvam shuq e mai lai mu, gom ma wuibu gvat dvo lui lada nayi 10fen gvo wuisoq she hang zhang zvut ma gewang bo le, lanyi 2-3da gvo gvut ri gewang zhe bo le ga.

　　※ Soqmo hoi ngvu she. Lawan soqmo lada she gvat mu, yvo mai “fu”ngvu dum mvuttoq byvam aq, hauzhang sansan za mausoq zvut ma lo lung dvo aqing wo myang mu, zvut wo lvoq san byvam le.Qungdong ana no bo bang anum xisu gvut aq, lanyi ri napjvo lada mying ri lada gvut zhang zhe ge le.

　　※Gungbyvan byvan.Anum ri loqbun goi gvat lui iqap shut hekoq aq, haumai wamdau dui shoq soqmo she gvut zhang zvut ma gewang bo le.（Puqsu  Zunwa Nangbang）