Hai ri gi qinlyugan ali no ga le? Hai ri gi byu gungdu ma dap lo e qin lyugan ali no ga le? Qinlyugan ali no ri gi woq ali no, dung⁃ dap shogu zo mai dap lo e dat dvaplvum zhung no, dungdap shogu ngvoq、woq、byvet xibve zhe yvang gi woq mai shidaq dvaplvum e ali no ri ga le. Hikun gi "Woq wum no" myo ga le. Byu gungdu ma dap lo e qinlyugan ali no gi byu gungdu ma e luinvuq dong eq soqshe dong mai dat dvap byi le, qinlyugan ali nobau dap gu e shogu zo angvut zhang no⁃ bau dap gu e shogu zo e qi-i、sho-mau、gvan zhap、sui hai eq zang dveplvum zhang dap lo e no ri ga le. Byu qinlyugan ali no bo zhang kasu dat dut le? Sanghi ri gazhung ali no eq qum lo ra, midung gi gungnye、nvapwing ye、nvo zhit、 qung zvau zvau、qung no、ulvum no、lagungdu e angon dat dut le, gungdu nyesoq ri 39℃ mvak lai doq le, nobyu layuq yuq wanggang ma X zhak mai e tun wu zhang zvut laqam angvut zhang 2qam ma noko lo dat toq shit le. Nobyu myopyang gi wo ya ge zhang ge be, tang ma noko adat dvong dvo, asu e nobyu shaupyang diqa gi asak gvo be bang、noya gan zang lvoq ze bang gi zvut nopyo zhang dut、zvut mai sui toq、wanggang wui-um um、 lagungdu e sui shau lo、zhinlvum yom gvan lo、 sui ana no bve ahu hu nozhe zhe lo lui shi byvam e lvang dat bo le. Byu qinlyugan ali no kadong gam ge ra? 1. Zoze lago sanseng, shogu sho、a-u hai zo ri nyoqnyoq yvang zhvoq ra le, zoze gai、 dvodvo gvut zhang zhum gu eq nyoq gu e zoze lago gamkoq mu dvo ra le, zanggok lago sanseng ra le, sho gu sho zo ri shozhum eq sing-u singzvut azo, shogu zo sat tang ma loq lago zhvoizhvoi chi san byvam ra le, yvangbau shi e shogu sho apyoq zo gvut ra le. 2. Chungze hai ma nobau lago sat ra le. Qinlyugan ali nobau nye awo zhan, nyesoq 100℃ mvak e wuinye ma nayi laminit gvo nyvun zhang nobau wo qom sat byvam be. 3. Lago sanseng man, shogu zo eq lvoq⁃ toq gvat e qi-i, sigvan hai, zhe gi no shi byvam e dungdap shogu zo、a-u、qi-i hai eq age dveplvum, kasu mu zang dveplvum be ngvut zhang sabya eq loq lago chi zhvoi byvam ra le. 4. Shogu zvo bang、sat bang bve shogu zo eq yishi laha zang dveplvum bang yvumsing gung lago migum ge ra le. 5. Chirung ma no nyi e byu de-nye angvut zhang zvut no bo bang ri aso hui gvut ri zhe ge le, danggve aso hui adut zhang gi chi sira bve chung e zhung nvutngvop ngvop ra le. Nosam toq eq zhang chirung han e mu, yvumsing qinlyugan no zhoq zhiwo ma e wu ae wu e bve chi sira ri lago daijvo lui, chi sira daijvo e dong noya chichung gvut ra le. (Puqsu Mulat)