Numnang auzo wui, asak 40zan zhe be mai gi hai gvut ri xi ao ma e 4zhung muzo qo mai chang lui，gungdu wangzan yuqyo gvut lago byuze ra dut be.  

  1.Asak 40zan zhe tang mai gi igvun wang be mu, muzui ra le zo shui ra le, zang⁃ gai ra le dut mu, numnang lawam gi haimu gvut ri gi jin gimong gvut jin bum le, isu age gvut, hai ri yinyin mai zui ra le. Nganvung haimu zui gvilvang ahan aqut gvut zui zhang gi sing ma gewang abo, gungdu awang zan lui unuq no suicho no bve lvang dat toq lo ri ga. Haumu, hai gvut ri re imyit zum nviksoq asup gvut zhang sheq gungdu wangzan qo ma gewang labo le.

   2.Zangzo gvilvang yvoyvo mai zo ra le, nganvung kakun ri zangzo ri gi yinyin mai nuqnuq nve lui zo ri sheq gungdu wangzan qo ma gewang bo le. Zangsun gaizo gvilvang mvanhaq poqnoq myo zo zhang gungdu wang⁃ zan le, aqut aqang gvut zo zhang gi gungman ze zo lvung gvat qo ma shutshai bo le, sing-u singzvut ma ri shutshai bo le dut ri ga. Zangzo ri nuqnuq nve lui yvoyvo mai zo e mai, zangwui gaizo kun ngvut gvilvang, sho⁃ cu shau zo, mvanhaq poqnoq zangsun myo zo ra le, shocu myozo zhang wam za ji lui gungman ze gi awo zhvuphang yu, mvanhaq poqnoq zangsun zo zhang sheq sing-u singzvut ma ri ge lui suicho ma ri ge le ga.

    3.Asak 40zan zhe be mai gi yvup ri awo yvup mu zhauzhau mai dvoq nau le dut ri, yvupnoq dvoq eq gungbyvan e byvan gvut bum le, asu e sui myvang no, nviklvum no xi⁃ bve bo bang gi yvumdvoq eq gungbyvan age byvan, buitoq lo tang ma byvan ri lage le. Haimu lvu ga zhang gi, napsun gi sui lagung e awo ban duilving lui sui zing dvo gu ma e din lving zhang gi, suicho dat buqgoq lo le, unuq no toq xingin ga e no toq le dat dut le, haumu asak 40zan zhe be tang mai gi kimyvo zhau mai yvupnoq wo dvoq gvilvang, buitoq tang ma gungbyvan ri sheq gungdu wangzan yuqyo qo ma gewang labo le ga.

     4.Oyuq eq hai ga le nvikyo le rvoimying gvilvang nvikzhum ayo wo gvut ri gungdu wangzan yuqyo qo ma gewang bo le. Gabang mai nang ri hai le dai zhang nvikzhum yo lui no lvoqtoq ri gi azho dik, yvumsing yvang myit lago yin gvut sidiq yu ra le. Haumu, subve eq nang ri kisu ga rvoimying 、daipoi 、wumyvuq hai mu gvilvang imyit ma agvat dvo, yvumsing imyit ngon ra dong dat myit lvingyu ra dut le. Myit sidiq e mai lai lui zoshuq qo ri son zhe ra le: Laqo gi sho shau zo ra le, zhe gi shocu shau zo aq. Shocu myo zo zhang gung⁃ du gungman gan awui lui, ungkau ma achaq azhvut ze lawan wan awo laitoq mu, ungkau ma e sing、nviklvum unuq suicho bve ma ri no dat bo lo hai mu le.Iqo gi izhvum lvum⁃ myo age zo. Izhum koko gvat zo zhang ung⁃ kau ma gvumbvai eq sing-u singzvut kau bve ma wum lai aluq lui, suimyvang no、nviklvum no、gvumbvai no hai ge bo lo le.Sumqo gi chui gu ze shau zo ra dut le. Chuize lvum zo zhang gi ungkau ma sing-u singzvut bve eq suicho bve ma zang shutshai lui, azhung zhung no dat dut toq bum lo le.Myiqo gi zang jiji goq goq gvut age lvum zo cang, ji eq ade ji jvo gvezo zhang, gungdu wangzan yuqyo qo ma gewang zhe bo le. (Puqsu Zunwa Nangbang)