Joqmyo yam ma gi gungdu atoq ma joq e su ga dvo lui, ungkau ma gi nye dik le, haumu ungkau lvum nye zhang gi, nganung gungdu wangzan qo ma shutshai bo dik le ga, xisu dut zhang gi xi ao ma dai dvo le zangsun zoze xi bve anum yvang zo ri ge le.

     Zan wui le lvomo 1qap eq lvomo 2qap gi lazan gu ma zhe ngam yamyoq ngvut ra, nganvung mingdan ma e mvanhaq poqnoq chi ya qo mai dai ri gi“ngamsoq eq nyesoq lviktai lvum”yvamyoq ri ngvut le, mausoq zhe ngam u gi nyesoq myvang lo be ra ga mu, ngamsoq xi gimyvo wo lvoqngam zhang sheq, nyesoq xi lawan wan wo lvoqmyvang lui, tangzan le wangzan qo ma bvunwang wo cuq ging le ga. Gakun le chi sira mo bve gva dvo gvo e 《Hongdi nuijin》ga e wangzan mausau paqzhvi buk ma daidvo gvo ri“nyuqnun yoq eq zan yam ma gi ungkau nye ze zo, jvishu yoq eq joqmyo yam ri gi gung wo lvoqngam ze zo” gvut ra le ga.

      Asu e numnang lawam gi zo qo xi ma lago ason zhe mu ungkau lvoqnye lui, nvutpu huihui ga nyiwui le、qising sing le、nvikzhum yo le、pyidum no le、myin ri awo yvup le dut mu azhung zhung no ri dat toq lo ra. Haumu, joqmyo yam eq jvishu yo ma, qiwa loqwa nye le、myoqdong ma nye no le、myoqzhi huihui ga nyiwui le、nvut huihui ga mu anum izhvam shuq nau le、qiloq shogvuq soksok gvut goq⁃ gang le、qising sing le、awo yvup、hai za ma ri ajvang toq nau le dut zhang gi gungdu ma ngamsoq ban toq lo mu ngvut le ga.

      Akun, gungdu isu dut zhang zoshuq qo kisu zo ri ge ra lvu? 1、Myiwa tenmendung ga zhung chi eq chin wuibvuq bvuq zo ri ge le, tenmendung 60che、chin 100che hohen dvo mai, tenmendung chi ri jvuimu awing zhin yu lui chin eq wuibvuq mu, napjvo yvup dvoq lo zhang zozo gvut ri ge le. 2、Gandihong chi eq wuibvuq bvuq zo ri ge le. gandihong chi zhvoq lui awing 150haushen hen dvo mai、chin 100che ri wuibvuq bvuq ge zhang，gandihong chi wing hut gvat mu lvunyvo zo zhang ge be. 3、Beqhoq wuibvuq zo ri ge le. Beqhoq azhum zhvoizhvoi za e 50che、chin100che、 lagok shatang lazvui hohen dvo e mai，chin ri hi wuibvuq bvuq lui, nyoq lo zhang beqhoq dumchang gvat mu nyoq zhang，lagok shatang gvat mu ge zo be.

     Gungdu lvoqcham lvoqngam ze xi 3zhung wuibvuq anum wo zo nyi zhang, nganvung gungdu lanyi toq lanyi ge lo lui, nviksoq sup ri ge lo le, xibve zo mai lai mu miyu ma gi ao ma daidvo ze xibve zo ri joq⁃ myo lamyo lai gvilvang gung anye e wo lai le.

     ① Nonau. Gakun le chi sira bve dai lo gvo ri, nonau gi byugung ma wo lvoqcham rang wo rva qo ma gewang bo le ga, ximai laimu, nonau gi byu gungdu ma shogvuq zhvutzhvut dut qo ma ri gewang bo, ungkau ma singu singzvut lvoqzhvut qo ma ri gewang bo le ga, zhe gi, myin ri awo yvup, yvupmoq moq, wum abo paqpaq ga, ulvum laqam ma za no dut zhang nonau shuq ri zhaq ge le ga. ② Myiwa mying mai guji ga e zoze xi zo ri gungdu wangzan gvanghing qo ma gewang bo, sing gvumbvai bve ma no toq lui pyidum no ri ge, myoqzhi wupwap ga lui uwun wun ri ge, myoqzhi migva gva ri ge, nopyo mying ri ge, zvut gvumbvai bve no lui qungzvau zvau buibu toq ri ge, ishichui no bo mu izhvam myo shuq nau ri ge，gungdu yo e ri ge le. Gu⁃ ji ri wuibu eq nyvunshuq le, wuibvuq bvuq zo le, woqsho eq zhvoq zo le gvut ri zhaq ge le ga. ③ Myiwa mying mai ganbui ga e ze anum zhvoq zo ri zhaq ge le, asu e nyauson myvang bang gi shauzo ra le. ④ Myiwa mying mai yin-e ga e maujon pyu xi zo ri ri ge le. Yin-e maujon pyu xi zhvoq zo ri gi qipam ri ge, nviksoq sup ri ge, qung zvau zvau e ri ge, loqbve soksok dut e ri ge、usong song e ri ge gvut gewang myo dik le. ⑤ Shogvuq zo ri ge le. Qindai byat le chi sira Wang Mungyin dai ri, waq shogvuq zo ri gi gungdu shogvuq ri ge lui joqmyo ri zo ri zhe ge le ga. ⑥ Kangwa shi zo ri gung chamcham za ga le, gungdu ma sui ri wo zhatluq mai, gvumbvai sing bve ma ri gewang bo le, xi mai, gung zonye dvo bang zo gvilvang ge mu gi, joqmyo yam ma gungnye lui nvomun sui toq bang zo ri ge le, dum ngvutzhang kangwa shi xi zo ri gi suimyvang no bo bang bve myo zo gvilvang ge le. ⑦ Byvetsho zo ri byu gungdu lvoqngam qo ma gewang bo le. Joqmyo yam ma byvet⁃ sho ri myi yinyin mai zhvoq zo ri ge dik le. Gung nye bang gi huqong、chang、lason、hu、 zhipyik、bago、zhapshi bve shau zo ra dut le, age zo le shi gi lizhi、lungyen、lyulen、shipung shi bve ngvut ra. (Puqsu Zunwa Nangbang)