Myin ri yvup dvo ra hima wuinye eq qi nyvun mu yvup dvo zhang, gungdu lazvang e wangzan paqzhvi gi, hikun le azhvi awvoi bve mai se lo e wangzan paqzhvi ngvut le. Joqmyo yam le myin ri wuinye eq qi nyvun mu yvup dvo zhang zhe, tangnyi yvupdvoq lo ri gungdu lazvang, la gungdu e nyenye za ga nyingon mu le. Yinnan wangzan laigva long ma loqsang chi sira bve dai dvo gvo ri, qi anum wo nyvun zhang la gungdu e suiyui ngon, suimyvi zhvung ri ge, ungkau ngamsoq ri wo kat toq byvam mu, gungdu nokat wum zhe tan, gozhung nosoq hai awang lo ra mi- dvu ri wo tangzing le ga. A-o ma loqsang chi sira bve dai dvo gvo e joqmyo yam ri qi kisu gvut nyvun ra qo chom wuwu shang.

　　Myin ri qi nyvun mu yvup dvo zhang gungdu wangzan e gewang 4qo mai ge dai ra:

　　1. Myin ri awo yvup zhang, qichi wuinye tum ma luqgok zo gvat dvo lui, qi nyvun izhvang luqgok zo ma nangsut gvun zhang, situt sitat ga e imyit wo num lo lui , yvupsut doqwang eq lui za wo yvupmyvi e mai, yvupmo wo myi le ga.

　　2. Myiwe wui joqmyo yam ma gungdu suijam suiyui ayo lui, qiloq zhvuizhvui ngam hai dut e kun, myin ri yvup dvo ra hima wuinye eq qi nyvun mu yvup dvo zhang la gungdu e suiyui ngon mu qiloq yvangbau dat nye lo le ga .

　　3. Myin ri yvup dvo ra hima wuinye eq qi nyvun zhang, qiwa mai gungdu qo chin doq bum lo e suicho byvung mai gunggom sing-u singzvut bve zhe wo shui nye zham wang lo mu, gungdu wangzan qo gewang zhaq bo le ga .

　　4. Ulvum no su, wuinye 40mak nye gu e qichi tum ma nayi 14-20minik gvo nyvun dvo zhang, ulvum no dvo e ge byuq le. Xigi haimu lvu ga zhang, qiwa mai ulvum zhe chindoq lo e suicho byvung bungbyo lo mu, ulvvum ma e suicho duingon, suicho ma te bum e suizhap arvang wo yui toq byvam mu ngvut le. (Puqsu: Zunwa Nangbang)