Qi nyvun ri gewang zhaq bo le, asu e a-o ma dai dvo e no bve bo byu gi qi alvum ge nyvun ngvut ra:

　　1. Nviklvum、unuq suicho no bo bang qi alvum ge nyvun. Xizhung no bo bang qi nyvun ri aqing myang shoq age nyvun, izhvam lvum nye gu eq ri age nyvun. Haimu lvu ga zhang, xizhung no bo bang izham lvum nye gu eq qi nyvun zhang, gungdu suiyui lawan lui suicho wumlai aluq dut e mizho, myoqzhi mvungmvang wupwap ga uwun dat wun lo le. Haumu nviklvum、unuq suicho no bo bang qi nyvun ri izhvam 40℃~45℃gvo nye gu eq nyvun, nyvun e aqing gi nayi 10minik gvo nyvun zhang ge be.

　　2. Ishi chui no bo bang qi alvum ge nyvun. Ishi chui no bo bang shogvuq taptap za alvum wo dut lo e mizho, gobang zvomra nye te wo jo e wuibu yvangmoq awo jo dut le. Haumu qi nyvun wui lvum nye shoq gvat nyvun mu, tangma gi qi lvoq nyve cheq hai lvang dat dut le. Dum laqo gi, ishi chui no bo bang dam lvoq cheq zhang yage wui dik le, raurau awo yage zhang zhe, dam mai godvu mo wang lui adut ra dut gvut, qi pyit byvam gvam lvang dat zhe le ga.

　　3. Myiwa mying mai “jinmequzhang” ga e suicho bung no bo bang qi alvum ge nyvun. Haimu lvu ga zhang, qi ma wuinye nyvun gvat zhang suicho zhe bunggvo lo mu, suiyui lawan lo mai dum awo yuirot toq lo dut e mizho, suibvat zhi no zhe te eq zhe tu dat dut le ga. Haumu suicho bung no bo bang wuinye eq qi alvum ge nyvun ga.

　　4. Qi yozheq bang bve qi alvum ge nyvun. Haimu lvu ga zhang, wuibu eq qi nyvun ri qi ma e no baumvui zo laming e do myin lo mu, laming zhe sai yozheq lam lo le ga.

　　5. Zoshang wui qi alvum ge nyvun. Zo- shang wui hai no za abo zhang qi adat ngam, zoshang qi ngam e za angvut zhang wuinye eq qi nyvun no amu, nyvun zhang zoshang e qiwa shogvuq yvam zo lvang dat zang nyung nyve byi le ga.

　　(Puqsu: Zunwa Nangbang)