Gonyen yam zhe lo be, banshoq bang hai ara wo gvut zhe qo gi, nyingon yapkap e igvun gvut qo eq isut igan ding qo ngvut le. gonyen yam ma myi alvoq shut kisu wo gvut zhe ra lvu ga zhang, sikung mau myisat jedap mai gonyen yam myi sidiq qo 8kat daitoq jvo dvo bigvo.

　　1. Yvum ma myi chung ri bun sidiq ra le. Yvum ma myi chung ri sidiq mu chung man, zangzhvoq wap ma e zaumyi、wuizhvoq myi bve ban chunglai tang lago myvi dvo, yvumkau yvumbvan bve sutsat agvut, welam toq angvut zhang yvup dvo ra hi ma myibo teptep qom myvi dvo, mangzo zoshang ri myi sidiq qo lago mvoqshit, joqgang myiqom、 myipan、myilvung bve ma mebu age nyvinhui, myi daplui ze zhoq zhang ma myikek age bat, yvuppyang nyve e myidat myang shoq age pong dvo, mvaunyve jap nam ma myi nyinduq ze age dvo, zhungzhung myi gam sidiq qo woshoq gvut zhe ra dut le.

　　2. Zeung zhang ma myi bun sidiq ra le. Bvoiwang buinyi ri, gaizhang ma azing ze bvobvo za dai ung yan bum gvo mu, byu agon zhvinzhvap wang bum lo le. Asu mu gaizhang ma myisat kingze qom dvokum byi mu, anum gechung ra su gvut migum saibyi nyi, gaizhang muzui bang ri myisat paqzhvi mvoqse byi, myisat mu wunzui byu ri pyai nyvi byi gvut ra dut le. Gaizhang myipang qo eq myisat modo laiqo age byi lvoqcau, zeung jap dvo yan、zejai zereng byvang dvapshit e laigva long、myibo lvozo arvang dvap yan ri, myisat kingze eq myipang qo dvunshit lvo ri age ngvop zang nvang, ungze bumzang dvo wap ma myi age chung. Gaizhang ma azing ze wui e bang gi, byumyo zhang zhe wang lo eq luiyang dintoq kumdong eq myisat kingze kama zhoq e hi wu mizving dvo ra dut le.

　　3. Rungwap ma myi bun sidiq ra le. Gonyen dauno gvun ra hi ma, rungmu zui bang ri myigam paqzhvi ladam mvoqshit e mai, yvum ma nyi dvo、ze toq wui wun、welam toq nyi wun ri myi sidiq ra dut e qo daisan jvo. Rungkau myi shuk qo ladam shui zhep seng byvam, achung ra e myidat banshoq qom myvi byvam, rung ma myishut mu zung wu byu nyvi dvo gvut ra dut le.

　　4. Nowum lvom zhang ma myi bun sidiq ra le. Duqsat jujin(酒精) bve pyup e kun, myiqom yam、myidat qing coq zhang、myidat qing chin dvo e aujvo aukoq bve zhoq zhang、myidat pong zhang eq myvi zhang dvepdvep ma jujin age pyup, pyup zhang myiduq wun dat duq lo le. Nobyu nyijvo zhiwo、nogam chi tau zhang、wumno ya zhang bve ma reng e myisat kingze dvodvo byi, myisat kingze zungwu byu eq myiwon zhiwo zhep wu byu pyai nyvi dvo ra dut le. Chirung kangmo ma ri myipang qo rotyang tong dvo nvang, nobyu nyijvo lvum ra dut mu myvi dvo e kum, myishut mu hai toq zhang lawan wo tem pong ra su gvut dvo nvang ra dut le.

　　5. Datlveng myi bun sidiq ra le. Dat- lveng gi byu nyi e wapkau、zhvinzhvap qolai zhang、kumdong yam ka age dvo byvam dvo, kadu ka myiqing chin mu datzang zvo zvung dvo age gvut. Dum ngvut zhang datlveng manau gvut age pyoq zvumsai, datzang shi- lvai shoq age zvo myang byvam dvo, dat zumtang ma ri age zhvun wang.

　　6. Welam toq wun ri myi bun sidiq ra le. Modo gvon su modo cu gvat cho eq myidat cho bve anum bun zhep wu, modo zung su gi nyebuq lui ze wun lui modo age doqzung. Shiwa modo、maudang、myita bve zung e kun, lawan pangtoq kumdong、myisat kingze、kohot dong batput wazung xibve kama zhoq e wu mizving dvo mu, myishut yubak hai toq zhang, chungze qon za yu chung mu azo ngam batput pangtoq lo mai, myi wo sat zhang dum tem sat gvut ra dut le. Yoso ka lam gvun wun bang, yoso ma myi age mut, nyvabvok tang age du qo dvo. Zo yvup、ze wui、sup gvun hai gvut ri, myi sidiq qo teptep gvut ge dvo zhang ma wang ra dut le.

　　7. Cusoq myi chung ri bun sidiq ra le. Qingyam dvu mu myisoq lai e noijvot cho changchang ma myisoq zhvum azhvum e zhep wu nyi ra dut le. Myisoq zhvum e myang zhep toq zhang, myisoq pong zhang lawan tem myvi byvam, kohot lai pongsan, myidat pongmyvi zhang ma azang tung, myiqek abat gvut, yvumbvan danlan chin ma toqyap mu jewut zhvinvan 119 tem bat, awui ayam nyi dvo bang ri pangtot nvang gvut ra dut le. Myidong ma nyi bang eq muzui bang cusoq myi age chung. Myidong wuiqo ma cuwing bvat hai age shoq qo. Myisoq zau myvi e kun, myisoq cho hi myvi e mai, myibat ze dum myvi gvut ra dut le.

　　8. Myinye mirop dat qi ra le. Myinye mu toq zhang, jewut zhvinvan 119 lawan dat bat, Myipang pang ri zhoang e qo dat pang, igvun ze ri anan gvun、dat zumtang azung、yvummyvang mai abyam jo, myipang pang e dvunshit qo chang, angvut zhang myigam muzui byu dvunshit dvo e qochang mu, byu- chang byu a zhvinzhvap、a nangnvap lvum ra su gvut azo ngam bo pangtoq ra dut le. Wo pang ra adut e kun gi, myikau myisham lvam e shut kum eq kohot myvi mu, izhvam zhum e da-u buimo、mebu arvang eq jamdong qom cau byvam e mai, gvangqi zhvinvan bat lui, gvangqi je bve ri imyit mu za lang dvo ra dut le.

　　(Puqsu Pauqi Mudvom)