Qi nyvun ri zhoang dong nyvun ra dut le, asu gvut zhang sheq gungdu wangzan qo gewang la bo le. A-o ma loqsang chi sira bve sonzving dvo gvo e qi nyvun paqzhvi zo 5kat chom wuwu shang:

　　1. Zang zoji eq qi age nyvun. Numnang wui lawam myintang zang ban zo tang wam ji e ayom shi ma, nvutzhui qiloq myoq chi uzhvang wuinye eq qi dum nyvun gvut le. Loqsang chi sira bve ga gvo ri “Xisu gvut ri age” ga. Haimu lvu ga zhang, zang zoji tang gungdu ma e suisoq suiwum banshoq wamdau ma zo lvung dvo e ze luimvun qo jin ra dut mu, xi-u su ma wuinye eq qi nyvun zhang, qipam ma e ze lago awo luinvuq gvut langjvo lui, qipam hi ten lo mai gungdu a wangzan gvut dat shizvang le ga. Haumu zang ban zo tang nayi 1qing gvo ma wam yom zhang sheq wuinye eq qi lage nyvun le ga.

　　2. Qi nyvun izhvang godvu gvut ri age. Qi nyvun izhvang laigva wu、loqpyo zhvinvan wu、datwup arvang wu gvut zhang, gungdu wanzan qo age. Haimu lvu ga zhang, laigva wu、loqpyo zhvinvan wu、datwup arvang wu ri imyit zhvung zum mu, unuq ri lving wu ra dut le， unuq lving zhang suisoq wum ri chung ra dut dvo e xi-u, wuinye eq qi nyvun gvat zhang suisoq wum qi qo dinjo lo mu, unuq ma likdik sui aluq lvang dat dut le. Haumu qi nyvun e u gi, unuq lving no mu e ze hairi abyam zui gvut, yumyum za e mikon hai jo gvun ri sheq ge le ga.

　　3. Qi wo nyvun eq lawam yvup ri age. Haimu lvu ga zhang, qi wo nyvun eq gungdu zham shoq awo nye wang lo shi, qi ban nyvun tang lagung du e sop nye gvat gvun, angvut zhang lazup zo solving gvat gvun gvut lui yvup dvo zhang sheq, la gungdu e nyenye za ngvu zhe yvupngon le ga.

　　4. Qi nyvun izhvam lvum nye ri age. Qi nyvun ri izhvam kimyvo nye gu eq nyvun ra lvu ga zhang, qi nyvun ri izhvam lvum nye gu eq nyvun zhang, qi- yin qi goqtoq bve ma e suicho bungbyo lawan lo mu, gunggom ulvum bve ma e sui ri qi qo dinjo bum lo lui, ulvum qo lawan awo din dvau doq lo zhang, huthat ga uwun dat wun le. Haumu qi nyvun e izhvam nyesoq gi 45mvak gvo zhe zhang ge be ga。

　　5. Qi nyvun ri lvum myang shoq nyvun ri age. Qi nyvun ri aqing kimyvang zhe nyvun zhang sheq ge ra lvu ga zhang, loqsang chi sira bve ga gvo ri, nayi 20~25minik gvo nyvun zhang ge be. Qi nyvun izhvang mikon jo gvun、bvoming ming gvun gvut zhang, abun nung ma aqing kimyvang lai lo e ri abun mu le, xisu gvut nyvun myang gvun zhang, gunggom suiyui lawan lui uwun dat wun lo le, gungdu shogvuq ma ri gewang abo ga.

　　(Puqsu: Zunwa Nangbang)