Xingon zvutmun no zang tang ma gungchi chi ri ge le age le ase lui myitmyo bum numnang wui gi zhaq myo ra.Xingon zvutmun no zang tang ma gungchi chi ri gi gege mu zhe nolai lo le ga dai bum e mizho, Bejing Yu—an(北京佑安)chirung dat daplvum noya wap ma Li Tungcen dai ri : Xingon zvutmun no zang tang ma gungchi chi ri no zhe lai le ga xigi logidat paqzhvi eq ri a ang, gungchi lui gazhung no ri adat toq lo, no dvo gu ma gungchi ri son azhe lui nolai lo zhang gi bo le ga.Xingon zvutmun no zang tang ma gung nye bang 、gungdu paqpaq ga lui nyiwui bang、lagung zhvin no bang、no xidap lui wumlai aluq mu nyiwui bang gi gungdu ahan chi gvut son ra dut le. Zhe yvang gi mangzo bve, yvumsing gungdu kisu dut ri ase bang zhe gi yvumbyu eq zungwu dvo kun chi ri sheq la ge le, akun zhang sheq haimu atoq wo fang le ga.

　　Shanghai Zhungyi chi dvanmo zhong nolai bang ri ya qo zhepgon rung suwun Fang Bangjang sira mo qanglu gva bang ri daijvo ri, xingon zvutmun no zang tang ma, gung nye dvo le aqing ma gi gungdu ma izhvam ri ban toq lo byuq lui gungdu yopyop paqpaq ga yvang nyiwui le, xisu gvut no dvo kun gi gung age chi ga.Danggve xingon zvutmun no zang tang ma gungdu nyesoq 38.5°C a-o gvo nye, angvut zhang nye lai be tang ma gi gungdu kama hai aga lo zhang gi gung ge chi le ga.

　　Asu a-o ma dai dvo su dut gu u gungchi chi zhang gungdu wangzan qo dat shut- shai le ga.Kisu shutshai bo le lvu ga zhang gi: Laqo gi lvum nye gu izhvam eq gungchi zhang shogvuq ma shupdap dvo le cu bve ri chi qo yvam le、shomau bvunwang bongha lo le dut mu shogvuq huihui congcong yvang dut lo ri ga.2qo gi lvum nye gu izhvam eq gungchi zhang singzhvung ma wolai ri bo lui, lagung ma shogvuq suicho bongha bum lo zhang, lagung ma sui gi shogvuq qo zhvat yui toq bum lo mu, singzhvung ma sui abo dut lo ri ga.

　　Akun gungchi chi ri kasu son ra lvu ga zhang gi:

　　1. Gungchi ra hi ma gungdu lvoq nye ra dut le.

　　Gungchi ra hi nayi 15fun gvo ma, gungchi ra wuinye zo xibve hi hen dvo le、gungchi ra wap ma nyesoq pong hen dvo le gvut, yvumkau ma nyesoq 25℃ gvo hi sai hen dvo e mai sheq gungchi la ge chi le.Gung ban chi tang ma ngvut gvilvang gungdu ma dap dvo le wozoq bve lawan wan sut hui yvam, ucam lawan wan mvut hui le gvut gungdu aloq jo zhang sheq cammyvi amyvi, no ri alai wo dut le ga.

　　2.Gungchi chi aqing ri age lvoqmyang.

　　Nganvung kama haizhung nozo abo bang gungchi chi ri gi nayi 20fun gvo wo chi le, asu nodap be bang gi gungchi chi ri aqing lvoq dot ra dut le, za angvut zhang gungdu ma buibu ban toq lui wumlai zhe shau lo byuq le ga.

　　3.Gungchi chi ra hi ma wuinye hi myomyo shuq hen dvo ra dut le.

　　Gungchi chi ra hi ma wuinye myomyo shuq ri gi lada zhang gimyvo shuq gvat le angvut, lada lazui gvut myo shuq ri sheq la ge le. Gung ban chi tang ma ngvut gvilvang wuinye zo myomyo za shuq gvat zhang sheq gungchi kun toq byuq e izhvam dum wo shuq hang yu le ga.

　　4.Zomut gu ma gung age chi.

　　Gungchi chi kun si-up si-dau ga zhang gungchi chi ri gi byu gungdu ma wumlai ban toq byuq lo le, zhe yvang gi wamgvom ma gung age chi, haimu lvu ga zhang, wamgvom ma gungchi ri wumlai aluq lui dat ma leng lo le, wum abo le uwun wun le, lvang dat shima lo le ga, haumu zomut gu wamgvom ma gung age chi.

　　5.Gungchi chi ri qi hi chi mai sheq ulvum chi ra le .

　　Joqmyo yam ma gi joq le mu shogvuq ma sui bve shupdap bum le, nganvung su wui nye gu eq ulvum e chi gvat zhang gi sui ulvum qo doq bum lo le, lagung ma shogvuq bungdau gvo lo le dut mu sing 、unuq ma sui aluq lui uwun wun, sing ma si-up si-dau ga nyiwui le ga. Xi mizho joqmyo yam ma gungdu chi ri gi qi ma hi chi lui, qi mai lagung nye lo su ga zhang ulvum chi ri sheq gungdu wangzan qo gewang bo ri ga .

　　6.Gungchi chi kun kum kihot bve myvi dvo lui age chi.

　　Joqmyo yam ma jolai mut le mu numnang lawam gi joqlai awang shang ga kum、 kihot bve dvingdving myvi dvo lui gungchi chi le, asu xisu gvut chi ri gi wangzan qo ma shutshai zhang bo le, zhe yvang gi soqbup zau hai eq izhvam nyve chi bang son ra dut le, soq kamai alai toq ri gi yiyangfatan(一氧化碳)ga dusoq gungdu ma zhupwang yu lui byugvang lvang dat jo ri ga.

　　(Puqsu Zunwa Nangbang)