Myiwe layuq ngvu e gi paudvap yuqge myang ho zhang sheq byuze ong e son le

　　Myiwe layuq byuze labyvat ma zhe ong e mu gi hai ngvut le

　　Xisu mangkoq tunghui zhang gi a qum lvum e byu myit dvudai e qo a qumlvum e ngvut le

　　Layuq yuq dai le gi

　　Yvumsing e mumo myang zui zhang gi byuze ong e mu be ga

　　Layuq yuq dum dai le gi

　　Byuze zhe ong e mu gi paudvap yuqge myang ho qo ri ga le

　　Layuq eq layuq byuze qo a qumlvum e ngvut le

　　Kalvum qo qin so ngvut gvilvang a shut

　　Myosu byu wu toq le gi

　　Hi le qo eq gvelvum wu zhang

　　Tang le qo gi myiwe layuq mai daigvat zhang zhe aqak midung mu ngvut le

　　Paudvap e yuqge layuq gi myiwe e myoqdong zhvoi qo ri dat wo liklai byi le

　　Dum ngvut zhang myiwe e ajvang ri wo liklai byi le

　　Myiwe ri gi lo myvi mo ga le zhvat

　　Asu e paudvap e yuqge tunghui zhang sheq gi nang ri zhe ri zhe myitnu myitnvam dat dut lo le

　　Paudvap e yuqge gi nang e imyit ajvang wo lvoq dingman byi le. Nang e myitngon qo ri zhe ri zhe myo lo le

　　Paudvap e yuqge gi yvumyo igvun sut wo ding le

　　Yvumkau igvun nguingon zhang haison hai wo dut le

　　Yvumyo igvun layvum sut ding a wo ding e gi

　　Myiwe layuq bau za eq a wo migum nyi e ngvut le

　　Yuqge ri bi migum gvut ra le

　　Layuq yuq yvumtu igvun gvut tang ma yuqge myiwe dat nyingon le gi paudvap yuqge myangho mu ngvut le

　　Yuqge gi yvumkau dong ma kummo zing ngvut le

　　Haumu yvumkau dong ma wo dvu wun waq ra le

　　Yuqge layuq yvumsing myiwe ri kisu gvut e qo gi yvumkau dong nguingon a ngui e qo ma zhaq ga le

　　Myiwe gi yvumtu mu be tang ma

　　Hai myit a myo e qo za o nau le

　　Nang ri ga mu qizvung myvang ri a zvung loq

　　Wuiyvau yvau mu nang ri zang gaizvo mebu chi byi wang lo be

　　Hauzhang nang gi myitse ra be

　　Xisu e myiwe ri gi byuze labyvat zhvitmyit byi ra le

　　Myiwe gi yvumkau igvun dong ma o nau e qo a myo

　　Yuqge layuq e myihung hung qo ri za ga le

　　Yuqge gi myiwe ri zhe hung zhang zhe yvumkau igvun dong ma zhe rapra le

　　Paudvap yuqge layuq ngvu e gi yvumkau igvun dong ma wo banban myiwe bau ri za a dat du byi dvo e ngvut le

　　Zhe gi zhunzo ri dong a dat chung e ngvut le

　　Paudvap e yuqge gi myiwe ri paudvap se le

　　Myiwe qo mai dat bimyit zhe byi ra le

　　Haumai myiwe ri dat zhvit le

　　Sumzvoq zhvitmyit kau ma

　　Yuqge wui o nau le gi qamsa myit za ngvut ra

　　Myiwe wui o nau le gi zhvitmyit za ngvut le

　　Yuqge layuq myiwe ri zhvitmyit migum zhe zhang

　　Yvang e muzo ngvut mu gi yvumkau igvun dong ri bi dat nyi ngon dik le

　　Yvumsing myiwe ri zhe dat shijo zhang gi yvumkau igvun ri zhe dat shui nyi ngon le

　　Paudvap e yuqge gi nang e muzui qo ma girum dat bo byi le

　　Myit bo e paudvap yuqge gi nang ri labyvat byuze dat shui ze ngon e lo le