Miyu ma, nganvung son ri zoshang wui gi lvugvun ze ri zhe ngui e be ngvu, asu nga- nvung myit shut be, zoshang wui gi inu iwa lanyi bui ri aqing laqing gvo yu toq mu, yvangmoq eq bviming ming gvun, myit minghui lvum gvut ri sheq, yvangmoq zhe ngui zhe gibu e langvut le. Haumu, inu iwa gvut bang, lanyi bui ri aqing lason yu toq lui yvangmoq eq myithui lvum ri lage le, hausu gvut ra ngvut ri gi a-o ma daidvo e su chom gvut shang.

　　1. Lago jo byi. Zoshang wui lanyi bui e lvugvun, angvut zhang zhongjo mu yvum dvau zhe lo e kun, yvangmoq imyit kau ma gi inu iwa ri daijvo nau e azhung zhung mu zhaqmyo be ra, haukun zhang nang anu awa gvut su, aqing kimyvo jin gvilvang laqing no mu, yvangmoq nang ri daijvo bve lago jo byi ra dut le, hau angvut ri zoshang wui zhaq dat son yon le.

　　2. Yvang ri qe-on byi aq. Nang e qe-on dang ri kimyvo kidviq za e muzo za ngvut gvilvang, zoshang za wo gvut toq lo zhang gi yvang ri qe-on byi ri gi, yvang e loqmu zhe gvam zuiyang e lo le.

　　3. Agon kinvik yo. Adviq azo za e mu ri re agon nvikyo gvut ri age, zoshang wui ri gi lago mvoqjvo ra za langvut le.

　　4. Zoshang wui eq bidai biming gvut aq. Zoshang wui hai mu hai nang ri lo daijvo gvun le ma, lada da gi nang ri yvang eq bidai biming gvun zhang ri bo le.

　　5. Nang zhvitmyit yu toq aq. Lada da zoshang wui yvumkau wang lo zhang myoqdong azhvoi lang, yon e su dut, haimu ri agvam gvut dut zhang, nang mowui gvut bang zhvitmyit yu toq lui, yvang hai ri myitmyo bve lago myigvun gvut aq, haumai kisu gvut sai gvut ra lago mvoqjvo gvut shang.

　　6. Nang imyit eq za zoshang imyit ri ashau e gve shang.

　　7. Zoshang wui e dang ri jo hang yu aq. Zoshang wui gi azhoq e azhe shi e bve ri zhaq gvam myitgvun son gvun le, haumu yvangmoq gi haumyvo angvut gu ri ngvut le, haumyvo adut gu ri ngvut le, hau myvo adut gu ri dut le ga dat dai lo le, haukun zhang nang yvangmoq dai e dang ri hausu angvut xisu angvut ngvu ki e daibyi, haimu lvu ga ri zoshang wui e unuq kau ma ze gi banban angvut azho e abo, yvangmoq myit e su myitgvun nvang shang.