Dang tang angap ma Myauchen gi yvumsing adong dong ri awo lang gvun loq chang wang dang lo mu, loqpyo ma gi ngun depzo lvum ze byvabyva waq byva shit dvo mai le dai e gi: “Ngo depzo lvum  paqzhvi 5zan e sai mvoq lo be, akui nga igvun isang le dum dep dvau yu be ra, Donwan nang arup dep la ra luq?”ngvu ga.Donwan lvang awo dvu dai shi ma, Chen Yauzu eq le kum e gi: “Kau zo e, nang Myauchen e mirop ma a e ge jo loq, lazan ma ngo ri depzo lvum qo za moq zuq wang lo mu, kinyi buinyi la zhe byuq e ngvut le”ngvu ga.

　　Myauchen gi xikun sheq Donwan yvum ma mopyi 2yuq le lung dvo gvo labun myang gvat e ga, mopyi xi 2yuq  ri re Chen Yauzu piwui yvang ngvut dvo lang e la se ga. Asu e gi o ngvut mvo ngvut ri awo gon gvun loq, yvang gi Donwan ri wo dep ung shoq ga za la myit dvo nyi alo. Donwan wo zhang lai le zhung angvut loq ga myit mu, dep lvum zhang dep lvum be ga yin yu    izhvang “Hai ri dep lvum ra?”ga myi zhang , Myauchen dvu dai e gi: “Xidam nang gi nang e igvun isang dep aq, ngo gi nga loq dep le, kisu mu ngo dum dep sum zhang gi nga loqyo loq zan   pyit byi ra”ngvu ga.

　　Xisu ga dai doqdan lvum dvo mai gi dep wang lvum lo bigvo. Myauchen son za gi 5zan gom wa kat mvoq lving zhang gi yvang sheq ung nvo ngam shi mvau dvo be, asu gi ladam ri adep ung mu, hoqyo yo mu haukun yvang sham bvaq mo eq yvang loq waq zan pyit qo gvat ra hen be. Asu e,  Donwan eq   Myauchen ri sham dap lu yvam byi lui,  dang maq mo lakun dai gvat gi “Ha i gi agvut ra kai!”ngvu ga. Hautang ma gi Donwan gung shut puq lo mu,  Chen Yauzu ri dum dai e gi: “Yvumsing e, ngo gi nang eq zan pyit qo dvo loqyo loq be! Kinyi buinyi nang depzo imyit za wo lai yvam be ra ngvut zhang, nang e igvun isang dum wo ung dvau lo byi be gi, ngo ri ngo lo ra qo ge lo yvam bikai ma” ngvu ga. Biwo jo dvo bang jo mau le moqmoq be, lago sai myi wu shi ba ga ri gi Donwan zhe ri zhe gungdu azvai zo gvut dut yvam lo mu, loq su gvut yvang pyeq dut lo mai Chen Yauzu loqdung dut dvo jo ma dap yvam lo be.

　　Hautang mai gi Chen Yauzu yvang hikun depzo lvum qo ri moq zuq lo ja, bvan ung seng pong zo qo za dat moq zuq wang lo be. Chen Fugui ri yvangzo byu qo dat lvik so byuq zhang yvang noya ri aya e ge yvam byuq be. Myauchen gi piwang du bo mu ban byit jo yvam bira loq abyit jo yvam loq wo dut be. Haumai gi yvang ri su gvut agvut mu,  awam gvut toq loq ge qo dat so lo byuq be.    (Banbe)　(Puq lazhang su:Doqshi Labau)