Lazan ma ri, Lalaq eq Mupyu datshin wu zhang ma se lvum gvo e ga.Hau mai yvangnvik gi xi su ngvu midat lvum dvo gvo ga, “Lvomo lving zhvoi myin Mida bau ma myvanggam zing wang ma dum hui lvum goq ”ga.Amyang su ga ri, yvangnvik midat lvum dvo buinyi zhe dvo lang bigvo ga.Hau mai, Lalaq eq Mupyu gi yvangnvik dai lvum dvo myvanggam zing wang ma dum hui lvum bigvo ga, hui lvum gvo mai gi iyuq hoq imyit bo lvum mvau, gabve minglvum gvun, yvumsing yvum ma zoshuq igvun kasu sang jvo lvum gvun, wuiwo langtang eq myvanggam lving quq kat lvum gvun, abun su ga ri, maukung ma hingsu duqbo lvomo zo ri myoqhaq wang lo nyi be, zhvoiyung jvizo ri lacham eq lacham pang lo nyi be.Yvangnvik gi shijvep eq zvumdvap dvo ja, gang ra rau a wo gang lvum dut lvum dvo bigvo ga. Myoq gi myang qang lo, gang gi anyen gang lvum dut mu, Lalaq gi Mupyu ri yvangmoq yvum zhe lo de gvat dvo mu, yvangbau yvum qo dvau lo lui, yvangnu yvangwa ri myi dung lo shang ga lo pye mu, kamyvang abo shi ma myi dung lo bigvo ga.Mupyu gi Lalaq ri lvom myang gvat eq gibu le, hoq imyit bo mvau le mu myoqdong gi gvokchui shi bom ja zamzam ne, Lalaq ri myoqlap haq lap mvau be ga, qahau myang pye lvum mai gi, iyvum bang qo xi kat wo pye rot lvum gvo mai gi, Lalaq eq Mupyu yvumtu gvut bigvo ga.Buinyi lanyi eq lanyi lai lo nyi be, Mupyu ri zoshang ku ra buinyi zhe lo nyi be. Haumu yvumbvan atoq, yvumkau wang ma za xe sopzui xi sopzui gvut lui yvumkau ma lung sau dvo, yvang yvumsing po muzui e su gi gamgung gamsang ri ri advau lo manau gvut lo nyi be.Asu e, Mupyu gi yvang yvumsing po ri alum zhing amu, kasu lvang agvut shi yvang yvumsing po hai dai hai zhing dvo be, xi myvo lumzhing le u ma, myvipo dai lo“Myizhvu sumzan langzhvu labyvat” ga mvomyi hi le nyi be.

　　Napsun maubo lo soq ma, Mupyu yvangbau yvup dvo le ma, wamdau langpuq no lo lui, yvang yvup e he qam qo Lalaq ri daijvo ra ga sop gvat zhang, zhvuizhvui ngam ga sop dut gvat be ga.Haumai yvangbau yvup zhang ma buibu gi wui yui jo ja no ngau leq dvo zhang, hu wap mai yvangmvoi din wang dang le lo lui, xi su ngvu dai be ga,“Dumo oi, dumo oi, amvoi wa ma zoshang dat ku su nang numo Mugvoq mang ri e shui din lo ba, juq imyit kibo o”ga dai eq pyizvang langdvu lui, ajin amvat gvut jin tung shi tung lo be ga.E wo shui lo mai, kamyvang abo shi ma zo- shang nyi jo ma,“ngvi ngva, ngvi ngva”ga isum kun ngau be ga, zoshang nyi jo laqing myit gvo ma, zoshang yvangwa Lalaq gi ishuq wut mu na bva wang lo be ga, wang lo zhang, yvangmyi Mupyu zoshang ku dvo lang lui, gibu shi mu i na gu, yvum bvan ma woq du sat lui qut zhvoq le, myamzui ma shojvuq yu lui changpyik tung nvang le.Zoshang yvangzhvi wuikung gam eq Mutuq mang gi yvangnvik yvangshu ri mying myving jin na shi, wa ma zoshang le be ku bang gi, zoshang lvok alvok e minglvum gvun gvut nyi bigvo ga.

　　Zoshang gvo lo mai gi, yvangzhvi yvangwvoi ri nyvi dvo byi mai, yvangnvum gi naptoq myinwang gvut muzui lving wun bigvo ga.Napnap lanvum e laha toq lo gvizhang gi, laha muzo chom zui agvo kai ga zhang gi, dat ngvut ra, Lalaq gi lazup ri ashen buishum kau za din wang wang gvut, Mupyu gi mu noqnoq ri go zui bamzui zui na shi mvau, myiwe latang qom zui toq lo e gi waqngan layuq myvo shoq wo zui shi dvo be.

　　Lada ma Mupyu luqbyvoq luqche mo yam zhvut leng le gvut myikzui lagva mo e yu lui lai le zhvikzhvik gu, yvumkau wo wun zhe wang mvau lo zhang, yvanglang eq dang lvom dum tau le gi,“Langdang shi mu mang ri, akui nam zhe gi kama nunglang eq e nyi gvut lvu? Numnang bve zo rau ban mut shi ri nving”ga dang ko mo lvom dai be ga.Hau mai Mupyu gi, bimyung le ma zangwui lo dum gai ra dut, Lalaq eq dang ko lvom dum dai lui, awom zo dut dang lo be ga.Mupyu dum wo dai lo zhang gi:“Nyvo, myiwe bve bum ka- myvo bum din lut, kung kamyvo kung chang lui dum ban dvau lo ri, nang gvilvang gi, chuqkung ma buibik shoq shi qaq leq dvo mai zhvau gi myiwe bve ri kuidvau lvom chang ngat e gi”ngvu dangtang angap shi ma, Lalaq eq isum da le nvuq dang lo be ga, xisu gvut Mupyu gi lada le dam age shi ma dam dum dapdap gvut lui, zoshang bau chung lui yvangmoq yvum pyang lo le ga zhang, qolat mai Lalaq eq ushuq mai noshe ja dum langtung she jo lolo gvut lui, yvangzo ri kamyvo myit abyit gu nyvi qo dvo lui, yvangmoq yvum ma lo nyi dvo zhang, kamyvo nyi abo shi ma yvanglang gi gayuq myiwe zo dum lo shui nyi dvo be.Haumai, Mupyu gi yonbyvi byit mu lui, mungyvum bang ri shui chung mu, dang lo pyit byvam be ga.

　　Dang wo pyit lvum gvo mai gi, Lalaq gi yvangmyi zhe eq nyinyi buibui wa gung ma za lam yong lving wun, zoshang mangzo ashoi ri gi zangwui ri lago agai zvo, zui gi ase, zo gi se, kamyvang abo ma, yvumkau wang ma howa nuqpyi ri ban zo bai byvam be, woqbyik su katbyik, igvun dat gvut gu Mupyu eq lvang byoq gang lvum gu yuqge eq wa, ungsoq ri abo, waqsu yvumkau ma za zobung lung dvo gu myizhe zo eq zhe kamyvang dat wo nyi bvong ra. Mupyu ri ja shonshon nang gun gvun, myizhe zo gi yvum igvun lvoq mvuq dvo, yvum ma gvangcoq ngun ri kau wun chung mu, dvung pang lam be.Gonyen nam gi zhe lo, Lalaq gi yvang myizhe ri chang kat ho ri amyang ho loqmu, gonyen nomo myin hai myit hai arot, myintang tum mu Myiwa mying mai loqgo ga e ga e bausat chi shuq mu nvut mai zvumyvup gi gotgot mui shi byvam be.

　　Zoshang gi shijo po eq yvangnu yvangwa ganglvum lo mai ago ngvok zo bidut le ma, yvangwa dum muishi byvam mai gi, lvum yon lui ngau lvang adat ngau lo shoq. Mu xi lai mai gi, zoshang gi yvangzhvi yvangwvoi eq asho awui binyi be. (Lapai Nangseng)