(Shata 3 nhtoi 15 ya na do) № 4 Pati masha ni lawu de na ahko ahkang lu ai: (1) Pati a seng ang zuphpong ni lom, pati a seng ang rung laika hti, pati e sharin shapan shalik ai hkam sha. (2) Pati a zuphpong hte pati a shi laika pati a hkumhpa laika hta, pati a tara manghkang ni hte seng ai lam dinglun lom. (3) Pati a mu bungli a matu tsun shon hte so ginron lam tsun shapro. (4) Pati a zuphpong hta sakse ko hkan nna pati a ganing re hpongchyom hte ganing re pati masha ni hpe daru sharin, pati hpang de madu lit la ai hku nna ganing re hpongchyom hte ganing re pati masa ni tara jahten ai lam alun shapro, tsun shaprong, tara jahten ai pati masha hpe ari jo na lam shok hpyi shon, aya hte n pre ai ganbu aya jahkrat kau shing n rai galai kau na hku shon tsun. (5) Dodan ahko ahkang, ra lata ahko ahkang lang hkrat wa, ra lata hkrum ahko ahkang re ahko ahkang lu ai. (6) Pati hpongchyom hta pati masha ni hpe pati asat tara shut ari jo na lam dinglun dodan shing n rai hpaga shagrin ai shaloi, tinang madu ko nna hkan shon dara lom na ahko ahkang lu ai, kaga pati masha ni mung shi hpe sakse hkam lom dara lom rai mai ai. (7) Pati a ga makyit hte tara hpe n bung ai myit lu lam nga yang, nan nan hkan shatup sa wa na nhkan e, myit lu lam madat ton da ai lam tsun lajin na hta n-ga, madu a myit lu lam hpe pati a lahta tsang hpongchyom ko nna ginjo de du hkra mai shon tsun dan ai. (8) Pati a lahta tsang hpongchyom de hpyi shon, hpyi shok, shok shon lam tsun shapro yang, seng ang hpongchyom ni lit la ai hku mahtai jo na hpe no hpyi shon ra ai. Pati a ganing re hpongchyom ko nna ginjo du hkra pati masha ni a lahta de tsun lai wa ai ahko ahkang dom kau ya na ahkang n lu ai. № 5 Pati masha jashon la na rai yang, mung masa shatang hpe nambat langai ko bang da ra ai, pati a dap kying ko lai ra ai, langai ngai di jashon la ai tara hkan shatup sa wa ra ai. Pati shang hpyi shon masha ni, pati shang madu kam laika ka, pati masha majing marai lahkong e shachyen ya, pati dap kying ko nna myit jahkrum da nna lahta tsang pati hpongchyom ni hkro ya rai ra ai hta n-ga, yu chyam ten laman hta yu maram ai ten mung no lai re hpang she pati masha majing mai byin tai wa lu ai. Shachyen masha ni go pati shang hpyi shon masha ni a myit jasat, ron lai, hkum hkrum hte mu bungli galo sat lawat hpe a tsom jep maram yu nna, shi hpe pati a tara ganu hte pati hpung tara tsun byan dan, pati masha a lakung lama, lit hte ahko ahkang tsun gabra dan ai hta n-ga, pati hpongchyom hpang de lit la ai hku mung no tang shana ra ai. Pati dap kying salang rapdo ko nna pati shang hpyi shon masha hpe hkap jashon la na rai yang, pati hpung gata shinggan seng ang shawa masha ni a myit lu lam ni hpe hkap madat maram yu nna, atsom jep yu nhtom, shadang du sa yi nga jang dap kying zuphpong gaba de bai shalai dat ya nna jom dinglun ra ai. Lahta tsang pati hpongchyom hpyi shon masha pati shang na shong e, masha dat nna shi hte ga shaga hkat nna, bai no jep sagon yu ai hta n-ga, shi hpe pati a lam ni mung no chye jat la shangun ra ai. Alak re masa hta, pati a ginjo hte mungdo gaba, madu uphkang ginra, tengtok gon hkang myu hkan na salang rapdo ni ko nna galang ta pati mai jashang la ai. № 6 Pati yu chyam masha ni pati donghkon a man hta pati shang ga daka ra ai. Daka ga ning nga ai: Ngai tinang kam nna Miwa mung suthpom pati hpung shang nna, pati a tara ganu hpe myithkrum madi shado, pati hpung tara hkan, pati masha lit gun hpai, pati a ga makyit hkan shatup, pati asat tara hkan shaja, pati a machyi shim mu jashim, pati ko sadi dung, kyet shop ai hte muhtam, suthpom masa a matu prat tup shakut, galoi nhtoi hta mi rai rai pati hte mungchying sha ni a matu si hkam na hku shajin ton chyalu rai nna, prat tup pati hpe n gumle na nngai. №7 Pati yu chyam masha a pati yu chyam aten go laning mi re. Pati hpong chyom ko nna pati yu chyam masha ni hpe kyet shop ai sharin shaga jep sagon yu ra ai. Pati yu chyam masha ni a lit go pati masha majing ni hte maren re. Pati yu chyam masha ni a ahko ahkang go, dodan ahko ahkang, ra lata ahko ahkang hte ra lata hkrum ahko ahkang n lu ai hta lai nna, pati masha majing hte maren sha re. (Bai matut hti ga)