Mangshi myu mare hte deng 5 daram tsan gang hkat ai Mangshi gat mare Nahoi mare salang rapdo La-man gahtong na asak 78 ning du sai Sam amyu htunghking hpun krok sama hpaji masha Htin Len go, shi a nta ndo ko mano manang ni hte ta hpaji shingjong hkat nga ma ai, dingla ni yong hpun kawa hte magup sumhpa galo chye ai hkrai rai ma ai. Htin Len chyu she kaga ni hte n bung ai, shi go gaji gawoi prat ko nna matut shchyo yu wa ai Sam amyu ni a hpun krok sama hpaji chye nga nu ai.

　　Daining asak 78 du sai Htin Len go 1980 ko nna gawa ko Sam amyu hpun krok sama hpaji sharin hpang wa sai, maning moi ning gawa n nga mat ai ko nna she gawa a lit matut gun ai re. Htin Len a gawa go Sam amyu htunghking hpun krok sama hpaji ko na mungdo gaba tsang hkrang n mu kunghpan hpaji hkringhtong shachyo masha rai nga ai, hpun krok sama hpaji ndai matut shachyo yu wa ai Htin Len ko du yang lak 4 rai sai. Hpaji ndai ganing rai galo hpang wa ai go, aten nau na mat, labau laika hta mung n ka da re majo, n lu sagon mat sai.

　　Daini na prat ningnan hta, jak hte hpun krok sama yang she lawan nna tsom mung tsom ai, raitim Htin Len go gaji gake ni zon rai ta hte hkrai no krok sama nu ai, ta hte krok sama yang she Sam amyu ni a htunghking hpaji hkringhtong dagro lu, shadan shaleng lu rai nga ai. Htin Len shi sok masha hpe tsun dan ai, jak hte hpun krok sama yang lawan ai, tsom mung tsom ai, raitim jak hte krok sama ai go, htunghking ta hpaji hpe n lu shaleng ai, anhte Sam amyu ni a htunghking hpaji shamat kau na tai ai nga ai. Htin Len a kro hta htunghking hpaji hpe ra machyi to nga ai. Hpun krok sama na matu lang ai hpun ni Htin Len sa tam kran wa ai hkrai re, hpun krok sama na hking rai ni mung shi madu galo la ai hkrai re. Hpa majo nga yang Sam amyu ni a htunghking krok sama ai ko lang ai hking rai gat de n dut ai.

　　Ta hte krok sama yang go grai lanyan ai, shata lahkong masum rai yang she hpun sumla langai mi lu krok ai majo, manu loi hpu ai, hpun sumla langai mi gumhpro lap 800~1200 daram re. Htin Len krok sama ai hpun sumla ni go moi na hkrai n re, shi mayu e myit sumru yu nna, ningnan ai hpun sumla ni mung sumru shalat nna krok sama ton nu ai, shi go myi hte mu mada ai lamu ganghkau ntsa na hpro tsom ai samui, hkarang hkan kagat hkom ai dusat dumyeng, hka gata hkan pyau hkom ai nga, hpara jong gata na sumla re ni hpe krok sama ton nu ai. Htin Len shakut sharang let galo ai majo, Sam amyu htinghking krok sama sumla grau nna hkum tsup wa sai.

　　Htin Len krok sama ai hpun sumla grai laklai ai hkrai re, pro di yu dat yang nsa kap ai zon re, hpara jong na sagya, ntsa pyen malen u, hka gata na wurat wutsang, maling gata na chyahkyi shan nga, shata hti laika ko na agui, awa, ayu, anga, sharo, htanglo…… Hkum hkra chye krok sama ai, hpun sumla dai ni madung go hpara jong hkan shadun ton, nta hkan ton rai ma ai.

　　Hting Len tsun ai:“Ngai madu myit yu nna krok sama yu, manang soi ton ai hkan soi yu nna krok sama yu, hpara jong hkan na sumla sa yu la nna krok sama yu rai nngai”nga ai.

　　Htin Len loi myit lo ai zon nga nna shi sok masha hpe tsun dan ai, shong de hpun krok sama sumla grai dut sha n yak ai, ana zinli hkron bra wa ai ko nna, dut sha yak mat sai. Raitim hpaji ndai go Sam amyu ni a htunghking hkringhtong hpaji re majo, dingyang no galo shakut na, n shakut yang go mat mat na tai ai, dai majo n lu dut sha tim shakut na, n lu dut sha jang go nta ko makoi ton na nngai nga ai.

　　Htin Len tsun ai:“Shong de go grai dut sha n yak ai re, ya go n lu dut mat sai, n lu dut sha tim no tsun ndau hko shabra na, madu ra sharong ai rai hpe go dingyang matut galo ra ai, n lu dut sha tim hpang de ngai shu ngai sha ni mung sharin ton nna, dingyang no matut galo shangun hkyem nga ai.” nga ai .

　　Htin Len a matu nga yang, hpun krok sama ai bungli grai ba ai, gumhpro go gade n mu tam, dut sha shara bai n nga, hpang de ganing rai wa na re mung n chye rai nga ai, bai nna hpaji dai sharin yang aten na na sharin ra ai majo, ramma ni hpaji sharin la kam ai nau n nga wa sai. Hpaji dai go shong de nta masha ni hpe sha sharin ai, ya Htin Len hpaji dai sha sharin kam jang go gadai hpe mung sharin ya na nga ai.

　　Htin Len a gashu Htin-ai Han Gui shi sok masha hpe tsun dan ai, mayu e yi sun hkauna de bungli grai kyin timung, rau ai ten hta dui la ko hpun krok sama hpaji hkan sharin nga nngai, ngai mung Sam amyu hpun krok sama hpaji grai sharong ai, hpaji ndai dingyang no matut shachyo na nngai nga ai.