Madu dap shiga Shata 12 nhtoi 10 ya shani Mangshi shayi num hpung ni“Kun dinghku yak hkak ai ma gaji ni hpe ninglum sa ya”ngu ai shawa akyu shalu shamu shamot hpo galo nna, hpong shingra ni ko nna kumhpa jo ai nba, palong gaba, saboi ton wanpu re ni hpe ma ni a ta ko sa sa ya ma ai.

　　Pati labau sharin lam hte shabung gapyon nna,“Ngai mung shawa matu shingteng bungli galo”ngu ai shamu shamot sung chyung hpo galo. Dai ning shata 9 hta mungdo gaba shayi num ma gaji majan jat wunhpon hpung ni ko nna woi galo, Hten Sin shawa akyu shalu pinra ko hpo galo ai alu mahkong shamu shamot hpe mungdo tsang shagu na shayi num hpung ni ko nna kyet shop woi ginron hko shabra sa wa ai majo, tsora myit rong sut hpaga rung hte hpong shingra hpung lam mu lam shagu na ni e n-gun gaba hte madi shado ai hkrum nna, Alu mahkong lam grai ong dang ai hte lu galo shabyin la sai. Mangshi myu shayi num hpung ni mung mungdo shayi num hpung ni gumhpon hprai hparan ai ko hkan nna ningshung lado ninglum sa shamu shamot hpo galo rai, jongma ni jong ko lang ra ai panyep, nba hpyi, saboi ton wanpu hte tsora myit rong masha ni tatut nan htu ya ai za htu palong ni hpe ma ni a ta ko nan sa sa ya ma ai.

　　Shamu shamot hta, shayi num hpung na muhtam masha ni go Mangshi Ta hpaji jong ginju hte Funghpyin gat mare Chyeyen mare salang rapdo rung ko kun dinghku yak hkak ai ma gaji 19 ni hpe sa yu gawan da nga ai. Ganu gawa, sara, ma gaji ni hte hkrum htinglet yu nna, shanhte a nga pra lam hte sharin shapan lam ni san sagon la, ma gaji ni a nga pra lam, sharin shapan lam, myit masa lam ni hta hkrum gadup ai mayak manghkang ni ko lade nna shanhte hpe shadum jahprang, lam madun rai, hpaji atsom sharin, jongma manang ni hte a tsom hkuhkau, ganu gawa hpe chyeju dum, madu kam sham myit sharot, wuhpung wuhpong hta shang lom ra ai nga hpaji jo ma ai. Ma gaji ni mung hpong shingra na tsora myit rong, masha ni hte atsom hkrum jahta lu nna, hpong shingra hpung lam mu lam shagu na ni shanhte hpe sa jo ai ninglum hkam la lu ai majo, htom hpang de hpaji atsom sharin, pati hpe chyeju dum, pati a ga madat, pati ko hkan nang tik tik rai na ga ai nga myit madun ma ai.