Htingra ta hte Yinam ta du shang wa nna loi lum wa nga sai hte maren, shara shagu nampu nampan pu an wa, kahkum kumgyin ni myin wa sai. Shanju sha let kumgyin si sha chyai rai ai ten du sai. Rai yang, ndai ten yang go ningtuk shakap nna kan mase lo ai lado mung wa rai nga ai majo, lu sha n sadi nna kan mase na tsang ra nga ga ai.

　　Nhpa hpe go “Ningtuk shakap nna kan mase ai” ngu ai rai?

　　Ningtuk shakap nna kan mase ai ngu ai go apu ko amyu myu ningtuk ganu shakap la nna byin ai apu ana rai nga ai, ga shadon ningtuk ganu hte gaju jai zon re kap nna, kan machyi, kan mase rai chye ai hta n-ga, hkum gahtet, kro galau, madon rai chye nga ai. Shaning tup chye machyi bu ai, machyi ai aten ko hkan nna aten nhtoi 14 ya gata ko go chyahkring chyahkra gan machyi ai hpan mi, matut manoi machyi ai hpan go aten nhtoi 14-29 ya, bai 30 ya a lahta de machyi ai hpe go gaungui sha machyi ai hpan hku garan ton nga ai.

　　Htingra ta nnan shang wa ai lado ndai hta mayu e mu ai ningtuk hkronkap kan mase ana go gara hte nga ai rai?

　　(1) Sha Mun Gyin Pu hpye ana (沙门菌肠炎)

　　Ana ndai go shaning tup chye byin ai, yinam ta hte mangai ta ko lo byin chye ai, masha yong ko chye byin ai, grau nna sak laning mi ma gaji ni ko grau byin loi nga ai. Ana kap la ai hpang hkying hkum 6-24 ko go ana no up rong nga ai ten re， machyi bu wa ai hte go kro galau, madon, kan machyi, kan mase rai chye nga ai, grau nna ma gaji ma chyangai ni kan mase nna galau kya mat rai chye ai. Nam hkom yang ahkyi loi htoi shing nrai tsit ai ntsin chye sa, magyep rai hte asai mung chye lom nang nga ai.

　　(2)Ningtuk ganu mago ai bo apu hpye ana (弯曲菌肠炎)

　　Ana ndai bo go masha hte dusat ko chye machyi ai, masha ko grau machyi kap loi nga ai, ana shaning tup chye kap ai, yinam ta hte mangai ta hta lo machyi chye nga ai, ana ganu up rong nga ai ten go 3-5 ya daram rai nna， machyi wa jang go hkum gahtet, kan mase, kan machyi, bai nna madon ai mung nga ai, machyi ai shara go shadai grupyin htingkun machyi nna, nam sa yang htoi ai ntsin sa nga ai.

　　(3)Lun jong ningtuk ganu apu hpye ana (轮状病毒肠炎)

　　Htingra ta hte yinam ta hta, Lun jong ningtuk ganu apu hpye ana sak gaba masha ni ko grai byin loi nga ai, loi nhkring ai ana grai chyam chye ai, ana ganu up rong aten go 2-3 ya rai nna, kan mase ai madung, dai ko kro galau, madon, kan machyi, n-gun nrong rai chye ai. Ma ni go hkum gahtet nsa lam machyi chye rai ai. Nam sa yang htoi ai ntsin sa nna loi magyep ai rai hte asai hkan lom chye nga ai.

　　(4)No Ru ningtuk ganu apu hpye ana (诺如病毒肠炎 )

　　Shaning tup ana ndai bo chye byin ai, madung go sak gaba sai masha hte jong lung ram ai ma ni ko byin loi nga ai. Dai majo, ma shapan rung, jong hte gumgai dingla maka rung re masha lo zup ai shara hkan zinli zon chye byin nga ai. Ana up rong aten go 1-2 ya rai nna，madung go madon, kan mase, kro galau, kan machyi chye rai ai, machyi masha nkau go bo machyi, hkum gahtet, gashung gari, laso lasa machyi rai 2-3 ya chye machyi ai.

　　Ana ningtuk ganu ndai ni go gara hku hkron bra ai re ta?

　　Ana ningtuk ganu ndai ni go machyi masha hte ana kap ai dusat ni ko nna hkron mong chye nga ai. Maza mat ai lu sha hte hka ntsin, shing nrai machyi masha ni a jit hkyi hte madon shapro ai rai ni, ntsom ai ta, rung rai hte lang rai re ni hku nna chye hkron kap nga ai. Dai kon lai nna, ana ningtuk kap masha ni hte nyi gahtep yu, ga shadon machyi masha tsang, machyi masha hte shat rau jom sha, shing nrai go hka wan hkoi ze jom lang rai yang hkron kap loi nga ai.

　　Gara hku ana htang maja na rai?

　　(1) Ningtuk sat satsang, ta shin shaja rai ra ai. Aten masat nna sanseng galo ningtuk sat ra ai, yang (氯) rong ai ningtuk sat tsi hte nhku gata na rung rai ni hpe ningtuk sat shaja ra ai, grau nna go dingngam masop hkra ai shara hkan hte shatgok lang rai, hpajet re ni hpe hpunlum shaprut la nna ana sat ra ai. Dai hta lai nna go shat sha na shong, nam sa ai hpang lata shin shaja yang mung ana ningtuk loi lu htang nga ai.

　　(2) Ntsin gatsi nmai lu ai, lagyi laga tsu mat ai rai nmai sha ai. Ana go n-gup hku sha bang la ai re nga ai hte maren, nbung nsa gahtet wa nna kumgyin hte namsi namso sha yang asan sha gashin la ra ai, hka na nga hkatsu mari wa nna atsom sha tsan gashin lajang ra ai, aten na na nmai ton ai, lu ai hka go sanseng shatang du ai mari lu, shing nrai hpunlum shadu lu ra ai.

　　(3) La ma nta ko chyahkring chya- hkra apu hpye ana machyi masha nga yang, shi hpe hkrai lang rai masat ya nna nta masha hte nhkra hkat shangun, madon, kan mase rai ai hpang lang rai ni hpe ningtuk lawan sat kau ai hta n-ga sanseng lawan galo kau ra ai.

　　(4) Ma yu lakon rung hte ajong zon re rung dap hkan ana htang hpaji lo lo hko shabra, sharin ya, laksan masha hprai ton, jahpot shani hkum atsom jep, ana machyi nna jong nsa ai jahpan atsom matsing ton ra ai. Apu ana hte seng ai ma gaji hte jongma ni hpe lawan jep shapro nna gang ton kau ai hta n-ga ningtuk sat mu atsom galo ra ai.

　　(Mungdo ana htangtek ginju)