Asak gvo lo zhang, mizving zhe ri zhe atan loq dut bum le. Asu, nganvung igvun kau zoshuq mai ge lvoq rva yu le. Xi jiro, Muigo《Lvomdvang》laigva buk ma gva mi- zving dvo gvo e advo myvi lui ra paqzhvi 5qo chom wu wu shang.

　　Unuq mai myo mizving, datze ri ka de lum

　　Yishi dat unuq chung、zhvinnvan mai azing gva mizving gvut bang, aluq lawui gu gi mying gva mizving dvo zhang ma za apong wu ri, yvumsing zoshang e zhvinvan angvut zhang muzui wap ma zhvinnvan lvang awo mizving byu bo le. Muigo Jalifuya dvanmo zhong ma sara mo dai dvo ri, unuq gi qiloq ri wo lu byvam e ze yvang ngvut le. Zhvinvan angvut zhang dat unuq ri za yishi de lum man zhang gi, unuq ri dat wom lo byuq le. Amu lamu ri awo myitbun dut e kun, unuq mai lago za dvau myit gvat wu aq.

　　Nyigung ri shau yvup

　　Yvup luq zhang mizving ri zhe tan le. Samlik toq dvo gvo ri, mizving zhe tan zhang nyigung ri yvup gvolvang zhe ngon le.

　　Nyiwui gung byvan

　　Gung byvan zhang gungdu ma danbezhi lazhung ge dut le mu, unuq ma zang lvoq dvan le. Gung ladam byvan zhang unuq la zvui zhe jeng lvuq le. 2019zan ri samlik toq lo gvo ri, lanyi nayi 30minit gvo qilveng zhi bang gi, gung abyvan bang toq ma mizving zhe tan le ga.

　　Loq ma lamu za zui

　　Lada dam ma azhung zhung mu zui bang wu dvo ri gi zhaq wo zui be su dut le, asu gi zuimu loqtang adam lui zui e ajvu atoq. Lada dam ma azhung zhung muzui kun, unuq wolai de lai lui, wo mizving ra ri azhang gvam mizving dut le.

　　Lazhung zhung zoze yishi zo

　　Zho ang dong wumman gungdu ma lvoqlvung gvat zhang, byu gungdu ma mizving qo ma gewang bo le. Danggve shiwing、zangsun chui angvut zhang chang bve yishi zo zhang gewang bo le.

　　(Puq su Mulat)