Umbung sun dat zomui le

    Zan yam ri gaizhang ma umbung sun zhaq ung bum le. Umbung ma myiwa mying mai wuisinsu eq kongwuzhi ga e zhung myo lui, zo gvolvang nunu nvamnvam za ga zhaq ngvam le,haumu umbung sun gi zam yam ri ori zhaq gvam zo e zangsun jai lazhung ngvut le. Asu e, kasu mu zaqjau umbung myi ban byvik byuq gu zang ho hai mu zhang, zuitoq lo e umbung duqduq ko le. Ungbung atoq byvam mai za byam wu gvat ri gi, chuizhung umbung eq lazhung za, asu gi ko gu e umbung ma gi datmui zhung bo le, muizhung xidvan ri kingking nye rukruk zhvoq gvolvang awo zhvoq toq byvam, haumu,umbung sun gaizo ri lago yvang sidiq ra dut le.

　　Yvumkau dong ma umbung zangsun zhvoq zo ra ngvut zhang, agvuq zvut byvam e mai sho eq hi yoq wu aq, duqduq ko zhang gi dat mui le, lanvut ri age zo. Ko gu e umbung ri lawan wan yvang dubyvam ra dut le. Ko gu umbung zanghum wu e shambyen eq bvantau ri lago zhigvum nuqguq yvang chisan byvam ra le. Kasu mu zang zo shut e ngvutzhang chirung ma hanhan yvang e ra le.

　　Azui zui gu e yangyi age zo

　　Azui zui gu e yangyi angvut zhang agvuq bannyui gu e yangyi ma, myiwa mying mai lungkuijen(龙葵碱) ga zhung bo le, xisu e zolvung gvat zhang qipam ugvoq ka lo zang ngat dvan mu, gungdu shoji showang dat bying le, nolai bang zhe soq shetum byvam e lvang bo le.

　　Amyving gu e miqi sum age zo

　　Nyuinyui gu e miqi sum ma ri azui zui gu yangyi ma bo e dvan muize一一Lungkuijen(龙葵碱)ga zhung bo le. Zo gvat tang ma nviklvum lvu、pat、gungdu shogvuq dikdik me、nvutwui dui、uwun wun bve dat dut le. Azhum zo zhang zhe juq ra mu yvang dat toq le.

　　Candvu age zo byu bo le

　　Layuq yuq e gungdu ma myiwa mying mai mui ga e lazhung abo mu, candvu zo tang ma pun dvan suiten ana dat toq le. Xizhung no gi lagung du e wum abo、suishau、myoqdong hui、sing wam、pat、nye bve dat dut le, lawan wan aqi ya zhang gi sui de shau byuq mu myoq byuq byvam e lvang dat bo le.

　　Anve nyvoq gu e nuqjvui age zo

　　Anve nyvoq gu e nuqjvui ma myiwa mying mai zaugan(皂苷)ga zhung bo le, xizhung zo zhang dat mui le, nvenyvoq gu e nuqjvui ma gi muize abo loq.

　　Bup gu e chang age zo

　　Bup gu e chang gi Ai ana ze myiwa mying mai hongzhang su(黄樟素)ga zhung bo le, xisu e chang zo zhang sing Ai ana、qungdong Ai ana dat toq le.

　　Zhangnyap zhum age zo

　　Zhangnyap zhum ma myiwa mying mai zaugan eq senwujen (皂苷和生物碱)ga zhung bo lui dat mui le, asu nyeze eq tunghui zhang gi muize wo byi byvam le. Zhangnyap zo ra hi ma rukruk zvu gu wuibu eq zhvoqsat byvam、 angvut zhang cu eq nve nyvoq lui zo ra le.

　　Honghua ban sunzhum age zo

　　Honghua ban sunzhum ma myiwa mying mai qushuixenjen(秋水仙碱)ga zhung bo le, xisu e zo zhang dat mui le,xizhung zomui zhang gi qungdong huihui ga、nviklvum lvu、pat、wam no、wam shun bve dat dut le.

　　Haumu, xisu sun zomyo zhang gungnye、suiqi sho、sui i zhit bve dut mu no lvang dat lai lvuq le, qushuixenjen gi izhvam ma nyvun、zhvoqnyvoq zhang wo lvoqpoi byvam le. Haumu, Honghua ban sun zo ra hi ma, izhvam ngam eq nayi 2qing gvo nyvun byvam e mai, nvaunvau za dut shoq zhvoqnyvoq mu zo ra le. (Puqsu Mulat)