Hai ri gi dengere ga le?

　　Dengere gi denge ali nobau lazhung ngvut le. No xizhung gi jvanggva eq ngat lui gungnye、shochin chin angvut zhang lagung du ke no, zan yam ri myo toq e jvang eq ngat dvoq lvum no ngvut le. Dengere no bo be mai gi layoq zo ya zhang lawo ya ge le, no shi e byu shau le. Miyu mai dai gvat zhang laban labat gvo ya zhang ge be.

　　Dengere no gi kamai dvoq lo le?

　　Dengere no midung gi jvanggva mai dvoq le, jvanggva gi dviqdviq noqnoq pyugva gva dut mu, nganvung yvummau ma ori jvanggva ga bum le. Jvang xizhung gi we shoq adang lving, 50myi gvo ma za danglving le. Nyiqui ri toq lo lui byu ri ngat nau dik le, napjvo nayi 7-9qing jiro eq myintang 5qing gvo ma myo toq lo le, myintang dvum gi nap jvo dvum le toq ma myo ra.Dengere ali nobau gi jvanggva xizhung eq ngat dvoq byi e no ngvut le. Nobau bo gu e jvang eq byu gungdu ma sui le zhvup shuq e kun nobau le zang dvap byi dvo be. Xisu e jvang lawam gi jvang-u jvangzo ri lvang nobau dvap dvo byi le. Dengere no gi yamyoq no ngvut ra, Yinnan ming ma zankang mo lvomo 5qap mai 11qap jiro ma xizhung no myo toq ra, lvomo 7qap mai 9qap jiro gi xizhung no myo toq gvung e yoq yvang ngvut le.

　　Xizhung jvang kasu zhowo ma myo ngat nau le?

　　Jvanggva gi wuitum dving dvo zhang angvut zhang wuitum zo ma myo nyi nau le. Danggve sikqung、wakang、sikzhvung、yamkau、luqqung、dongkop、yezi gvop、lvengqi gang、angzhvin yam bve dveq bam gu zhang ka myo nyi nau le. Jvang lazhung zhung gi yoqu、 myinun tum、wuitum ma myo nyi nau le, jvang-u koq toq tang ma myo danggo nau le.Jvanggva xizhung gi welam nyi wun zhang myo ngat nau ra, sui zhvup nau dik e u gi myintang nayi 4qing mai 5qing jiro ma, lailui napjvo nayi 9qing mai 10qing jiro ma ri zhaq ngat nau le.Awui ayam 50-100myi gvo ma danggo nau le, 200myi gi adat dang lai. Haumu, jvang xizhung danggo nau e u awui ayam 200myi gvo e zhang ma myo ngat nau le.

　　Dengere no dap zhang kasu dut le?

　　Dengere no gungdu ma zaulvung dvo aqing gi 3-15nyi gvo bo le, myopyang gi 5-8nyi gvo bo le. No xizhung midung gi ao ma dai dvo qo myo ra:

　　1. Likdik gung nye le.No e 1-2nyi zhang gungdu nyesoq 39℃-40℃ mvak dat nye zhe mu, laban labat gu zhin abyit gung nye e adat num dut le.

　　2. Sumwo ma myo no le.Ulvum ma no、myoqwui kong ma no、shoji showang wuizvum ma no lui, lagung du e wum lacham ri abo dat dut le. 3. Shochin chin le.Xizhung no toq tang 3-6nyi ma, myoqdong、lingzing、wanggang eq qiloq laming e zamzam ne gvut chin le. Yo ngvut gvolvang shoyum gi adat jut, 3-4nyi ma ge lo byuq be. 4. Sui toq le.Gung nye e 5-8nyi ma nvomun sui toq、zuibvun mai sui toq、shogvuq kau ma sui toq、sui i zhit bve dat dut le. 5. Gadong ri dut le. Danggve wum abo、nvik lvum lvu、 pat bve ri dat dut le.

　　Dengere no lai zhang kasu dut le?

　　Dengere no bo zhang 3-5nyi ma no likdik lai lvuq, ulvum langtung no、pat、nvik soqsup、shimoq lo、langtan lo、buibu noq mo toq、sui nyvum jo lo、qiloq langzvup lo、myoqzhi langtung lo mu e naumoq yen no dong lvang dat dut le. Layuq yuq gi qungdong sui toq、 shi moq lo e lvang bo le.

　　(1) Jvang eq ngat mu suitoq、nye dut zhang gi dengere no zong yvang ngvut be. Nye、shoji showang no、pyidum no dut le, asu e showui、qimyoq loqmyoq gi ano. Sui myo toq le, danggve nvo mai toq、pat toq、qung mai toq、sui i zhit、sui qisho bve dut le. Atoq ma dai dvo e 2wo gvo mai sui yishi toq, sui 100haushen lai shoq toq zhang gi, toq e sui dopdop dut lui, hung xibau 20% gvo ri zang nvezhving dvo mu, xexauban dat nyvum lo byuq le. Nobyu layuq yuq gi sui toq e shau gvolvang, sui toq zhang unuq、singzhvung、zhinlvum bve ma ang lui ibyvat gvang yu byvam e lvang bo le.

　　(2)Jvang eq ngat mu shi moq lo le dut zhang gi dengere no yvang ngvut be. No e kun angvut zhang nyesoq nyvum lo tang ma, no likdik dum lai lvuq, sui toq le、 sui zhamzham awo rot dat dut le. Lagung e joqngam, suicho sui yangyang awo rot, sui lai wum nyvom lo byuq mu, sui zhaq dat nyvum jo lo byuq le, xidong dut zhang gi nviksoq sup、 moqmoq yvup nau、ajing aso dat dut le. No xidong lai zhang, lawan wan za aya yu zhang gi, nayi 4-6qing jiro ma myoq lvang dat byuq byvam le.

　　Dengere no kasu bang zhe dat lai lui le?

　　1.No dum dvoq lvum bang.

　　2.Tangnyau no、sui myvang no、gonxin byin no、ungkau zheq、zvautun tun、zhinlvum no bo bang.

　　3.Mangzo、zonu angvut zhang myiwe wui gung wun bang.

　　4.Gungdu myum angvut zhang wumman mila laq aluq dut bang.

　　Dengere no kadong gam ge ra?

　　Akui dengere no gam chi azhoq shi, dengere no gam ra yung gi:Jvang gam、 jvang sat ra le.

　　1.Dengere no zhoq zhang ma e lam gvun angvut zhang hau zhowo ma e nyi ra bang, buloq hing wut lvo hing zvung mu, atoq ma de dvo e gungdu sho eq mebu ma jvangbau lvom chi but ri ge le.

　　2.Nyiqui angvut zhang myin ri yvup zhang jvang sut lvang ri ge le.

　　3.Yvum ma bausat chi eq jvang sat e kun, chi jeq ma gvadvap dvo e yungyoq chang mu chung ra le, zoshang qit ra zhang ma age dvo.

　　4.Welam ma lving wun ri sikgam wang、mvanbvung yam、zum kau buishum zhang ma anyi gvun gvut ra le.

　　5.Wuitum ading nvang, jvangbau myin lui ra zhang ma sanshoq byvam ra le.

　　6.Wuitum azing ho dvo zhang 3-5nyi ma wui ladam tai byvam mu, ho dvo ze amyit lago chi san byvam ra le.

　　7.Dengere no zhang gi cammyvi no、 ali cammyvi no eq qum lo ra, haumu, no su jvang eq ngat wu e su ngam, angvut mu gi Nanmui、Fuizhu、Dungnanya zhowo ka lam wu gu su, chirung ma hanhan yvang e wu nvang e mai, nang xi jiro kabve bve ma lving wu e lago qom daijvo ra le.

　　Dengere no zang zhep toq zhang, kamyvo nyi gvo jvo gvang lvum ra le?

　　Dengere no ga zang zhep toq be ngvut zhang, chirung ma jvangbau gam mu yvang e ya ra le, jvang eq ngat mu nobau yvumbyu angvut zhang gabang ri dvoq byi ra qo sidiq ge ra le, jvo gvang aqing gi 5nyi gvo ra le.No e 5nyi lai, anye lo e nayi 24qing lai be mai gi jvo gvang lvum ara loq.Dengere no bang nye num lo byuq e nayi 24qing lai zhang chirung mai ge toq be.

                               Mau no gam mugon wap

　                       　(Puqsu Mulat)