1.Moqpung zang zo. Bvoiking zhe zhang azhum zhum gvut lui welam ma zang kat zo, agvut zhang buinum byinchang wui eq chomzo zha gvun gvut e zhaq myo le. Xidong gvut ri gungdu wangzan qo ma age, zo shuq asan seng dut le. Diqa gi wum no hai zhoq du dvo u zangbo gam zo ri zhe ge le.

    2.Mausau pyu eq zoze tup jeq. Miyu ma mausau pyu eq zoze tupjeq bang zhaq bo le. Mausau pyu qap wu dvo ri gi zhaq zhvoi su dut le. Asu e, mausau pyu sairvang e kun azhung zhung chi ze zang chung mu, lvulva ze zhaq zang lvoq dvap dvo le. Laigva long ma laigva cham yin dvap e kun, mui ze zhaq zang lvoq dvap dvo be.

    3.Koqzo koizve nobau sat. Layuq yuq gi yishi koqzo koizve ri ipyik eq byvom       byvam zhang nobau wo sat byvam nvo ngam agvo.Chi ma chung e nobau sat juzvin gi 75° zhe le, ipyik gi juzvin 56°ao za bo le, haumu, ipyik gi chichung juzvin eq aqum. Ipyik eq koqzo koizve byvom ri nobau awo sat byvam.

    4.Maqbu lawan wan achi byvam.   Zhvam toq dvo gvo ri, yvum ma chung e maqbu sik laban labat gvo chung zhang, nobau zhaq zang toq byong bum be. Haumu, maqbu eq zangbo sut ra hi ma, maqbu ri hi lago     zhvoizhvoi chisan byvam ra le. Maqbu 3-4nyi gvo ma wuibu eq nobau ladam        zhvoq sat byvam ri ge le.

    5.Wuisen jin mausau eq koqzo koizve sut. Zhvam toq dvo gvo ri,wuisen jin mausau sairvang kun nobau lago awo sat zhom byvam; Nobau sat ge be ngvut gvolvang, wuisen jin mausau zangbo ka qom dvo kun zhaq zang lvoq jvoi be. Haumu, miyu ma chung e wuisen jin mausau eq koqzo koizve sut angvut zhang shicham ma sut zhang, zoze ri awo sut zhvoi e za angvut, zoze ma sai lvoq jvoi yu le.

    6.Shujin eq koqzo koizve sut hui. Nganvung lawam gi langbau wui gi wuizhum su ngam, asan seng su son ngam mu, langbau wui ma koqzo koizve angvut zhang shicham hai byvom chi tang ma, shujin eq dum sut hui zhang, wu dvo ri gi sanseng e su dut le, asu e advau dong zhe zang lvoq jvoi le.

    7.Ban sau gu zoze ri dum zhvoq nyve zo. Layvum yvum ma igvun myvi bve gi zo shen shuqshen man lui, ban sau gu zoze ri rukruk dum zhvoq nyve zo e bo le. Xidong gvut zhang nobau ban wo sat byvam nvo ngam agvo. Chi paqzhvi mai zhvam wu gvo ri, nobau byu gungdu ma wang ra hi mai ban myin zham be, nye zhan dum wo tan mu, nobau ri awo zhvoq ten byvam. Haumu,sunmyit zangmyit azo wo gvut ri zhe ge le.

    8.Shicham bup gu jo yam byvam mu dum zo. Layuq yuq shicham zo e kun, shicham ban bup gu jo yam jvung byvam mu zo zhang sanseng nvo ngam le. Paqzhvi sira mo dai ri,shicham ma bupzheq gu jo yam byvam gvolvang, shiwing mai shichom roq ma nobau ban zang she hang be, nobau lvang ban wo dut be mizho, xisu shicham zo zhang Ai ana lvang dat toq lui le. Haumu, shicham zo ri lazvui zheq be mai gi du byvam aq koi. (Puqsu Mulat)