Gvo bang hi nvikqik byi ga zhang gi, zoshang wui gvo bang wui hi ma hai gvut ra zhang hai bi gvut byi ra le ga lazhvum ngvut le.

　　Gvo bang dui nvang zhang zoshang wui qonqon dvoq dui byi ra dut le, lagon lalang dvung gvut age numpum gvun, numpum gvun su ri gvo bang awu ngui. Zoshang wui gvo bang lang dvo zhang ma so e kun ri, ayau ayeq, ashui ayui age gvut gvun, qidvu zvangyang za gvut lawan so e mu, hai gvut ra zhang hai e bi gvut byi ra dut le. Zoshang wui gvo bang zhvang mai dvau lo kun ri, nungpuq lvik eq myvikmyvak age gvut byvam byuq. gvo bang ri lakun daijvo dvo mu yvoyvo mai nungzut zut dvau lo ra dut le. Adaijvo dvo e myvikmyvak gvut byuq, angvut zhang gvo bang hi ma zut lengqaq shit zhang gi, gvo bang ri akungga e dut le. Dum ngvutzhang, mangzo wui gi zoshang wui toq ma byu pau zhe dap nau le, zoshang wui byumoq zing zhang ma hui e mangzo wui ri loq shijvam lago shui jvam, bviming teptep shui ming gvut zhang, mangzo wui zhaq gibu le. Dum laqo gi mangzo wui yvangmoq ge zvuq e zoshang ge yan odu ori daijvo byi lo le, akun zhang zo- shang hauyuq hi gewang bo dik le. Wumbo ozhaq shi e mangzo wui layuq yuq zhe, yvumsing ngui e zoshang ri gewang zhaq gvut dvo byi le.

　　Zoshang wui gvo bang wui ri ayau ayeq, ashui ayui age gvut shit, kaka nyi wun gvi lvang, gvo bang hi ma wuizo chikchik, myoqnvo zvongzvong, dangnyo sansan gvut shit ra dut le. Qolat welam ka gvo bang wui ri tunghui zhang ri, hi shut han so e mu pau dvap za mai tepdvap e nyo ra dut le. Haimu pye ra dut lui gvo bang suwun wui ri e so hui kun ri, gvo su ri myang eq hi shut han so e mu, loq shijvam teptep e jvam, hai bo zhang hai bilang qangqang e dai gvut zhang, gvo su e aqing alang jvo byi, yvumsing gvut nau e mu ri qonlui wo gvut nvang yu le. Gvo bang wui yvumsing toq dviq su eq yvumsing a-o ma e muzui zhisai bang ri, azhung zhung e gewo wo gvut byi le, zoshang wui gi yvumsing ri gewo gvut byi e gvo bang wui ri, kungga paudvap zhe e mai ajvu ri dat bun ra dut le, akun zhang sheq gvo bang wui e gewang zhe myang lom mu, yvumsing gvut nau e amu lawo gvut ong le. Zoshang wui kaka nyi wun ri, loq ayo la shoq han din wun e gvo bang wui eq tunghui zhang, hi shut han so e mu hai gvut ra zhang hai rau e bi dve gvut byi ra dut le. Gvo bang gvut nvang lo e mu gi yvumsing adat gvut gvilvang, dat gvut byu bi ho byi ra dut le, adat gvut ngvu dvikdvik age he qut byvam. Jinso jinman gvut lving wun e gvo bang wui, nang ri hai agvut nvang zhang gi, nang yvang qoyam yap zhau byi lui, pau dvap myoq eq chang wu de gvat ra dut le. (Puqgva su：Pauqi Mudvom)