Zhvintong Nangmai mewui Zhvintong gvong zhe lo mai, hizhe tangzhe wo zhe lvum e gumang nvikdvang 4yuq bang, laha gitui giyui dum chom yon ngau lvum nashi bigvo. Yvangmoq yvang zvalat yvang zvatang mo bve gi, wumbo uzhaq te jo ri, yvangmoq yvang nvamo myilang shigang lvum lo, chuimo chuizo nyi dut lo shoq batpu zo dvo gvo e ri bve wu don dik lui, myium shamlvap waqsu waq gvut wazung je eq yvumje ri shui mu, yvang nvamo yvum bang midvu Mvanding wa ma e Zautang ri e ho zhapyvam ra ga tingshang nyi bigvo.

    Xikun Zhvintong gvong wazau Zhvintong Zauseng gi, gangtung gangzhap su shui wui hen toq lo e yvanggu Zaulon eq Zauring ri chang kumzing lui dai e gi: “nungnvik gi, awa ginwang ma upkang dvirva byin pye zuppong pong e lo kun bvuq ri nam ri dai jvodvo dang dvomyvi bigvo luq? Haimu toq lo gvi lvang unuq myo lving gveq, imyit age situt laga dvo e nving. Nvamo yvum ma e mu gi ziau Zaudvat yvangwa dai jvo dvo dang ajo mu, dut toq lo e iyon mu angvut gvi ga luq? Akui nganvung zui jin lvum ra mu nving asik za wo cuq hi qo gvat e mauwa asuya zung ge mu, wakau zung ge mu, nvamo yvum bang ri migum mu bve langvut le. Mvanding wa bang ri dimyaq bve eq zhvap gvat, mvoqgvoi, kuizhvun zhvun nyi mu nvamo yvangzo bve yuqge zowui gu ri sat zhvom nvang ra hen nyi le, Zaudvat eq Zauno ri kat ho sat le ga, nga- nvung zhvang ho zhe le lo mu azhung zhung zhiwat le kat wat wun bigvi ra. Haumu, mangkoq xi gi Mvanding wa eq Tingrva gvong ma e mu za angvut loq, nganvung wa ma seng zhe be. Xisu e manglat yuimo nganvung bau za wo peran zhung angvut loq. Myoqhi dve ma nungnvik bi zui jin ra mu laqo gi, xima xisu mu toq dvo e bve ginwang qo jinjin lo bi shitjvo zhe ra dut agvo; iqo gi, Zauno zo ri migum ge ra dut ra, goidvu mu lazvui lvang age sai toq lvuq nvang loq. a sidiq zhe mu mangkoq lvoqtoq gvat gvi ri gi nungnvik ri ho ra, gadvu mu gi awa zuppong ban pong lui dvau lo zhang yvo mai sai pye lvum zhung langvut le”ngvu ga.

    Lungchon ginwang ma pong e nambvat sanghi cik upkang dvirva byinpye zuppong ma, woban gaifang be buitoq qam, buiwang qam, munshut bve ma bumzau Marit bve, Lato bve, Lapai bve, Nkum bve, Muran bve eq tusi bve, shinggan qokang mo ma e byu bve zuppong bi zhe lom agvo. Buiwang qam      Zhvintong gvong bumzau mang Zhvintong  Zauzha eq ga zhowo ma e bumzau bve gi, ginwang upkang dvirva byin pye wap suwun wo be qin gvut bigvo.

    Ginwang upkang dvirva byinpye zuppong ban pong dvom e mai gi, bumzau bve ri laili paqzhvi buinyi 3-4nyi dum sai mvoq bvan byi agvo. Lanyi ma le napjvo ri, jefang jin amu girum zui pung ma laili paqzhvi sara gi amyvu kangmo bumzau bve ri myidam toq maumyvu kung ma laili paqzhvi qom mvoq jvo ra.

    Laili paqzhvi sara dai ri: “nganvung e qiwang ma myigung gi lamdik lamdik le, yvang gi bui ri lvom dvo mu ano ashen ling nyi le, ladam ling quq zhang gi lazan aqing o le.   Myigung ano ashen ling nyi mu sheq, nyi eq myin la le zhoq e ngvut le”.

    Buiwang qam Zhintong gvong bumzau mang Zhvintong Zauzha lago jo mau zung dvo mu tem dai gvat e gi: “sara e, myigung ling dvo e ma bui chang so e angvut, bui so nyi myigung chang ling nyi langvut le. Bui gi nyiwui bui toq qam ma e Lapai zau bum gvong mai toq lo lo mu, myintang tang gi ngamoq buiwang qam ma e zau bumqet ma so wang lo byuq byuq lamu ra. ngamoq e Mingbyu bum gi apyi apau nyi lo e byvat mai, akui zhe ri re lazvui lvang adui wu shi nving, nang gi myigung dat dui le ga e gi lon dai ladai ra”. (14)   Gvasu Tung Rungyin    Puqsu Doqshi Labau