Gokun, Ninggon Zhvinun eq Ninggon zhan Wvoishun gi cangpun myi pan toq mu, Lungrong bum luqqung ma Tingngan Mugam ga su mangzo ri zung nvang dvo gvo e ga.Cangpun myi hau ngvut zhang, mauchut myin zhe lo zhang gi luqqung duqbo lo, maubo buitoq lo zhang dum shum byuq dut e ga.Haumu wacang zo wui myi hau gi myin ri duqbo, nyiqui ri shum byuq dut e myang gvi lui wu o nau e mizho, wikwik duqbo e azing hau lo dung ra midvu, myingdu byvizo eq myingdu yuqzo qintoq mu, gaunyi gaumyin zo ra zoko chin tung hun lui, uluq gaubum lut, labyvi gaulang lai e zhang ma nyi e cangpun myi zung su zhvang nvang gvat gvo e ga.

　　Tingngan Mugam gi wacang zo nvik zhe lo e myang mu：“Oh, cangzo nungnvik gi haimu bo lui haidang bo lui kamau kamvuq mai le lo gvo e lvu?”ga lvom myi e ga.Hauzhang wacang zo nvik gi：“E, wacang pau lo e azhvi mangzo e, cangzo nganvik gi maudap jvi su myin ri duqbo lui nyiqui ri dum shum byuq dut e zhung le dung ra midvu, mau- mvuq lvum myidam toq mai wacang zo wui nvang gvat gvo e ngvut le o.”ngvu sangjvo gvo e ga.

　　Hauzhang Tingngan Mugam mangzo gi：“Akun nungnvik e zochung dvungmying gi kisu ga myving dvo agvo lvu?”ga dum myi zhang, myidu wacang zo nvik gi：“O, nganvik e zochung dvungmying gi Byvizo Woqdat Byilvo、 Yuqzo Bikdat Lalvo ga myving dvo byi agvo o.”ngvu dum daijvo zhang, cangpun myi zung su mangzo：“Oh, nungnvik gi zo- zhvung dvungmying qum nyo ri, akun nung- nvik cangpun myi yu lo lui hai lo gvut gvi ra lvu?”ga dum myi zhang, Woqdat Byilvo eq Bikdat Lalvo gi：“Azhvi paudap mangzo e, ngamoq wacang zo wui ri nang su gvut mauchut lo zhang duqbo nvang, maubo lo zhang shum byuq nvang gvut nau e mizho, wacang zo wui banshoq bang nganvik ri lajo gvut lui nvang gvat gvo e ngvut le o.”ngvu dum sai sangjvo gvo ga.

　　Hauzhang cangpun myi zung su Ting- ngan Mugam mangzo gi wacang zo nvik sangjvo e dang jo wu mu：“E, hau myin ri duqbo, nyi ri shum byuq dut e zhung gi ayo myi la ngvut le, alvo myi langvut le, waplvum myi gvut myi adut, zo zhvoq myi gvut myi adut e ayo myi la ngvut le, nungmoq wacang zo wui chung zhung myi gi akang maupan se su nap mai, sepan zvowaq nyi mai myidam toq ma um dvo be, zhangding toq ma myvup dvo be. Haumu lui nungmoq wacang zo wui chung ra dut lui onau gvo e ngvut zhang gi, nung- nvik byidum cam dvau lo lui, yuqdum byang dvau lo lui, wa ma qang lo zhe, tum ma shung lo shit lui, choqpyit myingmyving qum e, zochung dvungmying qum e, zoku zhvoi e, kulum ngon e, mayat zhvoi e, maya yung e myvizum pozum qinyu lui, labuq myidun lo dun gveq, lazo myibut lo but gveq, hauzhang nungmoq wacang zo wui waplvum myi wo gvi ra, zhvoqzo zhvoqshuq myi wo gvi ra ngvut le.”ga shitjvo be ga.

　　Haumu lui, wacang zo wui gi cangpun myi zung su Tingngan Mugam mangzo shitjvo gvat e dang chang mu, labuq gam tuq man dvo, lazo gam koq lvap dvo gvut e tang ma, choqpyit myingmyving qum e zochung dvungmying qum e Dvulum ga su eq Roilum ga su pomyvi pojvo qintoq lui, labuq myidun dun, lazo myibut but nvang gvo e mai, wacang zo wui chung ra myiyung myilvo wo but toq yu gvo e ga.Haumu Zaizo amyvu myibut but yung hau chang mu lui myibut dat but lo gvo e ga. (Chumlut Dvon)