Zhvintong gvong bumzau mang Zhvintong Zauzha gi yvang ginwang myuq ma zuppong pong lo ra kun, hi zo ma za wo cuq qo gvat e mauwa asuya sik eq wa ma mu gi yvang zomang mo Zauseng ri qom gon nvang dvo be. Yvum eq gang yvam dvo e bui ce nyi myit bo lo zhang, Zhvintong Zauzha mang yvum ri wo myitbun gvat le dut lo be. Lamyin ma gi loqyo qam myoqgvuq dui le gvut, yvup ri amui lamyin e yvummoq za moq juq na shi ga. Myvipo sangqang ga ri: Loqbvai qam myoqgvuq dui ri gi sho-i myang zo ri ga, loqyo qam myoqgvuq dui ri gi wumzhi rop hui ri ga. Asu mu Zhvintong Zauzha mang gi yvum ma angvut zhang wa ma buinum zhinve haimu toq bigvo abe ga wo myitbun gvat lui, zuppong ban pong dvom eq yvumshut jinjin din dvau lo be.

　　Zhvintong Zauzha myanggung toq mai lawan wan lo jo mu lo wu dvang gvat zhang, gege ma ri yvang myit dvo dong yvang dut dvo lang be. Yvang yvumkun ma gi byu baubau, yvangzo nvamo Nangmai mowui gi iyon ngaubyi doidoi ngau zung quq bum lang bigvo. Yvang zhe lo e myang gvo mai gi, dviqdviq gvogvo yvang zhvang ngau yan wang bum lo gvi mu Zhvintong Zauzha mang byomang lo myang dan le niknik be.

　　Zhvintong Zauseng nvikdvang gi yvangmoq yvangwa ri xi joro Tingrva gvong eq Mvanding wa joro ma dimyaq bve eq zhvap haq gvat byi nyi mizho zvang ri zvang shidaq byu satshi lvum gvo ga lvom sang jvo agvo.

　　Tangtang ma Zauseng dai e gi: “mu xigi nganvung wa ma toq e angvut, nganvung yvum ma gi nvamo yvum mai be seng zhe lo za ngvut le.Haumu mauwa asuya ma za lo shitjvo gvat mvau e, nang ri gi zuppong pong lvang langjvo byi ra ngvu mu alo ho daijvo. Ngamoq myit e gi mu ri ban toq be age han loq, manglat yui mu xi nvamo yvum bang ri za seng zhe le angvut, buiwang qam byin shut bum gaifang ra mu ma seng zhe be ngvu lui, zi-au Zauno zo ri za lago chom migum nyi mu, gadvu gi nang zhe lo zhang yvo mai sai pyelvum mu piran zhung langvut alo ngvu lang dvo nyi e.” ga.

　　Zhvintong gvong mauwa mingbyu asuya upzau gvut hi e Zhvintong Zauzha mang yvangzo Zauseng eq lvom byam shitjvo mu bve ri jo ngui dik be.

　　Zhvintong Zauzha ungut ngut mu dai e gi: “m, xidong imyit ahan la gvut azo ri wu dvo lui mu dat piran gvo gedik be. Tingrva gvong zimoq wa ma toq e mu xigi nganvung Zaizo bve joro ma toq lvum e aja ala e manglat yui mu za adat ngvut lo, dimyaq bve eq shui gvut mu sheq xisu e iyon mu mo latoq le. Nganvung mu xi ri mauwa asuya ma jinjin shitjvo mu, asuya mai napma yvang myuqkau wang lo lui, gaifang jvin bve ri manglat yui mu mo xi toq dvo e lo shitjvo nvang ra dut ra ”.

　　Zhvintong Zauzha mang wui hi lanvut shuq gvat mu dum dai gi: “ngo xida ginwang wang lo mu upkang dvarva byinpye zuppong eq laili paqzhvi mvoqbvan pung lo be wang e mai, imyit ganzvang zhaq lo myvang lo be. Gungchan dang ge, Mau zhuxi ge, gaifang jvin zhaq ge bve ri lo se lo myang be. Yvangmoq gi o ri lvang myit wo shui hui dik agvo. Nganvung gapgap sapsap zau gvut po gvut wong gvut lo bang ri gi goidvu dat lvikwu agvo, xigi yvangmoq ming wo up e sakse be. Ngo gi ginwang nambvat 1cik upkang dvarva byinpye wap suwun wo qin gvut be, Zhvang tonzhang ga ri ngamoq ri hai bo zhang hai dai, hai wu toq zhang hai dai toq lo gveq ga. Mauwa up au gi Zaulon ri tai gvut nvang shang ngvu lo dai dvo be, Zauseng nang gi wa ma mu awo qut qo loq lago zui jo lo ra dut be, wa ma mu shui zui ge zhang gi nunggu Zaulon ri mauwa ma mu zui dve ngvut be; Zaudvoq aming gi ila nyi ri zhe jo lo be ra, haukun zhe zhang Zaulon nang gaifang jvin bve eq myit lago chom hui lvum ra dut le, yvangmoq ri laili paqzhvi eq zuilik sailik bve lago mvoqyu ra dut le. Zauring nang gi wakau ma zumra mu eq mauwa ma zumra mu shui wun zui ge ra gvut aq, nungmoq gumang nvikdvang 3yuq bang shidaq tuqchang tuq gvut mu, higu le ja mingzo danzo ri gapgap sapsap muge ban byi jo lo ra dut le”ngvu ga.

　　Tangtang ma, Zhvintong Zauzha yvangzo bve 3yuq ri dum sai zvang daijvo gi: “goi myin dang e je jo je tang bve gaifang jvin ri azan ung mu mingjvo ma pang myva rot bum lo lui, midu lai shoq dimyaq lo myaqzo wun agvo. Tingrva gvong nangkau mo ri lo shui sat e gi shinggvang lo yu toq shit mvau e ngvut be. Akui gi zutang xi nga powui zhvang wingdui lo nyi abe. Yvangmoq xisu gvut e lazhvum gi buiwang qam byinshut bum gaifang wang lo qo ma qodang le chang dang e ngvut be. Nganvung e buitoq qam, buiwang qam eq munshut bum bve ban gaifang be. Awo gaifang e gi byinshut qam bum za langvut alo, Zhvang tonzhang ga ri: byin shut bum ma e dimyaq bve ri wo ban zan zhvom yvam zhang gi ginwang ma Gungchan dang zuppong eq mingbyu asuya zuppong mo dum pong shi ra ngvut le ga. Asu mu, nungmoq gumang 3yuq gi gaifang jvin bve ri lago changtuq changbang ra dut le, mauwa migum mu wakau migum mu Zauno zo ri migum mu bve zui ge ra dut le, ban wo gaifang ge be e nganvung Zhvintong gvong ma angon mu haimu lvang age sai lvoqtoq loq.”ga.

　　Zhintong Zauseng yvangwa dai dong yvanggu nvik ri byin hi lago shuipye mai, Shang lenzhang eq dvunshit dvo a-o ma wazung je bve ri zuppong shui pong jin mu, mauwa asuya eq wakau zung ge qo shui pyai rva, haumai gi mauwa eq wakum ka myi-um laknak waq shoqshoq e wazung je ri zhanzi qom yap nvang lo be.(17)

　　Gvasu Tung Rungyin

　　Puqsu Doqshi Labau