Mvanding zautang nvikzhum e ri kimyvo haq dunzik mvau nyi gvilvang, myoqke dimyaq zaumang Goq Zhankui e nyvaukau myoqzhi mai awo dang lai, zhowu jezau zo Anni ri haq mvoqjvo gi: “Zautang xisu zhe dut lo zhang zhe, nang Zaizo mangmo Zautang gung ma bvinvuq bvinvem gvut yvang zhe sai zhvit shit mvau ra dut le” ngvu ga.

　　Dimyaq zaumang haisu ri asam alvaq mo gvut Zautang nam ma so e mu paqzhvi e toq jvo e gi: “nang ri nganzva nyi e zaumo yvum bang ri sat zhvom qo yvumsing mai hi dvoq so ra dut le. Nganvung hi advoq so zhang yvangmoq mai yvum yvang ma le lo mu midvai le dvup be gvi ra, haukun zhe zhang nganvung dambup lon lom lomzo le, pang zhang ho pyuq le dut be ra. Ngo ngvu ri rvong dik e Tingrva gvong Zaudvat yvangzva bve yvum ma alo dat gop gvun dvo lo, yvang byusat mu gvut toq dvo be mu, yvang ri yvangzva bve eq lvom dat mvoqjvo le, asu gi Zaudvat yvangwa eq yvanggu 2yuq gom shi yvam lo be mu o daijvo dang ri nolo tang ma kuiwap e ja za langvut alo, haumu Tingrva gvong Zaudvat gi waqngan za la dat chin wun alo, lo gop nyi dvo gvilvang yvang mungyvum mvan-ang wa ma za la lo dat gop nyi dvo ra ngvut le, hau angut zhang gi gaming dan Myenden qo ban pang toq be kai” ngvu ga.

　　Goq silin mang zhaq wa mo su gvut palap lanvut zo dvu shuq gvat, amtang ma yuq dvo nvutmui lashuq zo ma sop gvat mvau le gvut angvut gvilvang ngut shi nvo za ga hupjvo mvau zhang, yvang dimyaq zo bve ri shimau shimoq dut shoq jo mau zung bum gvizhang, alvaq mo su ga dum sai dai jo lo e gi: “Tingrva gvong zauyvum ma Zauno zo gop nyi dvo zhang gi, nauqi ashang shi e zoshang zo za ri sese za be, ngo ngvu ri nungmoq ri se su be. Zhvintong gvong yvangzva bve yvum ma dvok za chom kong lvung dvo su be, azhing gvizhang gi hi e ok jo gvat wu shang, zhvintong gvong ma e ok jo lo e azo mai wu mu sheq kadong gvut ra la doqdan shang ” ngvu ga.

　　Mvanding zautang ki si son ri re yvang e u-nuq paqzhvi gi demyaq zau mang ri aqit si zi la ga dvo be. Doqdan imyit abo byu gi si bve yoq zi be dat chang le mu, tang nyi gi mvanding zautang yvang je zo 2yuq ri pyai nvang gvat lui, demyaq mang dai dong zhvintong gvong mi zho e-haq wu nvang be.

　　Myingung sanggam yoq ri, Tingrva gvong ma wabyu juq le gi singpyo singlvap ga gu yvupmo ban myi bum be, yvumzung shokat kui ri kumdong laqam ma upgoi leng dvo mu nvokok rinrin be. Tingrva gvong midu midap ma dimyaq hui, bumzau mang Zaumo ri bebe le biksat byvam dvo, Zaudvat midvai kat dvup yu e tang ma yvanggu hai nvik ri ajing shi e 2yuq ri re biksat byvam byi be gvo. Zaudvat eq Zauno gi ka lo ri achang se lo mizho, Tingrva gvong wasing anyi lo, shui on byu abo lo mu rau byo myin byvam lo lo za lo……

　　Tangnyi maubo zo ri, Tingrva gvong wabyu yvup mai bun dvoq bum lo zhang, lawa gung e ma dimyaq bve eq mvanding wa ma waje bve eq le ban lom quq dvo bigvo, wu gvat wu zhang singjvi ngvoqzo ja dung dap su za angvut ri gi o wo dvoq pang ra ri adut lo, wa pyuzo dimyaq eq dum tunghui bigvo.

　　Mvanding wa je bve ri dimyaq bve tang ma be zhvom bvom mu, Tingrva gvong lawa gom ri layvum yvum mai kat pyuzo wang lo bigvo. Demyaq bve hai ze ge myang hai ze ge yu, woq myang woq zhvup, waq myang waq zhvup, no myang no she gvut jvop sat wang lo bigvo ngvu zhang, myoqgvuq lalap za ma woqwaq ngau le jvejve lawa gom ri sengseng dut shoq le qom pyuzo lo pyuq bigvo. Wabyu rvi gi waqhu yo ma qom gvonzving mu chom lvom lvung dvo bigvo. Mau le gi byu xizhum ze ban wo qom pyu waq lo ri re lo ra ri ahen, lazhung ra ashi ga nvo za gvut byumoq ma layuq ri kat dvu wuwu gvut la kat zhuiwu wun ashi gvo. Asu gi yvangmoq ho e Zaudvat eq Zauno ri amyang ho lo mai, 3-4yuq lazhum zhum zo gvut wa-um mai watang rot shoq dum dvau hozok wang lo wu shi ri re amyang ho la dut zhoq nyi mai gi, wagung ma yvum layvum ma myoq gi munmun chom wu zvuq dvo e mai, waqngan 8-9yuq yapzap dvo lui, myi-um eq “dak dak dak”ga ri chapse gi myvamyva dang myva bum shoq, yvum hau ri shai dong ja chom bik pyot bum bigvo. Coqcoq ma dimyaq bve 3-4yuq dum tem wang dang e mu, do e lang bvau wu le, sidek e lang lveng pong wu le puilvau gi zhvungzhvung dut shoq kat lang lvau jvop gvo ri re, Zaudvat eq Zauno nvikdvang ri gi wupzo ri lvang amyang ho lo gvo mai gi, nvikzhum yo na shi gvi mu, yuqge po layuq ri jvaqshe gun toq yu lui, sikmo zingwang ma e dvui shap dvo e mai yvang yvumbyu wui ri re sikmo zing wang ma qom zhvungun e mu e be yapzap nvang dvo bigvo.

　　Amtang nvutmui lashuq zo yuq gu e dimyaq zau wam zo nvutzhvun ma gi nyvabvok ngat waq mvau dvo mu imyit dang dai e gi: “Goq silin gi gumpan sira mo ja yvang be ngvut ra, Tingrva gvong ma Zaudvat nvikdvang ri ho zuiyu ra gi gege yvang yamyoq gve dvo lvai byvam be ngvut ra”ga. Haumai gi yvangmoq chom dvui shap dvo e yuqge po hau ri sheq dum jvuqchit jvop wang lo be. Yuqge po hau hi ma so e mai, yvang batloq mo dvuwaq gvat mu bvimvai zvang ri zvang e lang mvai dvang gvat be ngvu zhang, yuqge po hau ri nvutzhvun mai sui gi pyipyi byvuq mva lveng dvang gvat be, ban maleng leq dvo be su ri umqi eq amtang e we dvudvoq yu mu dum sai jizvuq e gi: “Tingrva gvong Zaunong nang, Zaumo gi nungmang sing yvu angvut ri nang he zaumo e lup shui du byvam byi gi, nang i-zo nvik Zaudvat eq Zauno ri gi ka haq dvo be? Rau dai aq! Adai jvo ri gi nang ri re biksat dvang byvam be ra”.ga

　　(18)

　　Gvasu Tung Rungyin

　　Puqsu Doqshi Labau