Myitnoq mo wun gu e wamkui ladu, byupo e bainam e yuzo nau lui nyan paqzhvi toq be.Lanyi ri, yvang gi bainam zungsu ri：“Bainam yvumsing wa e, ngo gi gokun angvut azho mu ashau gvut lai lo be, ngvut ri akui gi myit milai bo be, tangpyang gi ge e mu za gvut lo ra, ngo ri qamsam byi aq, laqma nang ngo ri lumzhing e ngvutzhang, tangpyang mai ngo nangtang chang bi ra, nang e bainam bve ri re ngo gi nga e nvikdvang wui su shui nyi ra, haumu yvangmoq ri lago za migup miga lui, gomyvu dusat eq yvangmoq ri ale rvoi nvang.Wojo ri akui wamkui gi nang e bainam bve ri myoq ashau wuzu nyi nyo ra, nang lumzhing aq, ngo za nyi be mai gi nang e baiman bve o ale wo yuzo.”ngvu dai mvau be ga.

　　Wamkui gi dai izhang ngaubyi lvang yujo shoq gvut mvau mu, bainam yvumsing po gi wu shojo le dut mu wamkui ri lumzhing lui, yvum ma shui nyi be ga.

　　Tang ma, wamkui gi nyinyi buibui bainam bi zung mu, age mu hai ri agvut lo ga.Bainam yvumsing po sanghi ri lvang wamkui ri alvum lumzhing mu, bainam zung e gvilvang wamkui bau ri a e nvang, wamkui ri fang e myit bo ashi.Asu wamkui gi nyiwui mying amyo e za bainam lago bi zung nyi, bainam ri yuzo ra sam gi lason lvang alvoq toq ga.Haumu, bainam yvumsing po gi myit kau mai yvang wamkui ri lumzhing be, wamkui ri fang ra myit ri abo lo, bainam zung e ri re yvangbau ri e nvang kun ri bo be ga.

　　Lanyi ma ri, bainam yvumsing po gi mu bo mu myuqkau e ra dut e mizho, bainam banban wamkui ri zung nvang dvo be.Haumai, wamkui gi aqing yamyoq ang dvo be ga myit gibu dik mu, bainam zung zhang ma bainam lazhum yuzo byvam lui wamdau gi dvingdving yvup mvau dvo be ga .Bainam yvumsing po myuqkau mai dum dvau lo zhang, yvang e bainam ri wamkui eq ai yuzo byvam e lo myang e mai：“Maukung girai e, ngo gi haizhung nvikshi zhit mu lui wa wamkui ri lumzhing e lvu o!Haimu wa nga bainam lazhum yvang ri bau zung nvang dvo e o!”ga myit milai bo na shi be ga.

　　Mvomyi zo ximai daijvo nau e gi, subve e dangngon dangmvau ri gi agon age jo lumzhing, laqma myitnoq wun bang ri nang lumzhing mu yvumsing e imyit banban e lapbyi be mai gi, mirop dong jo wang lo ra buinyi amyang lo ga.