Amtang nvutmui lashuq zo yuq gu e dimyaq zauwam zo nvutzhvun ma gi nyvabvok ngat waq mvau dvo mu imyit dang dai e gi: “Goq silin gi gumpan sira mo ja yvang be ngvut ra, Tingrva gvong ma Zaudvat nvikdvang ri ho zuiyu ra gi gege yvang yamyoq gve dvo lvai byvam be ngvutra”ga. Haumai gi yvangmoq chom dvui shap dvo e yuqge po hau ri sheq dum jvuq jvop wang lo be. Yuqge po hau hi ma so e mai, yvang batloq mo dvuwaq gvat mu bvimvai zvang ri zvang e lang mvai dvang gvat be ngvu zhang, yuqge po hau ri nvutzhvun mai sui gi pyipyi byvuq mva lveng dvang gvat be, ban maleng leq dvo be su ri umqi eq amtang e we dvudvoq yu mu dum sai jizvuq e gi: “Tingrva gvong Zaunong nang, Zaumo gi nungmang sing yvu angvut ri nang he Zaumo e lup shui du byvam byi e gi, nang izo nvik Zaudvat eq Zauno ri gi ka haq dvo be? Rau dai aq! Adai jvo ri gi nang ri re biksat dvang byvam be ra”ga.

　　Tingrva gvong Zaunong ruqruq za ga tem dvudai gi: “nungmoq su kuilo mo bve, mauzhum maulo goq ma byusat bang ri gi mau eq lvang gun le, nungmoq ngamang hai mira ri abo su ri le biksat dvo gvi mu nving, ngo he ngamang e lup la shui du byvam ri zhvau hai ra agvo? Nga izo nvik kalo mvolo gi ngo ri yvu o adai jvo dvo gvo, yvangnvik ri qi ladap dvo nving ka lo byuq e gi ngo kima chang se ra? ”ga.

　　Dimyaq zauwam zo dum dvoq tem dang e mu Zaunong buling zing ma e jvaq zing dvo mai e dum jizvuq mvau e gi: “gowui kibvuq mvau! Raudai aq! Nang ase ri o se ra?” ga.

　　Zaunong dum dvu dai dang lo e gi: “ase she ngvu ri nving , lase gvilvang nungmoq su e kuilo mo bve ri o gvam daijvo le” ga. Dimyaq zo bve 3-4yuq laha dum dvoq tem dang e mu “byvengbyveng ”ga ri bvimvai dum chom lang mvai jvop bigvo ngvu zhang, Zaunong nvomun sui gi jvoqjvoq, bviwam ma gi ako ko dikdik me ri dum ma leng lo be.

　　Dimyaq layuq Zaunong yvangzo 12zan za e Kunseng zo ri e jvaqzui yu mu myi e gi: “agu zo, nang nungmang Zaudvat eq Zauno ka lo ase luq? Kima gop dvo agvo? Nang za daijvo zhang nungmoq layvum bang ri nvang gvat be ra ” ngvu ga.

　　Kunseng zo dimyaq xizhum eq yvangwa mo ri biksat byvam byi, yvang zumngon dik e gumang nvikdvang ri kat lvam byvam byi, yvangwa su byunum mo ri jvaqbat byi gvo myang mu, yvang imyit ma gi haq nganzva nyi gu nvuttoq shatang gvut daimvau gi: “nungmoq gvo bang mu nungmoq gvo bang lvang ase ri, ngo zoshang za gi kima se ra lvu o” ngvu ga.

　　Zaunong dum jing dvoq lo zhang, dimyaq bve yvangzo Kunseng ri choqmyi wang lo gvo myang mu, yvangzo Kunseng ri hai lvang gvut byi gvi ra ga myit zhe lui dimyaq po ri loqlik lik yu gi: “woi, ngazhvang le lo aq! Ngo nan zhang daijvo gvi le” ngvu ga.

　　Dimyaq po gi ngvutnvo ngam mu Kunseng zo ri jvaqzing dvo e nvang gvat e mai, Zaunong zhvang dum lving e lui e myi e gi: “Zaudvat eq Zauno akui kama nyi dvo agvo? Nang ngamoq ri jinjin daijvo aq”ngvu ga.

　　Zaunong dum ngvutzhang dimyaq zo ri yvangnam ma wo dainven yu eq, yvang loqyo qi eq dimyaq zo chigvo yvang ma wum bo wum eq lvom tem bvik byi be mu, dimyaq zo gi iloq eq yvang chigvo ma dunzing dvo lui gipuq gileng “ayo ayo”ga no dang go leng leq dvo zhang, awui ayam ma yap bum e dimyaq zo bve wui le haha ga, dimyaq bve eq lvom lvung dvo e wabyu bve ri kau wui le ri xixi ga.

　　Bvikko lomzo e dimyaq gi hoqyo yo le, no le shiso noso gu e zhan jvop lui ye dvoq dang lo e mai, myi-um ret yu zui ri Zaunong e loqyo qi ma ‘dvakdvak’ga 2dam waq bik byi mu, nvut ngatzing shoq dai e gi: “bvik shi ra luq? Nang rau bvik lo wu shi aq ma? Nang amvo yuqge bve ri wam bvik lo bi ra”ngvu ga.

　　Myi-um ladam eq gi Zaunong e qiyin ma dveq za zang bik byi mu, suine gi yangyang, suiyut yut lui Zaunong dum langtan dang lo shoq ga.Kunseng zo gi dimyaq bve eq yvangwa ri qi ma suine gi yangyang dut shoq bik byi gvi zhang, wungbung zo ja dvoq tem dang e mu dimyaq bve eq jvaqmyaq lvum jvop be. Kunseng zo eq dimyaq e loqyo loq ma ai dap ngat pa byi zhang, dimyaq zo nongau le jvejve gu e Kunseng zo ri wum gvat he lvoi gvat be, ngatko mai gi suine doidoi be mu dimyaq zo don le gi myoq mai myi byam lo su ga shoq, loqbvai loq eq myi-um yu zui lui Kunseng zo ri wingdui dvo e mai ‘dvakdvak dvak’ga lang bvuq gvat be ngvu zhang, Kunseng zo ri shai dong su dut shoq bik nyvoq dvo mu dimyaq bve gi dvungdvang ban dvoqso lo byuq bigvo.

　　Kunseng zo yvangnu gi Kunseng piwui hi ma maubung myibat peleng pejvi ngau wu leng leq dvo be.

　　Midu dik e dimyaq bve eq nyimo danggvang ri Tingrva gvong ma byusat misui le dum langjan dvo bigvo, Hai mira ri abo e lanyi lazhoq byu ri bebe le dum sat lo bigvo, manglat yui le dum sai ho toq dvo bigvo……(19)

　　Gvasu Tung Rungyin

　　Puqsu Doqshi Labau