Shang lenzhang gi bumzau mang lum ge yvang ge rvi ngvut rva ga wu toq mu, san zi dvu dai e gi: “Ge le ! xidong zhe ge su be. Manglat yuimu xi asai toq gvo lvuq ra midvu, mangzo nang Gungchan dang ri lumzhing, jefang jin ri lumzhing mu xi su gvut doqdan e ge dik be. Ngo akui yvang dvau lo mu jefang jin jezo xauzhvang ri lo pyai nvang gvat byi ra, napma nap yvang lo chom de gvat gvi- shang”.

　　Myin gunggam woqpo pi-ne mang lvang 2fa zi wo dvoq dvun ashi ma, Zauzha mang yvum bang byu kau de lvai ra mu dvoq mon zui jin nyi bigvo. Zauzha mang yvang dumo zhe gvo su Muru tuqlum gi byin dvoq ra bang ri ashau noq mai zang wui gai dvam dvo byi lui, Zauno zo midvu poqzhum zo mai qolat mi zo ra zangjeq jeq byi nyi ra; Zhvintong Nangmai eq zhvintong Nanglum nvikdvang gi gijvin gimvan gvut Zauno zo ri mebu ho hang byi le, mebu tai tai byi le gvut jin nyi agvo; Zaulon eq Zauring gi byin dvoq bang zhi chung ra myang ri chizau zvo jin le, myang nungkung ma zhibui waq hun hen dvo le gvut jin nyi agvo; Zauseng pewui gi wapdoq zhipung toq ma myit mau zung lvum dvo agvo…….

　　“Gvak dvak, gvak dvak, gvak dvaq” ga myang zhin nang myving te gi zhe mying zhe we lo nyi be……

　　Zhonggang gang shoq e byuzhi zhi gu e zhimyang 3du bum qo qo zo so tang mai u-shang gi dang dang bva gung saiwon dum din rot, puilvau gi zhvung zhvung yotung bva din kap bigvo.

　　Hi ma zhi so lo su gi loqpyo ma umzo waq gu e qo hi byi su jefang jin zhowu jezo xauzhvang ngvut ra; Joro ma zhi so dvo su gi Zauno zo dvuibau dvo gu e zauzo Zhvintong Nanglum ngvut ra; Tang ma zhi so dvo su gi nungkung ma myi-um dvui wun, loqpyo ma sham dvum bva mo waq gu e wazung jezau Zhvintong Zauring ngvut ra.

　　Ginwang myuq kau jewap ma zhe lo gvo kun gi myoq myang qang lo be.Jewap ma jezau jezo bve gi gungbyvan dvoq din byvan nyi agvo……

　　Zhowu jezo xauzhvang zo hi myang gung mai lo jo mu, zhimyang lo shui dvui shap dvo mai, Zauring bve 3yuq ri Zhang tonzhang e muban wap ma zhau zhau shui wang e lui, Zhang tonzhang ri byin shut bum ma xi joro zvang ri zvang manglat yuimu toq e bve lo shit jvo ra. Zhang tonzhang lvom jo don dik mu loqzvup eq siboi toq ma waq tun shoq dai e gi: “Mang demyaq nungmoq shi zhvom ra gi amyang loq dve!”ngvu ga.

　　Jewap ma zhanzi yap jezo xauli gi Nanglum eq Zauring gunva nvik ri wuibu lvom hun byi jin le gvut ra.

　　Zhang tonzhang gung shut puq lo mu Nanglum eq Zauring ri mu toq e azo lago sai myi yu lui Zauring ri dai shi on e gi: “Nang wazung jezau zhaq wo gvut ge ri ngvut ra, kayuq ri nang ja amu zui lajvet ri gi byin shut bum noq mai wo ban jefang byvam bira”.

　　Zauring yvumsing gung gung dai dviq mvau su gvut dvu dai e gi: “Xibve ban ban gi Shang lenzhang eq dat dvunshit mu gilvu o, ngawa, nga mangmo, nga manglat bve eq dat chom mvoq jvo gvimu gi lvu o”ngvu ga.

　　Zhang tonzhang gungdu ngom jo gvat mu yvo yvo za eq lak dik nvo za e Zauno zo ulvum ma sop gvat lui, u-nuq paqzhvi hi lving gvat wu e mai zhvinvan yu bat gvat e gi: “Wvoi! Wang juzhang luq? Nga muban wap ma jin jin byam le lo ra gvut aq! Mu mo lamu byam chom pyelvum goq”ga. Coq coq ma Pung yenzhang eq Jau juzhang ri re yu ri bat bat gvut nga zhvang byam le lo gveq ga zhvi- nvan mai qom bat jvo gvat ra……

　　Lazup zo ma gi hihi tangtang gvut kisu mu taq! Kisu mu taq! ga mirum mi-ngan e jezau bve 3yuq din le lo bum bigvo.

　　Ban zhe zing bum lo gvo e mai Zhang tonzhang lvom shui dai gi: “Suwun oi! Nga- nvung byin shut bum jefang mu numdon gvat e gi shut be ngvut ra. Ka nungmoq wu gveq ma! Zoshang xigi byinshut bum tingrva gvong Zaumo yvangzo Zauno zo ngvut ra. yvangwa eq yvanggu 2yuq ri gi hihi tangtang ma de- myaq bve eq hai mira ri abo gu e be be bik sat byvam byi bigvo, yvang mangmo ri gi jvuq lvam byi bigvo.Yvang gi yvangzva bve yvum ma za gop nyi zhang ri ngvut ra. Akui yvangzhvi zhvintong Zauzha mang nganvung ri lumzhing mu yvang shu Zauno zo nganvung ri bi haq ku gvo byi gvilaq ga shui le lo nvang dvo ra. Akui nganvung jewap ma mu ri gvum myo dik be, ngvut gvilvang Zauno zo ri be haq ku gvo byi mu xigi azui adut e wo mu ngvut le. Mu xigi myinzhin ju Wang juzhang nang le byam hap zui ra gvut aq! Chuizo xi ri zhe wo kong ge ra midvu Baushan chuizo ku bau wap bang ri han han ho coq gvat mu Baushan ma lo de gvat nvang ra gvut aq”.

　　Wang juzhang zhvang tonzhang ri bvai dvo izhvang ge le ga hap yin lo lui chuizo Zauno bve ri Zhang tonzhang zhvang mai qom shui toq lo be.

　　Wang juzhang eq Zauno zo bve ri ban shui toq lo tang ma, Zhang tonzhang gi bui wang byin shut qam ma gop lung bum e demyaq bve ri kadong kat shi den byvam ra, buiwang byin shut bum ka dong gaifang yu ra bve dum shui ming ra……

　　Tang tang ma Zhang tonzhang dai ri: “Buiwang qam byin shut bum ma demyaq Goq Zhankui buiwang qam byin shut bum jefang lo gvi ra ri shui dang zing dvo nau lui, azhang zhang byu sat shi lvum nvang le gvut sat jvop lo be, jefang jin bve ri bum mau lo shui jefang gvilaq ga be e Tingrva gvong Zaumo ri biksat byvam le ri gvut jvop bigvo. Asu mu nganvung mai buiwang qam byin shut bum rau rau lo shui jefang ra dut ra” ngvu ga. (22)   Gvasu Tung Rungy    Puqsu Doqshi Labau