Lvomo zvo le ganggang e lamyin ma ri, mingjvo Zaiwa wa ma e Lato Pauzhvang mang e zaiyvum zo myiwap lvingquq ma la yvum bang chom zung quq dvo agvo. Pau- zhvang mang dai e gi: “Zaudvat e, nang lazup za ma situt dang lo mizho xisu mu gvut toq dvo be, ka qo haq pang lo yvam ra gi nang mai yvang jinjin myit doqdan ra dut be. Mvanding Zautang bve nang ri ale chang ho sat adat mu loq”.

　　Zaudvat ulvum dvu ngvang gvat mu dai e gi: “ngo lazup za ma nviksoq sup dang lo mu, ngawa shi lo kun daijvo yvam dvo e midat dang dvomyvi yvam lui, xisu mu toq e mira ngo bo be ngvut ra. Ngo nganu ngawa e zoku jvezhvu awo dvau loq, gumang nvik- dvang wui ri mvomyi shui lvoq pu dvo be, apyi apau azhvi awvoi bve e gap awo coq jo lo loq, mozhi te ajo lui icung bum lving be, layvum bang lawa bang ri misha she hang byi be. Haumu, ngo gi Mvanding Zautang bve eq shizhvom lvum shoq gvat zha lvum zhang sheq, hai mira ri abo e bebe shi yvam lo e ngawa、ngagu nvik eq ngamoq e yvum je bve ri midvai lawo be dvup byi ra ngvut le”.

　　Yvangzva mangzo Pauzhvang mang eq ai gimaq dvang gvat e gi: “Zaudvat e, nang xi dong tungshi batmau age gvut jo lo loq, subve Mvanding Zautang bve gi byu myo moq luq le, nang layuq bau zo za e kau bik kat bik mvau wun ri gi kima bik ung ra? Akui nang myit doqdan ra e mangkoq nving, shijo la- yvup e nangnu eq nunggu bve ri lago lo so- hui gvat izhvang, nangkau bve eq mangkoq xi kadong peran zhang zhe ge ra e lo chom pye- lvum zhung sheq langvut le”.

　　Zaudvat hai nungzut ri agvat ubu cuqcuq dum dai lo e gi: “ngo imyit lvum situt、nganzva imyit lvum bo mizho, kinyi xi su gvam lazhe e ngvut le, nganu、ngagu bve、nga kau bve ri ka myoq eq alo wam myang loq. Ngobau mai Mvanding Zautang bve eq mu xi lvum dvot pyit yvam le zhung za langvut alo. Azva aumo nungnvik gi Nangseng miwui ri shijo imyit mai be shui nyi gveq!”

　　Mangzo nvikzhum jo yo dik mu nvikyo nvikdvat ga dum jizvuq gvat e gi: “Zaudvat nang gi gege yvang byudang adat jo loq dvi? Kisu mu lui ubu za lacuq wun e gi, nungmoq e yvumbyu hi gi gege yvang adat myit byi loq dvi?”

　　Mangzo dangtang angaq ma, yvumkung ma “dvak dvak dvak dvak”ga ri myoqmyang gi pyotpyot zaimop labum lazang jo bum lo shoq le bik dvang gvat bigvo.

　　Mazi myium bik myving te mying woi lo eq wojo e gi: “Pauzhvang mang e, nang ziau Zaudvat rau de toq le lo aq, za angvut zhang ngamoq mai nangyvum nyvezhvom yvam byi be ra. ” (23)

　　Gvasu Tung Rungyin

　　Puqsu Doqshi Labau