Ngo anu iyuq wo le, layuq gi ngo ri wo su anu, layuq gi nga e zhviwvoi mingdan anu. Ngo anu xinvik ri lazhung za myit zhvitdap le.

　　Ngo asak 6zan mai anu eq gang e mai, myuqkau ma lo nyi be. Xitung ma yvummau idam dvau lo wu e, idam e mangyvum zhvat lo e, anu nam ma isum nyi zo za myang nyi gvat e, amyang ma myuqkau han dum dvau lo be.

　　Ngo dvanmyvang zhong izvang doq lo e kun, anu ngo ri nyvi byvam yvam dvo be, ngo gi anu awo e chuizo dut be. Anu asak 40zan za le nyi ra, ngo isum nyi yvang ashau yonngau nashi e, awo zo qo, awo yvupmyvi, anu eq laha chang bi so ra su ga shoq yvang yon e. Anu e zhvitmyit abo e zoshang layuq gi, singbyo angap gu e byu ja be, ngo angap gu e singbyo wundvo mu, labyvat yvang myit angon. Anu ri myitbun gvat zhang ngaubyi yvangbau yvang lengjo lo ra, kamyvo cezan lai ri lanyi za su ga.

　　Tang ma, ngo Deqgoq mingdan ma zhongdoq e be, Getinggen ga e zvumzvum za e myuqzo ma nyi lai lo e, hai dut mu ri ase, anu nga yvupmoq ma anum le bo ra. Nga e mingdan anu, ngo yvang eq sanghi dam za ganglvum wu ashi, hai dut mu ri ase, nga e anu xiyuq ri yvupmoq ma anum le bo ra.

　　Haukun le imyit daisan ra midvu, ngo Getinggen sanghi zhe e kun le mizving laigva mai isum dvum zo gva qo le:

　　1935zan lvomo 11qam 16nyi，kamyvo amyang ma maukung noq lo be. Ngo gi myintang lazhvum zhe bo e su ga ra. Ngo myibo apong, zvimzvim za kihot dong ma yap dvo, dvuqdvuq gu e myin yvoyvo mai maukung qo doq lo be, he dvap ma yvumkung zhe shoq doq zhe be. Laming dvuqdvuq mvopmvop mvapmvap gvut noq dvo ra. Nga e imyit zvum nau awo zvum lo shoq dui lo ra. Ngo nga e yvunmau ri myitbun ra, yvummau ma e buinum auzo byinchang wui ri wo myitbun ra, imyit yonyon za ga ra, lazvui chamzhvui ga ra. Asu e, xi-u le chamzhvui gi gokun le chamzhvui eq aqum, yvang gi mingming chui gu e, adat dai toq e su ga, mingming chui gu e ze nga myit ma dap dvo bo dvo ra.

　　Lvomo 11qap 18nyi, hi jiro mai, ngo yvum boi lung nyi le yvumsing myvi ngo ri daijvo ri, yvangzo kinyi yvum lo bi ra, zhong mai lo le ga gibu le ashau.......asu e, yvangzo kinvam ri azhe lo, yvang imyit lason ri angon loq. Yvang(yvumsing) dum dai e gi, myin ma modo ladam do ashi, yvangzo yuqge zo dat lo ashi ri ase. Ngo yvumsing myvi e isam myang gvat zhang, ngo yvummau ma myigung ma yvupnan dvo e anu ri wo myitbun gvat ra, zhaq ngau nau ra! Ngo akui sheq wo myit se ra, myidam toq ma anu gi banshoq lazhung za be.

　　Lvomo11qap 20nyi, ngo akui yvum ri ashau yvang wo myitbun ra, zhviwvoi mingdan ri myit ra, mingdan ma e byinchang wui ri womyit ra, ladam dam zhe gi lvum myit lui lvang awo zhan lashoq dut ra.

　　Lvomo 11qap 28nyi, ngo shafa dvangkuq ma leq dvo mu, kihot dong mai lai lo e jo gvun dvo. Laikau ma mau nyo dvo ra. Maukung kup le gi myinnoq su gvut. Imyit kau ma wui zvu lo e su ga, zhviwvoi mingdan ri dum wo myitbun be.

　　Ngo Getinggen sanghi zhe kun mizving dvo e laigva mai, xi isum dvum chung gvat yu be. Dvengdvup dong mai dai gvat zhang, isu gvut qum gu zhang ashau myo ashi, xi isum dvum ma ako mai ri wo wu se ra. Ngo nganu eq zhviwvoi mingdan anu nvik ri myitbun gvat zhang, nga imyit gi zhvun dvoq lo e ja, gaming ma nyi jo dvo ra imyit gi wupzo ri lvang amyang loq. Lvomo isum qap tang ma, ngo longsan laigva lalong gva e, laigva mying gi 《Yvummoq ho》ga le. Sanghi dvum ma gva e gi:

　　Myin ma anu ri yvupmoq myang e, ngo ngau mu bun lo be. Bun lo eq yvupmoq hau ri dum zhvup zing dvo nau zhang, yvupmoq hau kihe dang lo be lvang ase loq. Ao ma gi anu ri yvupmoq kau ma myang e isam ri gva e. Zhe tangtang ma ladvum gi: Mau oi, sansan qangqang za yvupmoq lalvum za lvang ngo ri abyi mvau dvi? Ngo yonyon za gvut muimui gu e maukung ma wu dvo be, ngaubyi kau ma anu myoqdong wupzo myit toq gvat be.

　　Ngo Zhunggo mingdan ma nyi dvo kun, layuq ri za myitbun ra, anu layuq ri za yvang dat myitbun ra. Goming zhe tang ma, ngo wo myitbun e imyit kau ma zhviwvoi mingdan anu dum zhat lvuq be. Isu myitbun e i- myit, Getinggen zhe e kun godvu yvang zhe bo ra，hau tang ma ri abyit wu. Xisu myitbun e i- myit, ngo Ozhu ma e nyi e 11zan ma yvang bo nyi ra.