Zaudvat dvoq yap dang lo mu jvoq ma e shambyang qut wun chung, myium guq waq chung lui kummo dong mai dvoq tem dang toq ra hen zhang, yvangzva Pauzhvang mang eq chang langzing yu mu, rau pang aq ga, kihot dong mai e zhvun gun toq dvang gvat be.

　　Zaudvat mau chut dving gun layang noq dut gu ma zvomra we pang toq lo mu lo myit bun gvat e gi: e, yvumsing za xi su gvut pang toq yvam lo ri izva aumo eq zoshang miwui ri mirop qo dvo age ga lui, gungshut lvik puq e mai din dvau lo mu noho lo kau ho gvat wu ra hen mvau zhang, lado mau mai lo zhe myang dvang gvat e gi, byu hau zhum eq yvangzva yvang aumo bve yvum bang eq yvangzo miwui ri lvom lvung dvo mu, yvum ma myi dvap gvat ra hen wang lo be gvo……

　　Zaudvat yvangzva yvang aumo eq yvang zo miwui ri hung qo bik qo yu le ga, myiput zo ma gop dvo e mai Mazi myium eq, hi ma yap dvo gvo e dimyaq bve 3yuq ri wing dui dvo mu “dvak dvak dvak” ga ri bik qui zvung gvat zhang, ga bang dimyaq zo bve ri gi yvang zhvang qo zhvat wo qom bik nven yu be. Haumai, Zaudvat gi pang ri lvik bik bik gvut shiso noso pang jvop be. Dimyaq bve gi maumang simvuq ri chang shiden bik jvop nashi gvizhang, Zaudvat e loqyo qi ma chang bik zvuq gvat bigvo. Asu e gi, mauchut dvunggun layang noq dut mu, Zaudvat gi sikmo bvung ma wo pang gop wang lo be, sikmo ulung yo ma wo pang gop wang lo e mai lvang, dimyaq bve ri sai bik nven yu shi ra gi advo myvi, afa fa myium lalang bvuq myving lo ashi, dimyaq bve umte jojo mu myoqchum nozhit kimyvo chang shiden mvau gvo rire Zaudvat e wup zo ri lvang achang myang la- gvo, mauchut dvinggun layang noq ma Zau dvat ri kat pyuq yvam gvo e mai gi, uhui zhvungzhvung dvau lo zhang bigvo.

　　Tvingrva gvong Zaudvat gi dvinggun la- yang noq e mauchut myin eq girum tuqbang dvo ao ma, bum dong mo ma myang sop gop wang lo be. Bum dong mo ma yvangbau imyit dang lo dai lung mvau dvo e gi: ngo gvum zvangzvi zvangmvan gvut wo pang gop lai gvat be, asu e gi Mvanding Zautang bve nga- gu bve ri luilui gi awo wu lvai la gvi kai ga mu, Mvanding Zautang bve eq dimyaq bve ri zhe lo nviknoq nyi dvo be, myomyo gi yvang hai ri angvut su ri kau zvuq le zvuq qut mvau lui, mauzhum maulo goq ma dvui gvop dvo mai chom bat bvup jvop gvo e dam bup lom zo wu; yvangwa hai ri angvut su ri bebe le bik sat yvam lo; hai nvik za lvang ajing shi e zaulaq eq zaudvu ri re qolat ma lvom bik sat dvang yvam byi; Zauno eq yvang ri gi chang kat ho sat wun gvo eq ga zhe myit zhe don e ung lvang ban wom midvu be. Gapgap sapsap nyi ge toq ri lanyi lai lo e Zaizo bum zau xi yvum bang ri, kinyi ma Mvanding Zautang zo eq dimyaq bve eq, myvinso batsan gvut yvam byi, myizo eq shi gang lvum nvang, wo yvum abyi wang lo, zomut wuishit kat pu wun nvang gvimu, Tvingrva gvong Zaudvat bam le bvaqbvaq e myidong kau ma imyit langdang jui ri bvaq za lo jo zung dvo be. Lamyit eq gi ngvoqzo ja dung lvu dap kun, mau myvu kung ma dvung za dang doq lo yvam ra ga zhe myit zhe lo myit yon don zung dvo zhang, abun ma Zaudvat myoq zhvun 2qam mai mau wo ja byvoqbyvaq ga ri ngaubyi yui toq bum lo be.

　　Tvingrva gvong Zaudvat bum dong ma buinyi zvomra nyi bo lo shoq umdam lo kau ya lung nyi izhang lo dum myit bun gvat e gi: wo e yvum ma ri age dvau lo loq, mung yvum ri age lo loq, lo so toq shit wun ri gi dimyaq bve eq wup myang wup dum kat shiden bik sat lo bi gvira ga mu, kayung ayut kabyvi akap lo mai mauwut shishi ji go lo e gi: ngo le jo nyi e myigung xi long oi, ngo ri hup hing e maukung xi long oi, haimu lui ngo ri nviknoq agvo lvu o? Haimu lui, ngo Zaudvat bi nyi ra zhang azhoq e lo lvu o? Haimu lui ngamoq yvum ale ge bi zhoq lo lvu o? ngvu ga.

　　Tvingrva gvong Zaudvat hai son hai arot lo mai, myit tang tum, yon byvi byit be mu, ga mingdan shut nyi wang ho so toq yvam lo zhang be.

　　Tvingrva gvong Zaudvat ri chang shiden e dimyaq bve uhui zhvung zhvung dvau lo mu Mvanding Zautang ri lo sangjvo gvo e gi: “kat shiden sat wang lo nvung ma, Zaudvat eq nganvung byu 2yuq ri lvom bik sat yvam byi, 3yuq ri gi zhiwo lvom bik dvong gvat be; Tingrva gvong Zaudvat ri gi, ngamoq eq awo wo ma bik zvuq gvat be, asu e, sikmo ung lung yo ma buinyi 2nyi chang ho ri re wup zo ri lvang achang myang loq. Zang bik zvuq gvat e mai dai zhang gi, Tvingrva gvong Zau dvat zo sikmo bvung ma lo shi dvo bi kai, hau angvut e ngvutzhang gi ga mingdan Myenden shut pang toq yvam lo be kai, nga- nvung ri chi sui lo wam sui le zhung gi angvut loq” (24)

　　Gvasu Tung Rungyin

　　Puqsu Doqshi Labau