Gokun, lomo ladu anum num byu yu zo mu nyi e ga.

　　Lanyi ma ri, Mangbyoq ga su layuq, zai yam e mu, zaiding wun chung mu yvum dvau lo le ga, yvum qo ma so dvo zhang, lomo hau du Mangbyoq ri myang gvat lui yuzo ra ga, yvang e numtang ma yvoyvo le chang so nyi be. Mangbyoq lvik wu gvat zhang, mvan bvung qo ma dum wang lolo gvut, Mangbyoq gi lomo chang dvo e se lui agva gva ga lui, mau zung jo lo be, lomo gi myit mau lui lo myi be: nang hai dut ri lu?Mangbyoq dum daijvo e gi: ngo moi shi lo ri, awo dui nyo loq ga.

　　Lomo gi maukung shut yvoyvo za haq dvu wu lui, nvut kau ma yvoyvo za gvut dai e gi: mau gi han achut dvi? Mauchut zhang wacang xi yuq ri yu zo byvam ra la ngvu ri ga. Lachang dvo wu shi ba ngvu myit dvo lui, zai ngo bi wun byi le ma ngvu dai e ga, Mangbyoq dum dai e gi: wo bi wun zhang gi lau la bi wun aq mvai.

　　Haumai gi lomo ri zaiding wun nvang mu shui so be, yvang gi numtang shut ma labvui bvui le so tang jo lui, myiqek chekchek ga bat nyi lui, lomo wun dvo e zaiding ma, myi bat dvap gvat byi be, hauma, lomo ri dvan dvang gvat be, hauu ma Mangbyoq gi han pang lo be.

　　Zaiding hau ban nye mai lomo gungdu ma nye lo be, lomo yvang layuq bau gi myi kasu sat gvilvang awo sat lui, myisat lazum wui ho le ga, qomo ma din so gowun be.

　　Sonyi sonyi zhang, myang lazhum ri lo myang be, myi e gi: mangmyang e, ngagung ma myi dap lo ra, kasu gvut zhang sheq myi xi wo lvoqsat yvam ra lu?Myang dvudai e gi: xi ngamoq su gvut gongleng leng wu aq ga lui, lomo gi myang daijvo e su gvut gongleng leng wu be, haului gi myi hau gi zhe leng zhe dap lo lui, azho ngvut ri ga myit be.

　　Haumu, hi qo shut dum so lo be, sodvo sodvo zhang, nolui lazhum gvilvu lvu nyi e lo myang be, hau mai gi, nolui zhum ri dum myiwu be: mang lui e, ngagung ma myi dap lo ra, kasu gvut zhang myi xi wo lvoqsat byvam ra lvu o? Nolui daijvo e gi: xi ngamoq su gvut wuitum ma gvilvu le lvu wu aq. Lomo gi nolui dai jvo dong, yvangmoq lung dvo e wuitum ma bungbang ga byam wang lo be, lomo gungdu ma myi yvoyvo mai shi lo be, lvomo gi gibu dik mu lui, nolui ri jvezhu dvau le ngvu nolui e lingzing ma ngunkong lalvum bathut e ga, ngunkong hau kat gi akui buinyi zhe shoq wutdvo nyi le.