Zancau nunglvui yoq du lo be o

　　Zansik shut hu yoq du lo be o

　　2020zan nunglvui yoq du lo be o

　　2021zan shut hu yoq du lo be o

　　Zaizo magva din wu yoq zhe lo be o

　　Kunshi laigva din wu yoq zhe lo be o

　　Byu ngui laigva din ngvap yoq zhe lo be o

　　Myithui laigva din ngvap yoq zhe lo be o

　　Din wu gan aze shang o

　　Din ngvap yoq alvai shang o

　　Hai lo yan mai din ra lvu ga zhang o

　　Hai e yan mai din ra lvu ga zhang o

　　Kunshi laigva gi o

　　Myithui laigva gi o

　　Gau we kunshi shitjvo su o

　　Gau zhvang lusik shitjvo su o

　　Bumbvuq tu gvolvang ngo

　　Nojo rot nvang su o

　　Sebvuq tu gvolvang ngo

　　Myoqmyang rot nvang su o

　　Yvumkun atoq gvolvang ngo

　　Shingra danglu se nvang su o

　　Welam atoq gvolvang ngo

　　Gau we kunshi se nvang su o

　　Byu ngui laigva gi o

　　Myithui laigva gi o

　　Sumse se nvang su o

　　Sumdat dat nvang su o

　　Byuze myitkum pong byi su o

　　Waze myitkum pong byi su o

　　Dvungnvik jing nvang laigva o

　　Dvungpyo be nvang laigva o

　　Amvoq dvungpyo be nvang laigva o

　　Asui shamso lvo nvang laigva o

　　Myit so sumlving dat quq nvang su o

　　Ngvam so sumzhang dat bying nvang su o

　　Se le sumse se nvang laigva o

　　Dat le sumdat dat nvang laigva o

　　Kundat mying mu mvoq su o

　　Loqdat zhimu mvoq su o

　　Zomvoq te mu mvoq su o

　　Myausui luq mu mvoq su o

　　Molik shit laigva o

　　Myuilik shit laigva o

　　Jvoqo yoq shit laigva o

　　Nyinvam yoq shit laigva o

　　Muzui paqzhvi kojvo laigva o

　　Zhisai paqzhvi kojvo laigva o

　　Jvodoq zhvi byving yung shit laigva o

　　Nyilvung kup byving yung shit laigva o

　　Sut ho yung shit laigva o

　　Gan ho yung shit laigva o

　　Puga sulik shit laigva o

　　Wuiloq subyvang shit laigva o

　　Ngun ho sulik shit laigva o

　　Hing ho subyvang shit laigva o

　　Zui wo sulik shit laigva o

　　Sai wo subyvang shit laigva o

　　Liklai zvinbyvat dvunshit laigva o

　　Liklai shingra dvunshit laigva o

　　Nyingon byvatsik dvunshit laigva o

　　Nyingon buinyi dvunshit laigva o

　　Ngunzhoi zuq e byu ngui laigva o

　　Hingzhoi zuq e myithui laigva o

　　Byu ngui laigva o

　　Myithui laigva o

　　Byuze yung shit laigva o

　　Waze yung shit laigva o

　　Byuli yung shit laigva o

　　Wagan yung shit laigva o

　　Numnum byuze yung shit laigva o

　　Shutshut wado yung shit laigva o

　　Byu chang zhvitdap yung shit laigva o

　　Byu chang paudvap yung shit laigva o

　　Lazum pauchang pau shit laigva o

　　Doyo gu chang shit laigva o

　　Mo paudvap shit laigva o

　　Zo zhvitdvap shit laigva o

　　Myipau langpau yung shit laigva o

　　Myizhvit langzhvit yung shit laigva o

　　Guzhvit mangzhvit yung shit laigva o

　　Gujvin mangjvin yung shit laigva o

　　Yvumyo ngaudap ra shit laigva o

　　Igvun ngaudap ra shit laigva o

　　Mapong ngaudap ra shit laigva o

　　Shingra ngaudap ra shit laigva o

　　Myithui qo shit laigva o

　　Byinhui qo shit laigva o

　　Dvara dvunshit laigva o

　　Qoli dvunshit laigva o

　　Radung byin mu shit e laigva o

　　Raloq lvum nang shit e laigva o

　　Sumse shit lo myithui laigva gi o

　　Sumdat shit lo kunshi laigva gi o

　　Mvoq zhi unghun laigva yvang o

　　Sui zhi byangcang laigva yvang o

　　Zoshuq paqzhvi shit laigva o

　　Wumluq paqzhvi shit laigva o

　　Sanseng qo shit laigva o

　　Wangzan qo shit laigva o

　　Lano mazha yung shit laigva yvang o

　　Lapyo mazha yung shit laigva yvang o

　　Chi chung yung shit laigva yvang o

　　Manchung yung shit laigva yvang o

　　Cammyvi dvang sumse shit su o

　　Ujang dvang sumdat shit su o

　　Mauwum dvang paqzhvi shit su o

　　Myizhang dvang paqrat shit su o

　　Wui azhe shi ma zamzvam shit su o

　　Mau awo shi ma tangho shit su o

　　Gungbyvan gan aze nvang su o

　　Wangzan gan aze nvang su o

　　Byuze wangzan yung shit laigva o

　　Waze shangzan yung shit laigva o

　　Sumlvo myithui laigva gi o

　　Sumban kunshi laigva gi o

　　Byu ngui te bo laigva o

　　Nodving te bo laigva o

　　Zhvit nau te bo laigva o

　　Yukun te bo laigva o

　　Kun-ut te bo laigva o

　　Zhi i te bo laigva o

　　Zhigau tung so te bo laigva o

　　Woqgau ngvat so sam bo laigva o

　　Yauyang te bo laigva o

　　Lalvai te bo laigva o

　　Sumzai mvoqmyi bo e laigva o

　　Sumshin labau bo e laigva o

　　Gauming kunshi bo e laigva o

　　Gaudan dangsik bo e laigva o

　　Welam kunshi bo e laigva o

　　Zhvangyam kunshi bo e laigva o

　　Wu zhang myoqtang sam bo e laigva o

　　Ngvap zhang no jo yo e laigva o

　　Paumang no jo yo e laigva o

　　Pyimyin myoqzun du e laigva o

　　Sang lo kunlvo myithui laigva gi o

　　Dang e kunsho laigva ngvut ro

　　Dang e isut lvoqring dvara kojvo su o

　　Dang e igan lvoqzhat dvara kojvo su o

　　Dang e nyingon dvara kojvo su o

　　Dang e yapngon dvara kojvo su o

　　Dang e tuqbang dvara kojvo su o

　　Dang e girum dvara kojvo su o

　　Dang e shojo dvara kojvo su o

　　Dang e nvikmyin dvara kojvo su o

　　Byvat lo myung nyi bang ri

　　Sumshi sho nyi bang ri

　　Myung lo muqjvup qut byvam byi lui

　　Sho lo muqjvup qut byvam byi lui

　　Zoluq zoyang wo lo nvang e

　　Wutluq cauyang gum lo nvang e

　　Zo aban muidam lam wo nvang e

　　Shuq aban labyvi tum wo nvang e

　　Nyingon byvatsik myang wang nvang e

　　Nyingon buinyi myang wang nvang e

　　Dang e dvara kojvo su o

　　Dang e ajvu ara kojvo su o

　　Dangpung nojo yo e

　　Kunsho laigva yvang o

　　Asuya myoqzun du e

　　Myithui laigva yvang o

　　Sumzhvit yukun te bo e

　　Sumdvap yuyang sam bo e

　　Kunsik laigva din nam dum zhe be o

　　Asik myithui laigva din yam dum zhe be o

　　Haumu lui eq o

　　Hauyan mai eq o

　　Ungbui ashai gvut lui o

　　Unglvo alvai gvut lui o

　　Byu ngui magva sik dum din shang koi o

　　Myithui laigva sik dum din shang koi o

       (Gvasu Chumlut Dvon)