Ngvoqzo lazhum shumshi yo ma dang e mu shumshi e kauzo ra son bigvo.

　　Shumshi yo ma e ra hi ma, uhi shui she su ngvo kokam gi：“Numnang wui e, shumshi gi ashau ngvam le, ngvut ri nganvung zo myoq age noq, shumshi yo ma myangmyang e nyi dvo zhang gi yvumsing bve eq dat le myang le, hauzhang nganvung e gvang lvang dat lvoq qo byvam le, haumu ngvut jvo wo zo be mai lawan so shang.”ga lago za mvoqjvo dvo be.

　　Ngvoqzo ladu gi kokam wa dang ri agvam jo mu：“Dang ximyvo myo e gi, hausu li za wa o ase e.”ga a o ma mying haq myo be.

　　Shumshi yo ma, myving zhvoi bum e shumshi gi nene za shigam ma zui bum be, shiyo zung su yvupmui mui zung dvo e u, ngvoq kokam wa gi yvang numnang wui shui lui shiyo shut wo kau wang e bigvo ga, haumai yvangmoq gi shumshi e pyoqzo na shi bigvo.

　　Zvomra zo e pyoqzo nyi gvo e mai, ngvoq kokam wa gi ngvoqdung bat gvat lui numnang wui ri so shang koi ga be, haumai yvangmoq gi zhaq agvam byvam dvo shi gu dang so bigvo ga.

　　Akun hi ri mying haq myo su ngvoqzo haudu gi, zo myoqnoq na shi lui yvang numnang wui eq abi so, yvangbau shiyo ma haq nyi dvo lui shi pyoqzo nyi be ga.

　　Hau-u ma, shiyo zung su gi yvup mai bun lo lui ngvoqzo yvang shi le haq pyoqzo nyi e ri myang be, haumai ngvoqzo haudu ri ngvoqzhvup ze eq wo lvung yu be ga.

　　Ngvoqzo haudu gi yonbyvi byit lui：“Ngo gi go dik be mvai, zo myoqnoq e za angvut, akui gi gvang ri jo byvam ra dut be o.”ngvu dai yon na shi be ga.

　　Mvomyi zo ximai daijvo nau e gi, zo myoqnoq ri gi mirop hui ri ga, yangkung ulvum i za e gewang ri ngvu mu, yvumsing gvang lvang lvoqqo byvam e byu myomyo nyi ra, haumu lui myangmyang byuze nyingon nau e ngvutzhang gi myitnoq age wun, zo myoq age noq.

　　(Puq lazhang su Kongno)