Myoqchum Gam eq Wuikung Gvoq gi myilang lanvum ngvut agvo, yvangnvik e imyit gi apno dong toq zhvap e mizho, mau nyvoq i za amu hui ri mibyoq sumjvi gvut nyi agvo. Lanap ri gi Myoqchum Gam yvang qam⁃ tang kung ma woqhui ladu e bvau lo mu, yvangmyi Wuikung Gvoq ri“Mugvoq mo, kinap gi sunngvam lom be o”ga dai migang, yvumbvan ma jamzan toq ma woqhui lo lveq gvat mu,“Mvo qamkau ma hu chang pijvi e ho lo aq”ga dum dai be. Wuikung Gvoq yvumkau mai toq le mu jamzan toq ma lveq dvo woqhui ri myang eq“e e ”ga mu yvum⁃ kau ma tunggva zo ret lo yu wun mu qam shut dang wang e lo be. Zvomra zo nozung byintoq yoq ma, woqhui sho wo gai nyoq be, ngvamshing hom le gi gaubum mai lvang wo hom rot midvu, Wuikung Gvoq gi:“Ximyvo ngvam gu sun ngvam wo ri wa i eq icin cin gvat ri zhe ngvam ra wa”ga myitbun gvat mu, yvanglang Myoqchum Gam ri“Zohan shuqhan a ge han, ngo ipe lo ku lo ba”ga yvumkau shut ipe got wang lo be. Wuikung Gvoq ipe got le ga iyam myvi yu hui byvam mu, iyam shut zhuiwu gvat zhang yvang e wupzo sheq iyam kau ma tuqlung dvo be. Wuikung Gvoq lago ri a myit wu e, iyam kau ma myiwe layuq lung dvo ra ga, myiwe xiyuq gi yvanglang Myoqchum Gam myizo myizhe ho lui iyam kau ma lo haq dvo ra nvung ga nvikzhum yo shi lui,“Meshi ra, gau zhap dvang ra su oi, myizo ho su nang, iyam ma myizo haq su nang, xi rau lo wu aq, nang kadong dai ra ngvu le lvu? ”ga giru gi shit ga yvanglang Myoqchum Gam ri nving nyi be. Myoqchum Gam jo gvat ri su a du midvu mira ri a myang wa nving na shi e gi, hai dut be lvu ga dinwang lo mu iyam ma lo zhui⁃ wu gvat zhang, yvang wupzo ri iyam ma dum⁃ lung dvo be, Myoqchum Gam lago ri amyit wu e iyam kau ma yuqge layuq lung dvo ga, “Zomyi jui kuimyvi mo, soso nang sheq lang⁃ zhe wo ri iyam kau ma lo haq lvung dvo ri nving, angvut dong mai kui dvau kat wap lo e gi, nang imyit gi hai imyit? ”ga yvangmyi Wuikung Gvoq ri dum nvikyo na shi be. Wuikung Gvoq iyam kau shut le dum zhuiwu gvat zhang akang le myiwe myvi dum lung dvo lui, yvanglang Myoqchum Gam gi ngo ri byurvoi rvoi su ngam mu nvikyo momo mai, loqpyo ma chung dvo igot eq Myoq⁃ chum Gam ri dvundvo mu“Meshi nang za eq ngo ri rvoi mvau e gi, nang za eq rvoi mvau e gi, nang dyvo nang...... ”ga nvikyo izhvang loqpyo ma chung dvo igot eq Myoqchum Gam ngilang ma“dvem”ga du dvang gvat be. Myoqchum Gam ri midvu mira a myang nving ga yvangmyi Wuikung Gvoq ri“bveng” ga bibyvuq ladam byvuq dvang gvat be. Adut loq, haumai gi lanvum dvang kui ngat lvum ja awo byvun loq dapchik myaqchik lvum nyi bigvo. Tangma gi wazau zhvang zaugau gau zhe bigvo, wazau gi xi nvumdvang zaugau le gau dang ri hihi tangtang jowu mai, kisu amu ngvut e jo se be. Haumu, wa suwun eq shui chung ri xi nvumdvang yvum e lui, suwun ri wizung eq iyam batkoq tong gvat nvang be. Homdik e i gi pyopyo yuitoq nyi be, lazup ma jop be iyam ma i ban yui zhang, wazau gi “Ka, nvungnvum wui myizhe langzhe gi ka ma ?”ga myi zhang, xikun sheq lanvum dvang yvangnvik imyit a ngon nviknoq lvum e gi yvangnvik wupzo za ngvut e wo myitbun be, iyuq ri nang wu ngo wu shichang wu lvum mu, myoqdong gi dvundvun hoqshi momo bigvo, shichang shut yinyin hoq yinyin mu, dumdum dvidvi byinhui loqlik chang gvut dum nyi bigvo. Xi nvumdvang yvangnvik yvumsing e wupzo ri myang eq jicheq jidvang myit a ngon dut lvum e gi, imyit awo zvim jo abvun awang lago a myit a son wu e mirop yvang be. Haumu, oyuq ngvut gvilvang, kisu amu tung⁃ hui ri imyit zvim za gvut myitwu sonwu ri sheq mu piran ra le ga. (Gvasu: Zuntung Nongyvam)