Lanyi ma ri, byu lazhum shobik chom e bigvo ga. Abun nung ma, byupo layuq gi myidong mo ladong ma byitjo wang lo be, yvang e loqyo loq eq qi iqi gi lengqui byvam be, loqbvai loq za hai ara ga. Dongmo hau gi ashau nik gu e ngvut ri ga, dongyam dum zhvut, haumu atoq ma nyi dvo bang yvang numnang bve gi kisu gvut lvang awo girum dut nyi bigvo ga.Atoq ma bang qung gi huihui kisu wut ri re dongkau ma su dvu nyo toq lo te awo jo lui, yvangmoq gi atoq ma kayung ayut za lang yap bum bigvo. Dongyam ma gi mvanzo yuq bum mu, dongkau byitjo wang su nvut eq mvanzo ri ngatzing, loqbvai loq eq gi gung ri tuqzing mu shirang dotoq lo nyi be.Myitoq ma lang yap bum e yvang numnang bve gi byupo hau mvanzo ri nvut eq ngatzing mu do nyi e myang gvo e mai, shirang aq ga wum-o chom byi bigvo. Byupo hauyuq dongkau ladvum wo dotoq lo zhang, awui ayam ma lang dvo bang byupo hau nvut eq za mvanzo ri ngatzing lui dotoq lo e myang gvo e mai, layuq lakun dai lo bum bigvo. “Aga, numnang wa xi nvut eq za mvanzo ri ngatzing mu doq myaq toq lo ri gi zhaq yvang wuiyak ra dut ri!” “Ngvut ro, wu gvat ri yvang e qiloq gi ban qui byvam be ngvut ra!” “Mvanzo he gi yvang i zing ri myangmyang gi awo tang ra ngvut le!” “Ngvut ro, yvang su la jo shi byvam ri gi yvang yvum ma haumyvo myvo e ngunze gi abi myvang chung gvun lo!” “Ngvut su be, yvang su la jo shi byvam ri yvangnu mang eq yvangmyi gi kisu gvut nyi lo ra dvi!” …… Myidong ma jo wang dvo e byupo hau, yvang lvang awui ake gvut do myaq toq lo nyi le ma, yvang numnang wui angon dang layuq lakun dai nyi gvo e wo jo mu, ashau nvik⁃ zhum mo yo dang lo ri：“Meshi mu ra bang, nungmoq e minvut gi myvi gvat gveq!”ga ji dvang gvat zhang, yvang mvanzo ri ngatzing dvo e nvut zang pong nvang gvat lui myidong kau shuq ai yvang dum byitjo wang lo byuq be ga. Hauzhang atoq ma lang nyi bang byupo hau myidong zhvung zhe dum byitjo wang lo e chang myang gvi mu,“Ngo zhvau dai be, nvut eq za wa mvanzo ri ngatzing mu gi kisu awo doq toq lo ngvu be!”ga dum chom dai nyi bigvo ga. Byupo hauyuq ashoi gi, lagung du e jop no le e, nvikzhum mo jo yo le gu, myidong kau ma shi lo byuq be ga…… Mvomyi zo ximai daijvo nau e gi, yvumsing zhamzhau hui dvo mu rau wo shi⁃ rang lai be ma, subve kisu ga dai bang bo gvilvang age jo byi, yvumsing myitwum zuq za shirang mu subve hai ga dai ri re nvik ayo、 nvutkum apong e za shigut shizhaq zhang sheq wo ong ra ngvut le ga. (Puq lazhang su Kongno)