Asak 15zan za myiwe zo layuq, yvangnu eq byoqlvum mu gung ma ngun lachap ri awun e yvum mai pangtoq lo be. Myiwe zo hau so nyi so nyi zhang, mau yvoyvo mai chut lo be, yvang gi zomut le wuishit le myung le dut gu shirang so nyi zhang, zvomra we gu ma kausoi zhvoq-ung zhang lalvum zhoq dvo e ri myang gvat be, kausoi zhvoq-ung su gi pomyvi zo layuq ngvut ra, pomyvi zo hau myiwe zo ri myang gvat mu：“Myiwe zo nang e, zomut be angvut lvu?Ngvut ri gi kausoi lakoq le zo gvat aq.”ga lvom dai be, myiwe zo gi hoqhoq za gvut lui： “Anu mo, ngo ngun awo.”ga dvudai be, akun zhang kausoi ung su pomyvi gi：“Ara, ara, anu mo nang ri ngun atoq e byi zvo le.”ga be, laqing ma, nyenye za kausoi lakoq eq sunzo la⁃ koq myiwe zo hi ma le dvam gvat be, hau⁃ zhang myiwe zo gi son ngau nau e su ga mu myoqzhi gi nene ngaubyi lvang rau jo lo be, haumai pomyvi gi myiwe zo ri：“Myiwe zo e, nang haimu be?”ga myi zhang, myiwe zo gi: “Anu mo e, ngo nang eq ri ase lvum, asu nang gi ngo ri kausoi lvang gvam byi zvo ra, kinyi ngo gi nganu eq byoqlvum mu pangtoq lo e ngvut le, ngo wu ri nganu gi ngo ri angui azhvit.”ga dai be, pomyvi zo gi zhit aga e“Ai” ga soqmo lada she gvat be, hauzhang myiwe zo wumau mu：“Anu mo, nang haimu soqmo za she, dang gi hai ri adai?”ga dum myi zhang, pomyvi zo gi：“Myiwe zo e, anu mo nang ri wu ri gi nvikjing zoshang layuq ngvut ra, anu mo nang ri kausoi lakoq za byi zvo ri lvang nang gi ajvu dat bun ri, asu myiwe zo nang ason wu lvu, nangnu gi nang dviq ashi mai nang ri kausoi kimyvo koq zhvoqzvo wu be, zang kimyvo zhvoqzvo wu be, nang nang⁃ nu ri ajvu bun ra、kungga laqra ra ason wu lvu?”ga dai be. Myiwe zo gi pomyvi dai e dang ri jo e mai nungngvam jo bo，myitbun jo bong gvat be, ngaubyi ri abun nung ma jo lo bum be……haumai yvang gi kausoi haukoq lvang aban zo e dvo byvam dvo mu, kausoi ung su anu mo ri lvang ajvu bun be ga lakun za dai byvam dvo lui yvumshut ding lo be…… Chutzo rumrum dut lo be, myiwe zo gi yvum rau zhe be ma yvumshut byu gvat wu zhang, we dik mai yvangnu yvumkun ma yap dvo lui xiqo wu mvoshut hu gvut ashau sing⁃ nan dvung yvang ri howut nyi e ri lo myvang jo gvat be. Myiwe zo yvumkun zhe lo zhang, yvangnu lvom myang gvat lui：“Ngazo e, nang ka lo byuq e lvu o?Nang zang ban mut bi kai, rau lo aq, rau lo aq, anu nang zonau e sun bve gai ge dvo be, sasa, zang hi lo zo goq.”ga gibu dik e su yvang dai na shi be ga. Haumai, myiwe zo gi ngaubyi duidui yvangnu ri lo bvozing dvo mu：“Anu oi, nga shut be, akui mai xisu agvut lo, tangpyang gi nang dang jo mu zhong ri lago doq bi ra, nang ri re hai myit alvoq myo nvang lo……”ga dai le ngau le imyit dang lo dai nyi be. Mingvan toq ma, inu iwa gvut bang e myit gi kayuq ri lazhung za yvumsing zo ri singno le zhat, yvumsing zo ri kimyvo nvikyo, kimyvo bat jvop mvau gvilvang, yvumsing zo zhe nyi zhe ge ra ri nau mu langvut le, kanyi kabui zhe gvilvang, inu iwa wui gi yvumsing zo ri zhvitmyit le zhat.      Puq lazhang su:Wangcai