Napsun buibik lo mu jamzhvap myoq myang lo be, anu gi ngoqpoq mai zang ma izhum pyun mu zhupwaq lui, myamzui toq ma gve dvo e tunggva zo yu wun mu toq lo be. Anu toq lo tang amyang ma, mauyam mai netoq lo e bui ri mvutmau noqmo eq ngvop byvam be, wabyap ri laqam shut yvon lo shoq laimo mut lo, bum shut mai maumo bvubva ga wo jo lo be. Goi e! Nga imyit sing⁃ gvuq tung lo ra, maumo wo lo be wa, nganu gi muq eq maubu ri awut chung, yvum ri rau azhe lo e gi kisu gvut ra lvu ngvu, imyit ajam ajvo ga nyiwui dik be. Nyigung zhe lo zhang, lai num lo mu mau ri ngvan lo be, mvutmau noq ri woi lo byuq be. Akang u ri mvutmau noq eq ngvop byvam e bui, akui gi maukung toq mai dum duqne toq lo be. Maupong lo mu anu ri yvum zhe lo zhang, nga imyit ma gibu dik be! Ngvut gvilvang ngo gi nvo-u zhvin dik lui, myoqzhvun mai ngaubyi yvangbau yui jo lo be. Goi e, nganu gi lagung du dvedve bvupbvup, mebu mai mauwui gi zvoqzvoq yui jo nyi mu, wu shojo dik be. Anu gi tunggva zheq zo ri yvang e nung⁃ kung mai yvumbvan ma lo qutzvung gvat be, hauzhang anu tunggva zheq zo mai mvanhaq poqnoq hom shing nam toq lo ra, tunggva kau ma bvau wu zhang yoso ma waqlvai、 dvingjeq、mauchi、maujon bve latung gva mo hang dvo ra. Ngo gibu gira gvut lvom laptoq yu lui, anu ri：“Anu e, tunggva zheq be wa haimu adu byvam e lu? ”ngvu myi zhang, anu wuizo chikchik gvut lui：“ Tunggva xi⁃ cham gi nangwa mui langvut le, age du byvam. Nangwa nyi dvo kun nungmoq nvik dvang ri yoso ma mvanhaq poqnoq ku-ung lui baugvo lo e ngvut le. Nangwa nyi dvo kun dai byvam dvo e gi tunggva xicham wun lui zoshang wui ri yoso ma mvanhaq poqnoq ku-ung mu lago baugvo aq ga dai dvo e ngvut le”ga daijvo lui, nga imyit singzhvung byit lo ra su ga, myoqzhvun mai ngaubyi yvangbau dum yuijo lo be, asu e anu myang ra ngvu lui, raurau haq sut byvam be. Anu tunggva zheq mai haunyi ri wun lo e waqlvai dvingjeq gi godvu chui ngvam dik ra, awa nyi dvo shi kun shui nezo su ga ra. Anu tunggva zheq ma kinvam lvang anu e zhvitmyit eq homhom za waqlvai dvingjeq mauchi maujon bying bum ra! Anu nyiwui wun e tunggva zheq hau gi, awa ngamoq dvang wui ri byi dvo e zhvitmyit wum-o ngvut le, zheq gvilvang age dubyvam! （Pauzhe Mazhi）